ആറ്​ ദിവസത്തിനുള്ളിൽ കോവിഡ്​ ബാധിച്ച്​ മരിച്ചത്​ ഡൽഹി സർവകലാശാലയിലെ അഞ്ച്​ അധ്യാപകർ

ന്യൂഡൽഹി: കഴിഞ്ഞ ആറ്​ ദിവസത്തിനകം അഞ്ച്​ അധ്യാപകർ കോവിഡ്​ ബാധിച്ച്​ മരിച്ചതിന്‍റെ ഞെട്ടലിലാണ്​ ഡൽഹി സർവകലാശാലയിലെ വിദ്യാർഥികളും ജീവനക്കാരും. 33 വയസുള്ള താത്​ക്കാലിക അധ്യാപകനും പഠന വിഭാഗം മേധാവിയും മരിച്ചവരിൽ ഉൾപ്പെട്ടിട്ടു​ണ്ട്​.

ഏതാനും ദിവസങ്ങൾക്ക്​ മുമ്പ്​ എം.ഫിൽ ഗവേഷണ പ്രബന്ധം സമർപ്പിച്ച 24 വയസുള്ള ഗവേഷക വിദ്യാർഥി ശനിയാഴ്​ച കോവിഡ്​ ബാധിച്ച്​ മരിച്ചിരുന്നു. കഴിഞ്ഞ മാർച്ച്​ മുതൽ ഡൽഹി സർവകലാശാലയിൽ 33 അധ്യാപകർ കോവിഡ്​ ബാധിച്ച്​ മരിച്ചതായി ഡൽഹി യൂനിവേഴ്​സിറ്റി ടീച്ചേഴ്​സ്​ അസോസിയേഷൻ(ഡി.യു.ടി.എ) പറയുന്നു.

പൊളിട്ടിക്കൽ സയൻസ്​ വിഭാഗം മേധാവി പ്രഫ. വീണ കുൽക്രെജയും(64) മരിച്ചവരിൽപെടുന്നു. മരിച്ചവരിൽ രണ്ടുപേർ ദേശബന്ധു കോളജുമായും രണ്ടു പേർ ദൗലറ്റ്​ കോളജുമായും ബന്ധപ്പെട്ട്​ പ്രവർത്തിക്കുന്നവരാണ്​.