മങ്ങാട്ടുകവല ബസ്​സ്റ്റാൻഡ്​​ വീണ്ടും ടാർ ചെയ്യും

തൊടുപുഴ: മങ്ങാട്ടുകവല ബസ്​സ്റ്റാൻഡ് ടാർ ചെയ്ത് രണ്ട് മാസത്തിനകം തകർന്നതിനെച്ചൊല്ലി തൊടുപുഴ നഗരസഭ കൗൺസിൽ യോഗത്തിൽ രൂക്ഷവിമർശനം. മഴമാറുന്ന മുറക്ക്​ സ്റ്റാൻഡ് വീണ്ടും ടാർ ചെയ്യാൻ തീരുമാനമായി. വാർഡ് കൗൺസിലർ മുഹമ്മദ് അഫ്‌സലാണ് വ്യാഴാഴ്ച വിഷയം കൗൺസിലിൽ അവതരിപ്പിച്ചത്​. തുടർന്ന് പ്രതിപക്ഷാംഗങ്ങളും വിമർശനവുമായി രംഗത്തെത്തി. കുറ്റക്കാരായ ഉദ്യോഗസ്ഥർക്കെതിരെ അന്വേഷണവും നടപടിയും വേണമെന്ന്​ അവർ ആവശ്യപ്പെട്ടു. പ്രദേശം ചതുപ്പ് സ്വഭാവമുള്ളതിനാലാണ് ടാർ പെട്ടെന്ന് ഇളകിയതെന്നായിരുന്നു ഉദ്യോഗസ്ഥരുടെ വിശദീകരണം. തുടർന്നാണ് വീണ്ടും ടാർ ചെയ്യാമെന്ന് ചെയർമാൻ സനീഷ് ജോർജ് കൗൺസിലിനെ അറിയിച്ചത്​. വീണ്ടും പ്രശ്‌നമുണ്ടായാൽ ഉത്തരവാദിത്തപ്പെട്ടവർക്കെതിരെ കർശന നടപടിയെടുക്കുമെന്നും അദ്ദേഹം പറഞ്ഞു. ശാസ്ത്ര സാഹിത്യ പരിഷത്ത് പ്രവർത്തിക്കുന്ന കെട്ടിടത്തിൽനിന്ന് നഗരസഭ ഓഫിസിന് മുന്നിലെ വാതിൽ നീക്കണമെന്ന പ്രതിപക്ഷത്തിന്‍റെ ആവശ്യവും അംഗീകരിച്ചു. കരാറുകാരുടെ ബില്ലുകൾ മാറി നൽകാത്ത വിഷയത്തിന്​ അടിയന്തര പരിഹാരം കാണും. കൗൺസിലർമാരായ എം.എ. കരിം, കെ. ദീപക്, ടി.എസ്. രാജൻ, സഫിയ ജബ്ബാർ, സനുകൃഷ്ണൻ തുടങ്ങിയവർ ചർച്ചയിൽ പങ്കെടുത്തു.