വഴിയടച്ച് കക്കൂസ്​ കുഴി നിർമിച്ചു, രാത്രി അസുഖം മൂർച്ഛിച്ചതോടെ വാഹന സൗകര്യമുള്ള റോഡിലേക്ക്​ എത്തിക്കാനായില്ല; വയോധിക ചികിത്സ കിട്ടാതെ മരിച്ചു

പാണ്ടിക്കാട് (മലപ്പുറം)​: വീട്ടിലേക്ക് വാഹനമെത്തിക്കാൻ സാധിക്കാത്തതിനാൽ ചികിത്സ ലഭിക്കാ​തെ വയോധിക മരിച്ചു. പാണ്ടിക്കാട് കൊടശ്ശേരിയിൽ ബുധനാഴ്ച രാത്രി ഒമ്പതോടെയാണ്​ സംഭവം. കൊടശ്ശേരി പാറയിൽ പരേതനായ അങ്ങാടി വീട്ടിൽ അയ്യപ്പന്റെ ഭാര്യ ചക്കിയാണ് (86) മരിച്ചത്.

വഴി കൈയേറി സ്വകാര്യവ്യക്തി കക്കൂസ്​ കുഴി നിർമിച്ചതിനാലാണ് ആശുപത്രിയിൽ കൊണ്ടുപോകാൻ വീട്ടുപടിക്കൽ വാഹനം എത്താതിരുന്നതെന്ന് ബന്ധുക്കൾ ആരോപിച്ചു. വാർധക്യസഹജമായ അസുഖങ്ങളെ തുടർന്ന്​ കിടപ്പിലായിരുന്നു. രാത്രി അസുഖം മൂർച്ഛിച്ചതോടെ ഗതാഗതസൗകര്യമുള്ള റോഡിലേക്ക്​ എത്തിക്കാനായില്ല. 60 വർഷം മുമ്പ്​ അങ്ങാടി വീട്ടിൽ സുകുമാര​ന്റെ പിതാവ് ചെങ്ങണംകുന്നിൽ അഞ്ച്​ സെൻറ്​ സ്ഥലം വാങ്ങുകയും വീട്ടിലേക്കുള്ള വഴി സ്ഥലമുടമ വാക്കാൽ നൽകുകയും ചെയ്​തിരുന്നു. പിന്നീട്, ഇവരുടെ സ്ഥലത്തിന് തൊട്ടടുത്തായി മറ്റൊരു കുടുംബവും വീട് വെച്ച് താമസമാരംഭിച്ചു.

ഈ രണ്ട് വീടുകളിലേക്കും എത്താൻ സ്ഥലമുടമ നൽകിയ ഏക വഴിയാണിത്​. ഇത്​ പൂർണമായടച്ച്​ കക്കൂസിന് കുഴി നിർമിച്ചതാണ് പ്രതിസന്ധിയായത്. ചക്കിയുടെ മകൻ സുകുമാരൻ പരാതി നൽകിയതി​െൻറ അടിസ്ഥാനത്തിൽ മുമ്പ്​ ചെമ്പ്രശ്ശേരി വില്ലേജ് ഓഫിസർ സ്ഥലം പരിശോധിച്ച്​ ഇവർക്ക് വഴി നൽകിയെങ്കിലും ഫലമുണ്ടായില്ല. സുകുമാരൻ പാണ്ടിക്കാട് പൊലീസിൽ പരാതി നൽകി. മൂന്നടി വഴിയെങ്കിലും രേഖാമൂലം നൽകണമെന്നതാണ് രണ്ട് കുടുംബങ്ങളുടെയും ആവശ്യം.

പ്രശ്​നത്തിന്​​ പരിഹാരം കാണാതെ മൃതദേഹം സംസ്​കരിക്കില്ലെന്ന്​ ബന്ധുക്കൾ തീരുമാനമെടുത്തതോടെ അധികൃതർ സ്​ഥലത്തെത്തി ചർച്ച നടത്തി. എ.ഡി.എം പ്രതിനിധിയായി തഹസിൽദാർ, ഡെ. തഹസിൽദാർമാർ, പൊലീസ്​ ഉദ്യോഗസ്​ഥർ, വാർഡംഗങ്ങളായ പി.ആർ. രോഹിൽനാഥ്​, പി. സലീൽ, എൻ.ടി. സുരേന്ദ്രൻ, അസ്​കർ മുക്കട്ട, ശങ്കരൻ കൊരമ്പയിൽ എന്നിവർ പ​െങ്കടുത്തു. ഭൂമി അളന്നുതിട്ടപ്പെടുത്തി വഴിയൊരുക്കാൻ തീരുമാനമായി. ഇതിനായി സമിതി രൂപവത്​കരിച്ചു. മൃതദേഹം ​വ്യാഴാഴ്​ച വൈകീട്ട്​ 6.30ഒാടെ കുടുംബ ശ്​മശാനത്തിൽ സംസ്​കരിച്ചു. ചക്കിയുടെ മക്കൾ: നാടി, സുകുമാരൻ, ബാലൻ, ലക്ഷ്മി.