കൊച്ചി: കൊച്ചി പാലാരിവട്ടം സംസ്കാര ജങ്ഷനില് നടുറോഡില് കത്തിയുമായി യുവാവിന്റെയും യുവതിയുടെയും പരാക്രമം. ബുധനാഴ്ച രാത്രി പന്ത്രണ്ടരയോടെയാണ് ഇവര് കത്തികാട്ടി നാട്ടുകാരെ ആക്രമിച്ചതും ഭീഷണിപ്പെടുത്തിയതും. തടയാനെത്തിയ പൊലീസിന്റെ വാഹനം ഇരുവരും ചേര്ന്ന് അടിച്ചു തകർക്കുകയും ചെയ്തു.
പരാക്രമം കാണിച്ച യുവാവിനെയും യുവതിയെയും പൊലീസ് അറസ്റ്റു ചെയ്തു. പാലാരിവട്ടം സ്വദേശി പ്രവീണും കോഴിക്കോട് സ്വദേശി റെസ്ലിനുമാണ് പിടിയിലായത്. ഇരുവരും മദ്യലഹരിയിലായിരുന്നെന്ന് പാലാരിവട്ടം പൊലീസ് പറഞ്ഞു. ഇവർ കൃത്യനിര്വഹണം തടസപ്പെടുത്തിയതായും പൊലീസ് ജീപ്പിന് കേടുപാടുകള് വരുത്തിയതായും പൊലീസ് പറഞ്ഞു.
രാത്രി പന്ത്രണ്ടരയോടെ സംസ്കാര ജങ്ഷന് സമീപത്തുവച്ച് പ്രവീണും റെസ്ലിനും ചേര്ന്ന് വഴിയാത്രക്കാരെ ആക്രമിക്കുകയും കത്തി കാണിച്ച് ഭീഷണിപ്പെടുത്തകയും ചെയ്തതറിഞ്ഞാണ് സ്ഥലത്തെത്തിയത്. വനിതാ പൊലീസ് ഉണ്ടെങ്കിലേ കസ്റ്റഡിയിലെടുക്കാനാവൂ എന്ന് പറഞ്ഞ് പെൺകുട്ടി പൊലീസുമായി തര്ക്കമാവുകയായിരുന്നു.
അതിനിടെ കൈയിലുണ്ടായിരുന്ന മൊബൈല് ഫോണ് കൊണ്ട് യുവതി പൊലീസ് വാഹനത്തിന്റെ ചില്ല് അടിച്ചു തകര്ക്കുകയായിരുന്നെന്ന് പൊലീസ് പറഞ്ഞു. ഭാരതീയ ന്യായ സംഹിതയിലെ വിവിധ വകുപ്പുകള് പ്രകാരമാണ് ഇരുവര്ക്കുമെതിരെ കേസ് എടുത്തതെന്ന് പൊലീസ് പറഞ്ഞു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.