കെടുതികൾ ഒഴിഞ്ഞു; രാജ്യം സാധാരണ നിലയിലേക്ക്

ദുബൈ: രാജ്യത്തെ മഴക്കെടുതി ബാധിച്ച മേഖലകൾ പൂർണമായും സാധാരണ നിലയിലേക്ക്​. ദുബൈ, ഷാർജ, അജ്​മാൻ തുടങ്ങി എല്ലാ എമിറേറ്റുകളിലെയും വെള്ളക്കെട്ടുകൾ ബഹുഭൂരിപക്ഷവും നീക്കം ചെയ്യുകയും ഗതാഗതം പുനഃസ്ഥാപിക്കുകയും ചെയ്തിട്ടുണ്ട്​.

ചിലയിടങ്ങളിൽ ഇപ്പോൾ നിലവിലുള്ള വെള്ളക്കെട്ടുകൾ ഗതാഗതത്തെ വലിയ രീതിയിൽ തടസ്സപ്പെടുത്തുന്നതല്ല. ഈ വെള്ളക്കെട്ടുകളും അതിവേഗം ഒഴിവാക്കാൻ ശക്​തമായ നടപടികൾ സ്വീകരിച്ചുവരുകയാണ് അധികൃതർ. ആരോഗ്യ രംഗത്തും വലിയ വെല്ലുവിളികൾ നേരിടുന്നില്ല. സർക്കാർ സംവിധാനങ്ങളും സ്വകാര്യ സ്ഥാപനങ്ങളും സഹകരിച്ച്​ അടിയന്തര ചികിത്സക്കും പരിശോധനക്കും വേണ്ട സംവിധാനങ്ങൾ ഒരുക്കിയിട്ടുണ്ട്​. സ്കൂളുകൾ മിക്കതും സാധാരണ നിലയിലായി തുടങ്ങിയിട്ടുണ്ട്​. എന്നാൽ, ചില സ്കൂളുകളിൽ ഓൺലൈൻ പഠനം തുടരുന്നുമുണ്ട്​.

ദുരിത ബാധിതരെ സഹായിക്കാൻ സർക്കാർ പുതിയ സംവിധാനങ്ങൾ ഏർപ്പെടുത്തിയിട്ടുണ്ട്​. നഷ്ടം വിലയിരുത്തി പുനരധിവാസം ഉറപ്പാക്കാൻ അപേക്ഷ സ്വീകരിക്കാനും സഹായം സമാഹരിക്കാനും ദുബൈയിലും ഷാർജയിലും സംവിധാനങ്ങൾ പ്രഖ്യാപിച്ചിരുന്നു. കനത്ത മഴമൂലമുണ്ടായ നാശനഷ്ടങ്ങൾ വിലയിരുത്തുകയും ഭാവിയിൽ അവ ഒഴിവാക്കുന്നതിനുള്ള പദ്ധതികൾ വികസിപ്പിക്കുകയും ചെയ്യുക, ദുരിതബാധിതരെ അവരുടെ വീടുകളിലേക്ക് തിരികെ കൊണ്ടുവരുന്നതിന്​ നടപടി സ്വീകരിക്കുക എന്നിങ്ങനെ രണ്ട്​ ഘട്ടങ്ങളിലായി പ്രവർത്തനങ്ങൾ തുടരാനാണ്​ അധികൃതർ തീരുമാനിച്ചിട്ടുള്ളത്​.

ഷാർജയിലെ വിവിധ ഭാഗങ്ങളിൽ വെള്ളക്കെട്ട് ഒഴിവാക്കാൻ മുനിസിപ്പാലിറ്റിയുടെ ഊർജിത പ്രവർത്തനങ്ങൾ അതിവേഗം പുരോഗമിക്കുകയാണ്. വെള്ളം വലിച്ചെടുക്കാൻ ട്രക്കുകളും മറ്റു സംവിധാനങ്ങളും കൂടുതലായി തന്നെ എത്തിയിട്ടുണ്ട്​. വെള്ളക്കെട്ട് ബാധിത മേഖലകളിൽ സഹായം ആവശ്യമുള്ളവർക്ക് സമീപിക്കാൻ സർക്കാറിന്റെ മേൽനോട്ടത്തിൽ പോയന്റുകൾ ഏർപ്പെടുത്തിയിട്ടുണ്ട്. അടിയന്തര സഹായം ആവശ്യമുള്ള കുടുംബങ്ങൾക്ക് 065015161 എന്ന വാട്സ്ആപ് നമ്പറിൽ ബന്ധപ്പെടാമെന്ന് ഷാർജ സർക്കാർ നേരത്തെ അറിയിച്ചിരുന്നു.