'ടാറ്റ സിയേറ'യുടെ ഉയർന്ന വേരിയന്റിന്റെ വില പ്രഖ്യാപിച്ചു

ടാറ്റ മോട്ടോർസ് പാസഞ്ചർ വാഹനനിരയിൽ നവംബർ മാസത്തിൽ വിപണിയിൽ എത്തിച്ച സിയേറ എസ്.യു.വിയുടെ ടോപ്-എൻഡ് വകഭേദത്തിന്റെ വില പ്രഖ്യാപിച്ചു. സ്മാർട്ട്+, പ്യുവർ, പ്യുവർ+, അഡ്വഞ്ചർ, അഡ്വഞ്ചർ+, അക്കംബ്ലിഷ്ഡ്, അക്കംബ്ലിഷ്ഡ്+ എന്നിങ്ങനെ ഏഴ് വകഭേദങ്ങളിൽ വിപണിയിൽ എത്തുന്ന അക്കംബ്ലിഷ്ഡ്+ എന്ന ടോപ്-എൻഡ് വകഭേദത്തിന്റെ എക്സ് ഷോറൂം വിലയാണ് ടാറ്റ പുറത്തുവിട്ടത്. 21.29 ലക്ഷം രൂപയാണ് ടാറ്റ സിയേറ അക്കംബ്ലിഷ്ഡ്+ വകഭേദത്തിന്റെ എക്സ് ഷോറൂം വില. മോഡലിന്റെ ബുക്കിങ് ഡിസംബർ 16ന് ആരംഭിക്കും. തുടർന്ന് ജനുവരി 15 മുതൽ ഉപഭോക്താക്കൾക്ക് വാഹനം ലഭ്യമാക്കാൻ സാധിക്കുമെന്നും കമ്പനി അറിയിച്ചു.

മൂന്ന് പവർട്രെയിൻ ഓപ്ഷനിലാണ് ടാറ്റ സിയേറ ഇന്ത്യൻ നിരത്തുകളിൽ എത്തുന്നത്. 1.5-ലിറ്റർ നാച്ചുറലി അസ്പിറേറ്റഡ് എൻജിൻ 106 എച്ച്.പി കരുത്ത് ഉത്പാദിപ്പിക്കും. അതേസമയം 1.5-ലിറ്റർ ഡീസൽ എൻജിൻ 116 എച്ച്.പി കരുത്ത് പകരുമ്പോൾ 1.5-ലിറ്റർ ടർബോ-പെട്രോൾ 160 എച്ച്.പി കരുത്ത് ഉത്പാദിപ്പിച്ച് വാഹനത്തെ കൂടുതൽ വേഗതയിൽ ചലിപ്പിക്കും.

അക്കംബ്ലിഷ്ഡ് വകഭേദം 17.99 ലക്ഷം രൂപ എക്സ് ഷോറൂം വിലയിലാണ് ആരംഭിക്കുന്നത്. ഈ മോഡൽ 1.5-ലിറ്റർ നാച്ചുറലി അസ്പിറേറ്റഡ് പെട്രോൾ എൻജിൻ, മാനുവൽ ട്രാൻസ്മിഷനിലാണ് ലഭിക്കുക. കൂടാതെ 1.5-ലിറ്റർ ടർബോ പെട്രോൾ ഓട്ടോമാറ്റിക് ട്രാൻസ്മിഷൻ, 1.5-ലിറ്റർ ഡീസൽ മാനുവൽ ട്രാൻസ്മിഷൻ, 1.5-ലിറ്റർ ഡീസൽ ഓട്ടോമാറ്റിക് ട്രാൻസ്മിഷൻ പവർട്രെയിനുകളും അക്കംബ്ലിഷ്ഡ് വകഭേദത്തിന് ലഭിക്കും. എന്നാൽ അക്കംബ്ലിഷ്ഡ് പ്ലസിൽ 1.5-ലിറ്റർ ടർബോ പെട്രോൾ എൻജിൻ ഓട്ടോമാറ്റിക് ട്രാൻസ്മിഷനുമായി ജോഡിയാക്കിയിരിക്കുന്നു. ഇതോടൊപ്പം 1.5-ലിറ്റർ ഡീസൽ എം.ടി, 1.5-ലിറ്റർ ഡീസൽ എ.ടിയും അക്കംബ്ലിഷ്ഡ്+ മോഡലിന് ലഭിക്കുന്നുണ്ട്.

ഉയർന്ന വകഭേദത്തിലെത്തുന്ന അക്കംബ്ലിഷ്ഡ്+ മോഡലിലും ഏറ്റവും അഡ്വാൻസ്ഡ് ഫീച്ചറുകൾ ടാറ്റ ഉൾപ്പെടുത്തിയിട്ടുണ്ട്. ലെവൽ 2 ADAS, ജെ.ബി.എൽ സൗണ്ട് സിസ്റ്റത്തിൽ 12 സ്‌പീക്കറുകൾ, മെമ്മറി ഫങ്ഷനോട് കൂടിയ പവേർഡ് ഡ്രൈവർ സീറ്റ്, പവേർഡ് ടൈൽഗേറ്റ്, ഹെഡ്-അപ് ഡിസ്പ്ലേ, ഐ.ആർ.എ കണക്ടഡ് കാർ ടെക്നോളജി തുടങ്ങിയ ഫീച്ചറുകൾ അക്കംബ്ലിഷ്ഡ്+ വേരിയന്റിന്റെ പ്രത്യേകതയാണ്. പ്രീമിയം എസ്.യു.വി സെഗ്‌മെന്റിൽ ഇന്ത്യൻ വിപണിയിലെത്തുന്ന ടാറ്റ സിയേറ, ഹ്യൂണ്ടായ് ക്രെറ്റ, കിയ സെൽത്തോസ്‌, മാരുതി സുസുകി വിക്ടോറിസ്, സ്കോഡ കുഷാഖ്, ടൊയോട്ട ഹൈറൈഡർ തുടങ്ങിയ മോഡലുകൾക്ക് കടുത്ത വെല്ലുവിളി സമ്മാനിക്കുന്നു.