'അപകടരഹിത കൊച്ചി' നടപ്പാക്കാൻ ജി.സി.ഡി.എ

കൊച്ചി: നഗരത്തിലെ വാഹനാപകടങ്ങൾ കുറക്കാൻ 'അപകടരഹിത കൊച്ചി' പദ്ധതിയുമായി ഗ്രേറ്റർ കൊച്ചിൻ ഡെവലപ്​​മെന്‍റ്​ അതോറിറ്റി. ജി.സി.ഡി.എയെ കൂടാതെ കെ.എസ്.ടി.സി.ഇ - ദേശീയ ഗതാഗത ആസൂത്രണ ഗവേഷണ കേന്ദ്രം (നാറ്റ്പാക്), നാഷനൽ സേഫ്റ്റി കൗൺസിൽ കേരള ചാപ്റ്റർ, കൊച്ചിൻ ഷിപ്​യാർഡ്​, ബി.പി.സി.എൽ കൊച്ചി എന്നിവയു​ടെ സഹകരണത്തോടെയാണ്​ പദ്ധതി നടപ്പാക്കുന്നത്​. പദ്ധതി​ നടപ്പാകുന്നതിന്​ മുന്നോടിയായി 'സുസ്ഥിര കൊച്ചിക്കായി സുരക്ഷിതവും പൊതുവുമായ ഗതാഗത സംവിധാനം പ്രോത്സാഹിപ്പിക്കുക' വിഷയത്തിൽ ഈമാസം ഒമ്പതിന്​ പാലാരിവട്ടം റിനെ ഹോട്ടൽ ഓഡിറ്റോറിയത്തിൽ ശിൽപശാല സംഘടിപ്പിക്കും. മന്ത്രി എം.വി. ഗോവിന്ദൻ ഓൺലൈനായി പങ്കെടുക്കും. ഗതാഗത വകുപ്പ് പ്രിൻസിപ്പൽ സെക്രട്ടറി കെ.ആർ. ജ്യോതിലാൽ ശിൽപശാല ഉദ്ഘാടനം ചെയ്യുമെന്ന്​ ജി.സി.ഡി.എ ചെയർമാൻ കെ. ചന്ദ്രൻപിള്ള പറഞ്ഞു. സ്കൂളുകൾ, സന്നദ്ധ സംഘടനകൾ തുടങ്ങി സമൂഹത്തിന്‍റെ വിവിധ വിഭാഗങ്ങളിലുള്ളവരെ ഭാഗമാക്കി റോഡ്​ സുരക്ഷ അവബോധം സൃഷ്ടിക്കുമെന്ന്​ ജി.സി.ഡി.എ ചെയർമാൻ വ്യക്തമാക്കി. സംസ്ഥാനത്ത്​ ഏറ്റവും കൂടുതൽ വാഹനാപകടങ്ങൾ ഉണ്ടാവുന്ന നഗരമാണ്​ കൊച്ചിയെന്ന്​ നാറ്റ്​പാക്​ ഡയറക്ടർ ഡോ. സാംസൺ മാത്യു പറഞ്ഞു. 2100 പേരാണ് ഈ കാലയളവില്‍ ജില്ലയില്‍ റോഡപകടങ്ങളില്‍ മരിച്ചത്. 2021ല്‍ 1780 അപകടങ്ങളില്‍ 141 പേര്‍ മരിച്ചു. 1758 പേര്‍ക്ക് പരിക്കേറ്റു. അപകടങ്ങളിൽപെട്ട 61 ശതമാനം പേരും ഇരുചക്ര വാഹന ഡ്രൈവർമാരാണെന്നും നാറ്റ്പാക് കണ്ടെത്തിയിട്ടുണ്ട്. അതിനാൽ കൊച്ചി നഗരത്തിൽ പദ്ധതിയുടെ പ്രധാന്യം ഏറെയാണെന്ന്​​ ​ അദ്ദേഹം ചൂണ്ടിക്കാട്ടി. ജില്ലയിലുണ്ടായ 70 ശതമാനത്തിലധികം അപകടങ്ങളും സംഭവിച്ചത് ജങ്​ഷനുകളില്‍നിന്ന് അകലെയാണെന്നാണ് നാറ്റ്പാക് കണ്ടെത്തല്‍. 68 ശതമാനം അപകടങ്ങള്‍ മീഡിയന്‍ ഇല്ലാത്ത ഭാഗത്തും 67 ശതമാനം നേര്‍രേഖ റോഡ് ഭാഗത്തുമാണെന്നും അദ്ദേഹം വിശദീകരിച്ചു. വാര്‍ത്തസമ്മേളനത്തിൽ നാഷനല്‍ സേഫ്റ്റി കൗണ്‍സില്‍ കേരള ചാപ്റ്റര്‍ സെക്രട്ടറി ഡോ. വി.എം. രമേശ്, കെ.എസ്.ടി.സി.ഇ - ദേശീയ ഗതാഗത ആസൂത്രണ ഗവേഷണ കേന്ദ്രം ഡയറക്ടര്‍ ഡോ. സാംസണ്‍ മാത്യു, കൊച്ചിന്‍ ഷിപ്‌യാര്‍ഡ് എ.ജി.എം അബ്ദുല്‍ മനാഫ്, ബി.പി.സി.എല്‍ എക്‌സിക്യൂട്ടിവ് ഡയറക്ടര്‍ അജിത് കുമാര്‍, ജി.സി.ഡി.എ സെക്രട്ടറി അബ്ദുൽ മാലിക് തുടങ്ങിയവർ പങ്കെടുത്തു.