വാക്​സിൻ വിഡിയോയിൽ നാസിനൊപ്പം; കോവിഡ്​ ഹീറോയായി വസീം അഹ്​മദ്​

ദുബൈ: കോവിഡിനെ ചെറുക്കുവാനുള്ള വാക്​സിൻ കണ്ടെത്തുവാനുള്ള നിതാന്ത പരി​​ശ്രമത്തിലാണ്​ ലോകം. കോവിഡ്​ പ്രതിസന്ധിയെ ഏറ്റവും ധീരവും മാനവികവുമായി നേരിടുകയും മറികടക്കുകയും ചെയ്​ത യു.എ.ഇയിൽ 15,000 ​പേരാണ്​ തങ്ങളുടെ ശരീരത്തിൽ വാക്​സിൻ പരീക്ഷിക്കുവാൻ സന്നദ്ധത അറിയിച്ച്​ മുന്നോട്ടുവന്നത്​. മനുഷ്യരാശിയുടെ ചരിത്രത്തിലെ നാഴികകല്ലായി മാറിയേക്കാവുന്ന ഇൗ പരിശ്രമത്തിൽ പങ്കുചേർന്നവരിൽ ഗണ്യമായ എണ്ണമുണ്ട്​ മലയാളികൾ എന്നത്​ അഭിമാനകരം. ഏതെങ്കിലും തരത്തിലെ വ്യക്​തിപരമായ നേട്ടങ്ങളോ ലാഭമോ പ്രതീക്ഷിച്ചല്ല ഇവരിൽ ഒരാളും പരീക്ഷണത്തിനായി സ്വന്തം ശരീരം ഉപയോഗിക്കാൻ സമ്മതിച്ചത്​.

സ്വന്തം പിതാവിനോടു പോലും പറയാതെ അതീവ രഹസ്യമായി വാക്​സിൻ പരീക്ഷണത്തിന്​ പോയതാണ്​ കണ്ണൂർ പഴങ്ങാടി സ്വദേശിയും ബിസിനസുകാരനുമായ വസീം അഹ്​മദ്​. എന്നാൽ വസീം കോവിഡ്​ വാക്​സിൻ യജ്​ഞത്തിൽ പങ്കാളിയായ വിവരം ഇപ്പോൾ നാട്ടിലാകെ പാട്ടായിരിക്കുന്നു. ലോക പ്രശസ്​ത വ്ലോഗറും സമൂഹ മാധ്യമങ്ങളിലെ മെഗാസ്​റ്റാറുമായ നാസ്​ തയ്യാറാക്കുന്ന നാസ്​വീക്ക്​ലി വിഡിയോയിൽ പ്രത്യക്ഷപ്പെട്ടതോടെയാണ്​ വസീമി​െൻറ വാക്​സിനേഷൻ വിശേഷം അടുത്ത സുഹൃത്തുക്കൾ പോലുമറിയുന്നത്​.

അബൂദബി ആരോഗ്യ അതോറിറ്റിയുടെയും മീഡിയാ ഒാഫിസി​െൻറയും ട്വീറ്റുകൾ നിരന്തരമായി ഫോളോ ചെയ്യുന്ന വസീം വാക്​സിൻ പരീക്ഷണത്തിന്​ വേണ്ടി സന്നദ്ധ പ്രവർത്തകരെ ക്ഷണിക്കുന്ന വിവരം അറിഞ്ഞയുടൻ പേര്​ രജിസ്​റ്റർ ചെയ്​തിരുന്നു.

കോവിഡ്​ പ്രതിസന്ധി സൃഷ്​ടിച്ച കുഴപ്പങ്ങളും പ്രയാസങ്ങളും നേരിൽ കണ്ടനുഭവിച്ച ഒരാൾ എന്ന നിലയിൽ ഇൗ ദുരിതാവസ്​ഥയിൽ നിന്ന്​ ജനങ്ങളെ കരകയറ്റാനുള്ള ദൗത്യത്തിന്​ ത​െൻറ പങ്ക്​ നിർവഹിക്കണം എന്ന്​ ഉറച്ചു തീരുമാനിച്ചതാണ്​. ഉപ്പയോടും കൂട്ടുകാരോടുമെല്ലാം ചർച്ച ചെയ്​താൽ ഒരുപ​േക്ഷ ഒരുപാട്​ അഭിപ്രായങ്ങൾ വന്നാലോ എന്നാലോചിച്ച്​ അത്​ വേണ്ടെന്നു വെച്ചു.

ആരോഗ്യവകുപ്പിൽ നിന്ന്​ വിളിച്ച്​ ശരിക്കും സമ്മതമാണോ എന്നന്വേഷിച്ചപ്പോൾ തിരിച്ചു ചോദിച്ചത്​ ഒന്നു മാത്രം. ഞാനീ പരീക്ഷണത്തിൽ വിധേയനാകുന്നതു മൂലം കുഞ്ഞിനോ കുടുംബാംഗങ്ങൾക്കോ എന്തെങ്കിലും പ്രയാസങ്ങളുണ്ടാകുമോ എന്ന കാര്യം മാത്രം. അതില്ലെന്ന്​ ഡോക്​ടർ വിശദമാക്കി കൊടുത്തതോടെ പിന്നെ ആലോചിക്കാനേ നിന്നില്ല.

വാക്​സിൻ എടുത്ത ശേഷം അടുത്ത കൂട്ടുകാരോട്​ വിവരം പറഞ്ഞിരുന്നു. നടപടിക്രമങ്ങൾ ചോദിച്ചറിഞ്ഞ്​ അവരും അവരുടെ സുഹൃത്തുക്കളുമെല്ലാം സന്നദ്ധത അറിയിച്ച്​ രജിസ്​റ്റർ ചെയ്​തു. ഫേസ്​ബുക്കിലും ഇൻസ്​റ്റഗ്രാമിലു​െമല്ലാം കോടിക്കണക്കിനാളുകൾ കാണുന്ന നാസ്​ ഡെയ്​ലിയിൽ കോവിഡ്​ പരീക്ഷണത്തെക്കുറിച്ചുള്ള വിഡിയോയിൽ വസീമിനെ കണ്ടതോടെയാണ്​ സംഗതി നാട്ടിൽമുഴുവൻ പാട്ടായത്​. അതോടെ വാക്​സിൻ പരീക്ഷണത്തിൽ പങ്കാളിയാകുവാൻ ചെയ്യേണ്ടതെന്തെന്നന്വേഷിച്ച്​ വസീമിനെ തേടി നിരവധി കോളുകളാണെത്തുന്നത്​.

കൃഷി വകുപ്പിൽ നിന്ന്​ അവധിയെടുത്ത്​ വന്ന്​ യു.എ.ഇയിൽ നിർമാണ ആവശ്യങ്ങൾക്കുള്ള മെറ്റൽ സാമഗ്രികൾ വിതരണം ചെയ്യുന്ന വ്യവസായത്തിന്​ തുടക്കമിട്ട കണ്ണൂർ പഴയങ്ങാടി എരിപുരം കെ.പി. മൊയ്​തു ഹാജിയുടെയും സറീനയുടെയും മകനാണ്​ വസീം. മസ്​ന ഹാരിസ്​ ജീവിത പങ്കാളി. മകൾ ഹെസ്സ വസീമിന്​ മൂന്നര വയസ്​.