അബൂദബി കാർഷിക ഭക്ഷ്യസുരക്ഷ വകുപ്പുമായി കൈകോർത്ത് ലുലു ​ഗ്രൂപ്

അബൂദബി: മികച്ച ജീവിതശൈലിക്കും ഭക്ഷണരീതികൾക്കും പ്രോത്സാഹനമേകുന്ന അബൂദബി കാർഷിക ഭക്ഷ്യസുരക്ഷാ വകുപ്പിന്റെ പദ്ധതിക്ക് പിന്തുണയുമായി ലുലു. അബൂദബി കാർഷിക ഭക്ഷ്യസുരക്ഷാ വകുപ്പുമായി കൈകോർത്ത് ലുലു സ്റ്റോറുകളിൽ ‘ഹെൽത്തി ഫുഡ് ലൈഫ്സ്റ്റൈൽ’ കാമ്പയിന്​ തുടക്കമായി. ലുലു ​ഗ്രൂപ്പ് ചെയർമാൻ എം.എ യൂസുഫലിയുടെ സാന്നിധ്യത്തിൽ അബൂദബി കാർഷിക ഭക്ഷ്യസുരക്ഷാ വകുപ്പ് ആക്ടിങ്​ ഡയറക്ടർ ജനറൽ താരിഖ് അഹമ്മദ് അൽ അമീരി കാമ്പയിൻ ലോഞ്ച് ചെയ്തു. അബൂദബി കാർഷിക ഭക്ഷ്യസുരക്ഷാ വകുപ്പ് റെ​ഗുലേറ്ററി അഡ്മിനിസ്ട്രേറ്റീവ് അഫേഴ്സ് ഡെപ്യൂട്ടി ഡയറക്ടർ ജനറൽ മൗസ സുഹൈൽ അൽ മുഹൈരി, ഹെൽത്തി ലിവിങ് സെക്ടർ എക്സി. ഡയറക്ടർ ഡോ. അഹമ്മദ് അൽ ഖസ്​റജി, അബൂദബി കാർഷിക ഭക്ഷ്യസുരക്ഷാ വകുപ്പ് പ്രൊജക്ട് ഹെഡ് ഹസൻ മുഹമ്മദ് അൽ മർസൂഖി എന്നിവരും പ​ങ്കെടുത്തു.

യു.എ.ഇയിലെ 1200 ലേറെ അറബ് വനിതകൾക്കായി, അബൂദബി കാർഷിക ഭക്ഷ്യസുരക്ഷാ വകുപ്പ് ഏർപ്പെടുത്തിയ ഷോപ്പിങ് വൗച്ചറുകൾ ഉപയോഗിച്ച്​ ലുലു സ്റ്റോറുകളിൽ നിന്ന് പഴം, പച്ചക്കറികൾ വാങ്ങാനാകും. ഇരുപത് ആഴ്ച വരെ ഈ വൗച്ചറുകൾ ഉപയോ​ഗിച്ച് ഷോപ്പ് ചെയ്യാം. വീടുകളിലെ ഭക്ഷണരീതികൾ നിർണയിക്കുന്നതിൽ സ്​ത്രീകൾ പ്രധാന പങ്ക് വഹിക്കുന്നുവെന്ന് വിലയിരുത്തിയാണ് പദ്ധതി. കുടുംബങ്ങളിൽ മികച്ച ആരോ​ഗ്യശൈലിയും ഭക്ഷണരീതിയും പ്രോത്സാഹിപ്പിക്കുന്നതിനായാണ് ഈ നീക്കം. സർക്കാർ-സ്വകാര്യ പങ്കാളിത്വത്തോടെയുള്ള മികച്ച പദ്ധതിയാണ് യാഥാർഥ്യമായിരിക്കുന്നതെന്നും യു.എ.ഇ ജനതയുടെ മികച്ച ജീവിതശൈലിക്ക് ഏറ്റവും നല്ല പിന്തുണയാണ് ലുലു നൽകുന്നതെന്നും ഹസൻ മുഹമ്മദ് അൽ മർസൂഖി പറഞ്ഞു.

മികച്ച ആരോ​ഗ്യത്തിന് പിന്തുണയേകുന്ന സർക്കാർ പദ്ധതികൾക്ക് ഏല്ലാവിധ പിന്തുണയും ലുലു നൽകുമെന്നും, ലുലു സ്റ്റോറുകളിൽ പദ്ധതി നടപ്പാക്കാനായതിൽ ഏറെ സന്തോഷമുണ്ടെന്നും ലുലു ​ഗ്രൂപ്പ് ചെയർമാൻ എം.എ യൂസുഫലി വ്യക്തമാക്കി. യു.എ.ഇയിൽ ഭക്ഷ്യോത്പന്നങ്ങളുടെ ലഭ്യതയും വിലസ്ഥിരതയുമാണ് ലുലു നൽകുന്നതെന്നും, 110ലേറെ ചാർട്ടേഡ് വിമാനങ്ങളിലായി കൃത്യമായ ലഭ്യതയാണ് ഉറപ്പാക്കിയതെന്നും വരും ആഴ്ചകളിലും ഇത് തുടരുമെന്നും എം.എ യൂസുഫലി കൂട്ടിച്ചേർത്തു. ലുലു ​ചീഫ് ഓപ്പറേറ്റിങ്ങ് ആൻഡ് സ്ട്രാറ്റജി ഓഫീസർ സലിം വി.ഐ, പ്രൊജ്ക്ട് ഡവലപ്​മെന്റ്സ് ഡയറക്ടർ അബൂബക്കർ ടി.പി, മാർക്കറ്റിങ് ആൻഡ് കമ്മ്യൂണിക്കേഷൻസ് ഡയറക്ട‌ർ വി. നന്ദകുമാർ തുടങ്ങിയവരും ചടങ്ങിൽ പങ്കെടുത്തു.