'ഹനുമാനും സിനിമ നടനും പാക്​ ചാരനും പ്രധാനമന്ത്രിയുടെ കാർഷിക ധനസഹായം'; ഞെട്ടിക്കുന്ന അഴിമതിയുടെ വിവരങ്ങൾ പുറത്ത്​

ന്യൂഡൽഹി: ഹനുമാൻ ദേവനും ബോളിവുഡ്​ താരം റിതേഷ്​ ദേശ്മുഖും ഇന്ത്യയിൽനിന്ന്​ പുറത്താക്കപ്പെട്ട പാകിസ്​താൻ ചാരൻ മെഹ്​ബൂബ്​ രാജ്​പുതും സാമൂഹ്യ സുരക്ഷക്ക്​​ അർഹരായ ചെറുകിട കർഷകരാണ്​....! തലചൊറിയാൻ വര​െട്ട, ഇത്​ ആരും പിച്ചുംപേയും പറയുന്നതല്ല. കേന്ദ്രത്തി​െൻറ പി.എം കിസാൻ പദ്ധതിയുടെ രേഖകളിലാണ്​ ഇങ്ങനെയുള്ളത്​​. ഓരോരുത്തർക്കും യഥാക്രമം 6000, 4000, 2000 രൂപയുടെ ഡയറക്റ്റ് ബെനിഫിറ്റ് ട്രാൻസ്ഫർ (ഡിബിടി) തവണകളായി ലഭിച്ചിട്ടുമുണ്ട്​. 'ദ ക്വിൻറ്​' ആണ്​ ഞെട്ടിക്കുന്ന റിപ്പോർട്ട്​ പുറത്തുവിട്ടത്​.

തങ്ങൾക്ക് ന്യായമായി​ ലഭിക്കേണ്ട വരുമാനം കവരാൻ കുത്തകകളെ അനുവദിക്കുന്ന കാർഷിക നിയമങ്ങൾക്കെതിരെ രാജ്യത്ത്​ കർഷകർ പ്രക്ഷോഭം നടത്തുന്ന സമയത്താണ്​ ആൾമാറാട്ടത്തിലൂടെ ഇന്ത്യയിലെ ഏറ്റവും താഴെതട്ടിലുള്ള കർഷകർക്ക് വേണ്ടിയുള്ള ഫണ്ടുകളിലെ ക്രൂരമായ അഴിമതിയുടെ കഥ പുറത്തുവരുന്നത്​.

പി.എം കിസാൻ സമ്മാൻ നിധി അല്ലെങ്കിൽ പി.എം കിസാൻ പദ്ധതി കേന്ദ്ര സർക്കാറിന്​ കീഴിലുള്ളതാണ്​​. 100 ശതമാനവും സർക്കാർ ഫണ്ട്​ ചെയ്യുന്നതാണിത്​. 2018 ഡിസംബർ ഒന്ന്​ മുതാലാണ്​ ഇത്​ പ്രവർത്തനം ആരംഭിച്ചത്​. ഈ പദ്ധതി പ്രകാരം, മൂന്ന് തുല്യ ഗഡുക്കളായി പ്രതിവർഷം 6,000 രൂപ വരെ, രണ്ട് ഹെക്ടർ വരെ ഭൂമി കൈവശമുള്ള / ഉടമസ്ഥാവകാശം ഉള്ള ചെറുകിട കർഷക കുടുംബങ്ങൾക്ക്​ ലഭിക്കും.

ദ ക്വിൻറ്​​ ശേഖരിച്ച പേയ്​മെൻറ്​ റെക്കോർഡുകൾ അനുസരിച്ച്​ നേരത്തെ പറഞ്ഞ മൂന്നുപേരുടെയും പൊതുവായി ലഭ്യമായ ആധാർ നമ്പറുകളും ബാങ്ക്​ അക്കൗണ്ട്​ നമ്പറുകളും ഫോൺ നമ്പറുകളും ഭൂമിയുമായി ബന്ധപ്പെട്ട രേഖകളും ഉപയോഗിച്ച്​ പി.എം കിസാൻ പോർട്ടലിൽ സ്​കീമിനായി തട്ടിപ്പുകാർ വിജയകരമായി രജിസ്റ്റർ ചെയ്യുകയായിരുന്നു. ഇൗ വിവരങ്ങൾ ഒഫീഷ്യൽ പബ്ലിക്​ ഫിനാൻഷ്യൽ മാനേജ്​മെൻറ്​ സിസ്റ്റം (PFMS) സോഫ്​റ്റ്​വെയർ സ്വീകരിക്കുകയും ചെയ്​തു. അതിലൂടെ 2000 രൂപയുടെ മൂന്ന്​ തവണകളായി വർഷം 6000 രൂപ ലഭിക്കുകയും ചെയ്​തിട്ടുണ്ട്​.

വ്യാജ ആധാർ കാർഡുകൾ ഉണ്ടാക്കാനായി തട്ടിപ്പുകാർ റിതേഷ്​ ദേശ്മുഖ്, ഹനുമാൻ, മെഹ്ബൂബ് എന്നിവരുടെ ആധാർ നമ്പറുകൾ ഉപയോഗിച്ചു - എല്ലാം പബ്ലിക്​ ഡൊമൈനിൽ ലഭ്യവുമായിരുന്നു. ആധാർ കാർഡിലുള്ള പേരുമായി പൊരുത്തപ്പെടുന്ന രീതിയിൽ പുതിയ ബാങ്ക് അക്കൗണ്ടുകളും തുറന്നു. 2015ലായിരുന്നു ഹനുമാൻ ദേവ​െൻറ പേരിൽ സാധുവായ ഒരു ആധാർ നമ്പർ പുറത്തുവരുന്നത്​. ചാരപ്രവർത്തനങ്ങളുടെ പേരിൽ ഇന്ത്യയിൽനിന്നും പുറത്താക്കിയ പാകിസ്​താൻ ഹൈ​ക്കമ്മീഷൻ ഉദ്യോഗസ്ഥനായ മെഹബൂബ്​ അക്തറി​െൻറ ആധാർ 2016ൽ മെഹ്​ബൂബസ്​ രാജ്​പുത്​ എന്ന പേരിലും കണ്ടെത്തിയിരുന്നു.

10 കോടിയിലധികം ഗുണഭോക്താക്കൾ പി.എം കിസാൻ പദ്ധതിയിൽ രജിസ്​റ്റർ ചെയ്തിട്ടുണ്ടെന്നും തമിഴ്‌നാട്ടിൽ മാത്രം 5.5 ലക്ഷം യോഗ്യതയില്ലാത്ത ഗുണഭോക്താക്കളുണ്ടെന്നും ഡി.ബി.ടി പ്രോഗ്രാമുകൾ നിരീക്ഷിക്കുന്ന വിദഗ്ധർ ദി ക്വിൻറിനോട്​ പറഞ്ഞു. സർക്കാർ അന്വേഷണത്തിൽ ഇത്തരത്തിൽ ഖജനാവിന് 110 കോടി രൂപയുടെ നഷ്​ടമുണ്ടായതായും റിപ്പോർട്ടുണ്ട്​. അസമിലും സമാന രീതിയിലുള്ള അഴിമതി ശ്രദ്ധയിൽപെട്ടിട്ടുണ്ട്​.

സെപ്റ്റംബർ ഒമ്പതിന് കേന്ദ്രമന്ത്രി നരേന്ദ്ര സിങ്​ തോമർ ലോക്സഭയിൽ രാജ്യത്തൊട്ടാകെയുള്ള 10.21 കോടി ഗുണഭോക്താക്കൾക്ക് 94,119 കോടി രൂപ പദ്ധതിയിലൂടെ വിതരണം ചെയ്തുവെന്ന്​ അവകാശപ്പെട്ടിരുന്നു. യോഗ്യതയില്ലാത്ത വ്യക്​തികൾ അനായാസം സ്​കീമിനായി രജിസ്​റ്റർ ചെയ്യുകയും കൂടാതെ പണം സ്വന്തമാക്കുകയും ചെയ്യുന്നത്​ ആധാർ നമ്പറുകൾ പൊതുവായി ലഭ്യമാകുന്നതിലെ അപകടങ്ങളെ കുറിച്ചും സംസ്ഥാന-കേന്ദ്ര തലങ്ങളിലെ ഗുണഭോക്​താക്കളുടെ സ്ഥിരീകരണ സംവിധാനങ്ങളെ കുറിച്ചും കൂടാതെ ബാങ്കുകൾ ചെക്കുകൾ നൽകുന്നതുമായി ബന്ധപ്പെട്ടും ഗുരുതരമായ ചോദ്യങ്ങൾ ഉയർത്തുകയാണ്​.

'നിങ്ങൾക്ക് സാധുവായ ഒരു ആധാർ നമ്പറും ആധാറുമായി ബന്ധിപ്പിച്ചിട്ടുള്ള ഒരു ബാങ്ക് അക്കൗണ്ടും ഉണ്ടോയെന്ന്​ മാത്രമാണ്​ സ്കീം പരിശോധിക്കുന്നതെന്നും, അത് മാത്രം മതിയെന്നും' പൊതു വിതരണ പ്രോഗ്രാമുകൾ ട്രാക്കുചെയ്യുന്ന ഒരു വിദഗ്ദ്ധൻ ക്വിൻറിനോട്​ വിശദീകരിച്ചു.