ഷാർജ: എമിറേറ്റിലെ സുസ്ഥിര വികസനത്തിന് പ്രാമുഖ്യം നൽകുന്ന പദ്ധതികളുടെ വിപുലമായ പ്രദർശനങ്ങളുമായി ഷാർജ റിയൽ എസ്റ്റേറ്റ് ഇൻവെസ്റ്റ്മെന്റ് എക്സിബിഷന്(ഏക്കർസ് 2023) തുടക്കം. ഷാർജ എക്സ്പോ സെൻററിൽ വ്യാഴാഴ്ച നടന്ന ചടങ്ങിൽ ഷാർജ ജില്ലാ, ഗ്രാമീണകാര്യ വകുപ്പ് മേധാവി ശൈഖ് മാജിദ് ബിൻ സുൽത്താൻ അൽ ഖാസിമി എക്സിബിഷൻ ഉദ്ഘാടനം ചെയ്തു. ഷാർജ കിരീടാവകാശിയും ഡെപ്യൂട്ടി ഭരണാധികാരിയുമായ ശൈഖ് സുൽത്താൻ ബിൻ മുഹമ്മദ് ബിൻ സുൽത്താൻ അൽ ഖാസിമിയുടെ മുഖ്യരാക്ഷാകർതൃത്വത്തിലാണ് പ്രദർശനം സംഘടിപ്പിക്കുന്നത്.
റിയൽ എസ്റ്റേറ്റ് മേഖലയിലെ പ്രമുഖ സ്ഥാപനങ്ങൾ അണിനിരക്കുന്ന മേള ഷാർജ ചേംബർ ഓഫ് കെോമേഴ്സ് ആൻഡ് ഇൻഡസ്ട്രിയും ഷാർജ റിയൽഎസ്റ്റേറ്റ് രജിസ്ട്രേഷൻ വകുപ്പും സംയുക്തമായാണ് ഒരുക്കിയത്. യു.എ.ഇക്ക് അകത്തും പുറത്തുമുള്ള വിവിധ റിയൽ എസ്റ്റേറ്റ് കമ്പനികൾ പുതിയ പദ്ധതികൾ മേളയിൽ പരിചയപ്പെടുത്തുന്നുണ്ട്. റിയൽ എസ്റ്റേറ്റ് ബ്രോക്കർമാർ, സാമ്പത്തിക സ്ഥാപനങ്ങൾ, നിർമാണക്കമ്പനികൾ, റിയൽ എസ്റ്റേറ്റ് ഏജന്റ്സ്, പ്രൊജക്ട് മാനേജ്മെന്റ് സർവീസ് കമ്പനികൾ, റിയൽ എസ്റ്റേറ്റ് ഉടമകൾ, എൻജിനീയറിങ് സർവീസ് കമ്പനികൾ എന്നിവർ എക്സിബിഷനിൽ പങ്കെടുക്കുന്നുണ്ട്.
ഇതിന് പുറമെ വിവിധ സർക്കാർ സ്ഥാപനങ്ങളും വകുപ്പുകളും പ്രദർശനങ്ങൾ ഒരുക്കിയിട്ടുണ്ട്. ഷാർജ ചേംബർ ഓഫ് കൊമേഴ്സ് ചെയർമാൻ അബ്ദുല്ല സുൽത്താൻ അൽ ഉവൈസ്, ഷാർജ റിയൽഎസ്റ്റേറ്റ് രജിസ്ട്രേഷൻ വകുപ്പ് ഡയറക്ടർ ജനറൽ അബ്ദുൽ അസീസ് അൽ ശംസി, എക്സപോ സെന്റർ സി.ഇ.ഒ സെയ്ഫ് മുഹമ്മദ് അൽ മിദ്ഫ തുടങ്ങിയ പ്രമുഖരും ചടങ്ങിൽ സംബന്ധിച്ചു. ഞയറാഴ്ച മേള സമാപിക്കും.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.