ട്രക്കിങ്​ നിരോധനം കർശനമാക്കി വനംവകുപ്പ്‌

P/4 Lead.. -ദുരന്തനിവാരണ നിയമപ്രകാരം നടപടിയെടുക്കാനാണ്​ തീരുമാനം ചെറുതോണി: വിനോദസഞ്ചാരികളുടെ ജീവനും സ്വത്തിനും സുരക്ഷ ഉറപ്പാക്കുന്നതിന്‍റെ ഭാഗമായി ജില്ലയിൽ അനധികൃത ട്രക്കിങ്ങിന് നിരോധനം കർശനമാക്കി വനംവകുപ്പ്​. വിവിധ പ്രദേശങ്ങളിൽ വിനോദ സഞ്ചാരികൾ അനുമതികൂടാതെ അപകടകരമായ വിധത്തിൽ ഓഫ് റോഡ് ട്രക്കിങ്​, ഉയർന്ന മലകളിലേക്കുള്ള ട്രക്കിങ് എന്നിവ നടത്തുന്നതായി ശ്രദ്ധയിൽപ്പെട്ടതിനെ തുടർന്നാണ്​ നിരോധനം കർശനമാക്കിയത്. ബന്ധപ്പെട്ട വകുപ്പുകളുടെ അനുമതി കൂടാതെ ട്രക്കിങ്​ നടത്തുന്നവർക്കും സംഘടിപ്പിക്കുന്നവർക്കുമെതിരെ ദുരന്തനിവാരണ നിയമപ്രകാരം നടപടിയെടുക്കാനാണ്​ തീരുമാനം. കഴിഞ്ഞ ഫെബ്രുവരിയിൽ മലമ്പുഴ ചെറാട് മലയിടുക്കിൽ ബാബു എന്ന യുവാവ് കുടുങ്ങിയതിനു ശേഷമാണ് ട്രക്കിങ്​ നിരോധിക്കാൻ വനംവകുപ്പ് തീരുമാനിച്ചത് വന്യമൃഗങ്ങളുടെ സാന്നിധ്യം കുറഞ്ഞയിടങ്ങളിൽ മാത്രം ട്രക്കിങ്ങിന്​ അനുമതി നൽകിയാൽ മതിയെന്നാണ് വനംവകുപ്പിന്‍റെ തീരുമാനം. വനംവകുപ്പ് നിശ്ചയിക്കുന്ന സ്ഥലങ്ങളിൽ മാത്രമേ ഇനി ട്രക്കിങ്​ അനുവദിക്കൂ. ട്രക്കിങ്ങിനുവരുന്നവർ സർക്കാർ ഡോക്ടർമാർ നൽകുന്ന മെഡിക്കൽ സർട്ടിഫിക്കറ്റ്, ഫസ്റ്റ് എയ്​ഡഡ് സംവിധാനങ്ങൾ, ഭക്ഷണം, വെള്ളം എന്നിവ നിർബന്ധമായും കരുതണം. ഓൺ കോളിൽ ഡോക്ടറുടെ സാന്നിധ്യവും ഉറപ്പാക്കിയിരിക്കണം. ട്രക്കിങ് നടത്താൻ ഉദ്ദേശിക്കുന്നവർ മുഴുവൻ വ്യക്തിവിവരങ്ങളും തിരിച്ചറിയൽ രേഖകളും നൽകി മുൻകൂർ അപേക്ഷ സമർപ്പിക്കണം. ട്രക്കിങ്ങിന്​ അനുമതിയില്ലാത്ത സ്ഥലങ്ങളാണ് വനംവകുപ്പിന്‍റെ കീഴിൽ കൂടുതലും. ഇക്കാര്യത്തിൽ കൃത്യമായ മാർഗനിർദേശമോ വിവരശേഖരണമോ ഇല്ലാത്തതിനാൽ അനധികൃത മലകയറ്റവും മറ്റും നിർബാധം ഇപ്പോഴും നടക്കുകയാണ്. അനധികൃത ട്രക്കിങ്​ തടയുന്നതിന്‍റെ ഭാഗമായി ഇനിമുതൽ വനംവകുപ്പിന്‍റെ നിരോധിത മേഖലകളിൽ മുന്നറിയിപ്പ്​ ബോർഡുകൾ സ്ഥാപിക്കാനും തീരുമാനിച്ചിട്ടുണ്ട്​. ഇക്കാര്യത്തിൽ കേന്ദ്രസർക്കാർ അംഗീകാരമുള്ള മൗണ്ടനീയറിങ്​ അസോസിയേഷൻ, യൂത്ത്​ ഹോസ്റ്റൽസ് അസോസിയേഷൻ ഓഫ് ഇന്ത്യ എന്നീ സംഘടനകളോടും കൃത്യമായ മാർഗനിർദേശം നൽകണമെന്ന് വനംവകുപ്പ് ആവശ്യപ്പെട്ടിട്ടുണ്ട്.