ആന്‍റിബോഡി കോക്​ടെയിലിന്​ ഇന്ത്യയിൽ അനുമതി; സംഗതി ട്രംപ്​ ടെസ്റ്റ്​ ചെയ്​തത്​

ന്യൂഡൽഹി: സ്വിസ്​ ഫാർമസ്യൂട്ടിക്കൽ കമ്പനിയായ റോച്ചെ വികസിപ്പിച്ചെടുത്ത ആന്‍റിബോഡി കോക്​ടെയിലിന്​ സെൻട്രൽ ഡ്രഗ്​സ്​ സ്​റ്റാൻഡാർട്​സ്​ കൺട്രോൾ ഏജൻസിയുടെ അംഗീകാരം. കോവിഡ്​ ചികിത്സയിലിരിക്കേ അടിയന്തര ഘട്ടങ്ങളിൽ ഉപയോഗിക്കാനാണ്​ അംഗീകാരം നൽകിയത്​. മുൻ യു.എസ്​ പ്രസിഡന്‍റ്​ ഡോണൾഡ്​ ട്രംപ്​ രോഗബാധിതനായിരുന്ന വേളയിൽ ഈ പാനീയം കുടിച്ചിരുന്നു.

ആന്‍റിബോഡി കോക്​ടെയിൽ?

കാസിരിവിമാബ്, ഇംഡെവിമാബ് എന്നീ രണ്ട് ആന്‍റിബോഡികൾ ചേർത്താണ്​ ഈ കോക്ടെയ്ൽ നിർമിക്കുന്നത്​. ഉയർന്ന അപകടസാധ്യതയുള്ള കോവിഡ് രോഗികളുടെ ചികിത്സക്കാണിതിന്‍റെ ഉപയോഗം​.

വൈറസുകൾ പോലെയുള്ള അപകടകരമായ രോഗാണുക്കളെ പ്രതിരോധിക്കാനുള്ള രോഗപ്രതിരോധ സംവിധാനത്തിന്‍റെ സമാനമായ പ്രവർത്തനങ്ങളാണ്​ മോണോക്ലോണൽ ആന്‍റിബോഡികളായ കാസിരിവിമാബും ഇംഡെവിമാബും ചെയ്യുന്നത്​.

മനുഷ്യകോശങ്ങളിലേക്കുള്ള വൈറസിന്‍റെ പ്രവേശനം തടയുന്നതിനായാണ്​ ഇവ രൂപകൽപ്പന ചെയ്‌തിരിക്കുന്നത്​. SARS-CoV-2 ന്‍റെ സ്‌പൈക്ക് പ്രോട്ടീനെതിരെയാണ് കാകാസിരിവിമാബ്, ഇംഡെവിമാബ് പ്രത്യേകം നിർദ്ദേശിച്ചിരിക്കുന്നത്.

ആർക്കൊക്കെ ഉപയോഗിക്കാം?

രോഗം അതിരൂക്ഷമായി ബാധിക്കാനിടയുള്ള മുതിർന്നവരെയും കുട്ടികളെയും (12 അല്ലെങ്കിൽ അതിൽ കൂടുതൽ പ്രായമുള്ളവർ) ചികിത്സിക്കാനാണ് ഈ​ ആന്‍റിബോഡി കോക്​ടെയിൽ ഉപയോഗിക്കു​ന്നത്​. സംയോജിത ഡോസിൽ 1200 മില്ലിഗ്രാം (ഓരോ മരുന്നിന്‍റെയും 600 മില്ലിഗ്രാം) നൽകാനാണ്​ അംഗീകരം.

രണ്ട്​ ഡിഗ്രി സെൽഷ്യസ്​ മുതൽ എട്ട്​ ഡിഗ്രി സെൽഷ്യസിലാണ്​ ഇത്​ സൂക്ഷിക്കേണ്ടത്​. ഉയർന്ന അപകടസാധ്യതയുള്ള 60 വയസ്സിനു മുകളിലുള്ള രോഗികൾ, ഹൃദയ സംബന്ധമായ അസുഖങ്ങളുള്ളവർ, ശ്വാസകോശ സംബന്ധിയായ രോഗങ്ങൾ, വൃക്കരോഗം, പ്രമേഹം തുടങ്ങിയ ആരോഗ്യ പ്രശ്​നങ്ങൾ ഉള്ളവർക്കും ഇത്​ ഉപയോഗിക്കാം.

എത്രത്തോളം ഫലപ്രദമാണിത്​?

ആശുപത്രിയിൽ പ്രവേശിപ്പിക്കാത്ത ഉയർന്ന അപകട സാധ്യതയുള്ള 4567 രോഗികളിലാണ്​ 'റോച്ചെ' കോക്​ടെയിലിന്‍റെ നാലാം ഘട്ട പരീക്ഷണം നടത്തിയത്​. മരണ സാധ്യതയും ആശുപത്രി വാസവും 70 ശതമാനം കുറക്കാൻ സാധിച്ചതായി കണ്ടെത്തി. ആന്‍റിബോഡികൾ രോഗലക്ഷണങ്ങളുടെ ദൈർഘ്യം നാല് ദിവസമായി കുറച്ചു.

വില എത്ര വരും?

സിപ്ല ലിമിറ്റഡുമായി സഹകരിച്ചാണ്​ റോച്ചെ മരുന്ന്​ ഇന്ത്യയിൽ ഇറക്കുമതി ചെയ്യുന്നത്​. സിപ്ലയുമായി കൂടിയാലോചിച്ച ശേഷം കോക്​ടെയിലിന്‍റെ വിലയും മറ്റ്​ വിവരങ്ങളും പുറത്തുവിടുമെന്ന്​ റോച്ചെ ഫാർമ ഇന്ത്യ എം.ഡി വി. സിംപ്സൺ ഇമ്മാനുവേൽ പറഞ്ഞു.

എവിടെയെല്ലാം ഇത്​ ഉപയോഗത്തിലുണ്ട്​?

യൂറോപ്യൻ യൂനിയനും യു.എസും ആന്‍റിബോഡി കോക്​ടെയിലിന്​ അംഗീകാരം നൽകിയിട്ടുണ്ട്​.