നാടാകെ ചാക്കിൽ കെട്ടി മാലിന്യം; ബ്രഹ്​മപുരത്തേക്ക് മാത്രം​ എത്തുന്നില്ല

-തദ്ദേശ സ്ഥാപനങ്ങളിൽ ശേഖരണത്തിൽ വൻ അലംഭാവമെന്ന്​ പി.സി.ബി കൊച്ചി: നാട്ടിലാകെ മാലിന്യം കുന്നുകൂടുമ്പോൾ ജില്ലയിലെ തദ്ദേശ സ്ഥാപനങ്ങൾ നടത്തുന്ന മാലിന്യ ശേഖരണം വീണ്ടും താളംതെറ്റി. റോഡരികുകളിലും ഒഴിഞ്ഞ പ്രദേശങ്ങളിലുമെല്ലാം പ്ലാസ്റ്റിക്​ ബാഗുകളിൽ പൊതിഞ്ഞ്​ മാലിന്യം തള്ളിയ കാഴ്ചയാണ്​. എങ്കിലും ജില്ലയിലെ ഏറ്റവും വലിയ നിക്ഷേപ കേന്ദ്രമായ ബ്രഹ്​മപുരം സംസ്കരണ പ്ലാന്‍റിലേക്ക്​ എത്തുന്ന മാലിന്യത്തിന്‍റെ അളവിൽ വലിയ തോതിൽ കുറവ്​ കണ്ടെത്തിയെന്ന്​ മലിനീകരണ നിയന്ത്രണ ബോർഡിന്‍റെ റിപ്പോർട്ട്​. ഇത്​ പഞ്ചായത്ത്​ മേഖലകളിൽ ഉൾപ്പെടെ മാലിന്യ ശേഖരണം കൃത്യമായി നടക്കുന്നില്ലെന്നതിന്​ തെളിവാണെന്ന്​ പി.സി.ബി ദേശീയ ഹരിത ട്രൈബ്യൂണലിന്​ നൽകിയ റിപ്പോർട്ടിൽ പറയുന്നു. കൊച്ചി കോർപറേഷൻ, അങ്കമാലി, ആലുവ, തൃക്കാക്കര, കളമശ്ശേരി, തൃപ്പൂണിത്തുറ മുനിസിപ്പാലിറ്റികൾ, ചേരാനല്ലൂർ, കുമ്പളങ്ങി, വടവുകോട്​ പുത്തൻകുരിശ്​ പഞ്ചായത്തുകൾ എന്നിവയാണ്​ ബ്രഹ്​മപുരത്തേക്ക്​ മാലിന്യം അയക്കുന്നത്​. ഇക്കഴിഞ്ഞ മാർച്ച്​ 21, 22, 23 തീയതികളിൽ ഡമ്പിങ്​ യാർഡിലേക്ക്​ ഈ തദ്ദേശ സ്ഥാപനങ്ങൾ എത്തിച്ച മാലിന്യത്തിന്‍റെ അളവ്​ നിരീക്ഷിച്ചാണ്​ പി.സി.ബിയുടെ വിലയിരുത്തൽ. 2020ൽ പ്രതിദിനം ശരാശരി 304.43 മെട്രിക്​ ടൺ മാലിന്യമാണ്​ ഇവിടെ എത്തിയിരുന്നത്​. എന്നാൽ, മാർച്ച്​ 21ന്​ കൊച്ചി കോർപറേഷൻ ഒഴികെയുള്ള തദ്ദേശ സ്ഥാപനങ്ങളിൽനിന്ന്​ ഡമ്പിങ്​ യാർഡിൽ എത്തിച്ച മാലിന്യത്തിന്‍റെ അളവ്​ 55,015 കിലോ മാത്രമാണ്​. ജനസംഖ്യാനുപാതികമായി വിലയിരുത്തുമ്പോൾ പ്രതിദിനം 62814 കിലോ മാലിന്യം ഉൽപാദിപ്പിക്കപ്പെടുന്നു​ണ്ടെന്നാണ്​ കണക്ക്​. കൊച്ചി കോർപറേഷനിൽ നിന്ന്​ ഇതേ ദിനത്തിൽ എത്തിയത്​ 2.51 ലക്ഷം കിലോ മാലിന്യവുമാണ്​. കൃത്യമായ മാലിന്യ ശേഖരണം നടക്കാത്തതിനാൽ ബ്രഹ്​മപുരം മാലിന്യ സംസ്കരണ പ്ലാന്‍റിലേക്ക്​ സ്ഥിരതയില്ലാതെ മാലിന്യം എത്തുന്നതിന്​ കാരണമാകുന്നു. ജനസംഖ്യാനുപാതിമായി ഉൽപാദിപ്പിക്കപ്പെടുന്ന മാലിന്യത്തിന്‍റെ അളവും പ്രതിദിനം ശേഖരിക്കുന്നതിന്‍റെ അളവും തമ്മിൽ വൻതോതിൽ അന്തരമുണ്ടെന്ന്​ ചീഫ്​ എൻവയൺമെന്‍റൽ എൻജിനീയർ എം.എ. ബൈജു സമർപ്പിച്ച റിപ്പോർട്ടിൽ ചൂണ്ടിക്കാട്ടി. പ്രതിദിനം 6.6 മെട്രിക്​ ടൺ ജൈവ മാലിന്യം ഉൽപാദിപ്പിക്കപ്പെടുന്ന അങ്കമാലിയിൽനിന്ന്​ 370 കിലോ ഖരമാലിന്യം മാത്രമാണ്​ ബ്രഹ്​മപുരത്തേക്ക്​ എത്തിച്ചത്​. ആലുവയിൽനിന്ന്​ ഏഴ്​ മെട്രിക്​ ടൺ എത്തേണ്ടപ്പോൾ ലഭിച്ചത്​ 4.8 മെട്രിക്​ ടൺ മാത്രവും. പരിസ്ഥിതി നഷ്ടപരിഹാരം: മുനിസിപ്പാലിറ്റികൾക്ക്​ പിഴ കോടികൾ കൊച്ചി: മാലിന്യ ശേഖരണം കാര്യക്ഷമമാക്കാത്തതിനാൽ മലിനീകരണ നിയന്ത്രണ ബോർഡ്​ ജില്ലയിലെ നഗരസഭകൾക്ക്​ വിധിച്ചത്​ കൂറ്റൻ പരിസ്ഥിതി നഷ്ടപരിഹാര പിഴത്തുക. തൃപ്പൂണിത്തുറ മുനിസിപ്പാലിറ്റിക്ക്​ 3.78 കോടി, തൃക്കാക്കരക്ക്​ 4.11 കോടി, ആലുവക്ക്​ 2.12 കോടി എന്നിങ്ങനെയാണ്​ വിധിച്ചത്​. ഓരോ നഗരസഭയിൽനിന്നും ജനസംഖ്യാനുപാതികമായി ഉൽപാദിപ്പിക്കപ്പെടുന്ന മാലിന്യം ഡമ്പിങ്​ യാർഡിലേക്ക്​ എത്താത്തതിനാൽ വിശദീകരണം ചോദിച്ചിട്ടും മതിയായ കാരണം ബോധിപ്പിക്കാത്തതിനെ തുടർന്നാണ്​ നടപടി.