തെരുവുനായ് ഭീതിയിൽ അരൂർ

അരൂർ: റോഡുകളിലും ഇടവഴികളിലും തെരുവുനായ് ശല്യം തുടരുന്നു. പള്ളിത്തോട് വടക്കേക്കാട് കോളനിയിൽ നാലുപേർക്ക് കടിയേറ്റു. അലഞ്ഞുതിരിയുന്ന നായ്ക്കളുടെ ശല്യം രൂക്ഷമാകുകയാണ്. കൂട്ടമായി എത്തുന്ന ഇവ സ്കൂൾ കുട്ടികളെയും ആക്രമിക്കുന്നുണ്ട്.

പല പ്രദേശങ്ങളിലും വടിയും കല്ലും കരുതിയാണ് ജനങ്ങൾ സഞ്ചരിക്കുന്നത്. അരൂരിലും എഴുപുന്നയിലും കൂട്ടംകൂടി നിന്ന് ആക്രമണ സ്വഭാവം കാട്ടുന്നുണ്ട്. ഒരു മാസത്തിനുള്ളിൽ ഒട്ടേറെ പേർക്ക് കടിയേറ്റിട്ടും ഇവയുടെ ശല്യം ഒഴിവാക്കാൻ അധികൃതർ നടപടി സ്വീകരിക്കാത്തതിൽ പ്രതിഷേധം ശക്തമാണ്.