ഛാത്രയിൽ പെൺകുട്ടിയെ ചുട്ടുകൊന്ന സംഭവം: 16 പേർ അറസ്​റ്റിൽ

റാഞ്ചി: ​ഝാർഖണ്ഡിലെ ഛാത്രയിൽ 16 വയസുകാരിയെ ബലാൽസംഗം ചെയ്​ത്​ തീകൊളുത്തി ​കൊന്ന കേസിൽ 16 പേർ അറസ്​റ്റിൽ. ഝാർഖണ്ഡ്​ പൊലീസാണ്​ ഇവരെ അറസ്​റ്റ്​ ചെയ്​തത്​. ആറ്​ പ്രതികൾക്കായി തെരച്ചിൽ തുടരുന്നുവെന്നും പൊലീസ്​ വ്യക്​തമാക്കിയിട്ടുണ്ട്​.

 വെള്ളിയാഴ്​ചയാണ്​ ഛാത്രയിൽ 16കാരിയെ ബലാത്സംഗം ചെയ്​ത ശേഷം കുടുംബത്തിനു ​മുന്നിലിട്ട്​ ചുട്ടുകൊന്നത്​. കഴിഞ്ഞ ദിവസം കുടുംബം വിവാഹത്തിനു പോയ സമയത്ത്​ നാലു യുവാക്കൾ വീടിനകത്തുകയറി പെൺകുട്ടിയെ തട്ടിക്കൊണ്ടുപോയ ശേഷം കൂട്ട മാനഭംഗത്തിനിരയാക്കുകയായിരുന്നു.

വെള്ളിയാഴ്​ച ചേർന്ന ഗ്രാമസഭയിൽ വിഷയം ചർച്ചക്കു വന്നതോടെ അരലക്ഷം രൂപ കുടുംബത്തിന്​ നൽകി വിഷയം ഒത്തുതീർക്കാൻ തീരുമാനമായി. ഇതിനു പിന്നാലെയാണ്​ യുവാക്കൾ വീട്ടിലെത്തി പെൺകുട്ടിയെ പുറത്തുവലിച്ചിട്ട്​ വീട്ടുകാർക്ക്​ മുന്നിൽ തീകൊളുത്തി കൊന്നത്.