സൗഹൃദ സന്ദേശം പകർന്ന് ഈദ് ആഘോഷം

ദുബൈ: പരസ്പര സ്​നേഹത്തിന്‍റെയും സൗഹൃദത്തിന്‍റെയും സന്ദേശം ഉദ്​ഘോഷിച്ച്​ യു.എ.ഇയിൽ വിശ്വാസികൾ ചെറിയ പെരുന്നാൾ ആഘോഷിച്ചു. വിവിധ പള്ളികളിലും ഈദ്​ ഗാഹുകളിലും നടന്ന പെരുന്നാൾ നമസ്കാരത്തോടെയാണ്​ ഈദ്​ ദിനം ആരംഭിച്ചത്​.

മാനവിക സമത്വവും സാഹോദര്യവും ഉയർത്തിപ്പിടിക്കണമെന്ന് ഈദ് നമസ്കാരത്തിന്​ ശേഷം നടന്ന പ്രഭാഷണത്തിൽ പണ്ഡിതർ വിശ്വാസികളെ ഉൽബോധിപ്പിച്ചു. മനുഷ്യർക്കിടയിലെ വൈവിധ്യങ്ങൾ പരസ്പരം തിരിച്ചറിയാൻ മാത്രമുള്ളതാണെന്നും വിവേചനങ്ങൾ പാടില്ലെന്നും, ദൈവഭയം മാത്രമാണ് മഹത്വത്തിന്‍റെ അടിസ്ഥാനമെന്നും പ്രഭാഷകർ പറഞ്ഞു. കഴിഞ്ഞ വർഷങ്ങളിൽ നിന്ന്​ വ്യത്യസ്തമായി പെരുന്നാൾ നമസ്കാര ശേഷം ഹസ്തദാനം ചെയ്തും ആലിംഗനം ചെയ്തും പരസ്പരം ആശംസകൾ കൈമാറുന്നത്​ കാണാമായിരുന്നു. ദുബൈ എമിറേറ്റിൽ ദേര, ബർദുബൈ, അൽഖൂസ്, ഖിസൈസ്, കറാമ, അവീർ, മൽഖൂൽ തുടങ്ങിയ വിവിധ സ്ഥലങ്ങളിൽ പള്ളികളിലും ഈദ്​ ഗാഹുകളിലും നമസ്കാര സൗകര്യം ഒരുക്കിയിരുന്നു. പെരുന്നാൾ അവധിദിനങ്ങൾ ആഘോഷിക്കാനെത്തിയവരുടെ തിരക്ക്​ മിക്ക വിനോദ സഞ്ചാരകേന്ദ്രങ്ങളിലും തിങ്കളാഴ്ചയും ചൊവ്വാഴ്ചയും ദൃശ്യമായിരുന്നു. വരും ദിവസങ്ങളിലും സർക്കാർ-സ്വകാര്യ മേഖലകളിലുള്ളവർക്ക്​ അവധിയായതിനാൽ ഇത്തരം കേന്ദ്രങ്ങളിൽ തിരക്കു കുറയില്ലെന്നാണ്​ കരുതുന്നത്​. ഞായറാഴ്ച റമദാൻ 30പൂർത്തിയാക്കിയാണ്​ ഇത്തവണ യു.എ.ഇയിൽ പെരുന്നാൾ വന്നെത്തിയത്. മിക്ക കോവിഡ്​ നിയന്ത്രണങ്ങളും നീക്കിയ സാ ഹചര്യത്തിൽ വരുംദിവസങ്ങളിലും മലായാളി കൂട്ടായ്മകളടക്കം വിവിധ സാംസ്കാരിക പരിപാടികൾ ഒരുക്കിയിട്ടുണ്ട്​.

'​ആദ്യത്തെ പെരുന്നാൾ' ആഘോഷമാക്കി ദുബൈ ഗ്ലോബൽ വില്ലേജ്​​

ദുബൈ: 26 സീസൺ പിന്നിടുന്ന ഗ്ലോബൽ വില്ലേജ് ചരിത്രത്തിൽ​ ആദ്യമായി പെരുന്നാൾ ദിനവും തുറന്നിരുന്നു. വെടിക്കെട്ട്​ ഉൾപെടെയുള്ള ആഘോഷത്തോടെയാണ്​ ആഗോള ഗ്രാമം പെരുന്നാളിനെ വരവേറ്റത്​. അവധി ദിനമായതിനാൽ സന്ദർശകർ ഇവിടേക്ക്​ ഒഴുകിയെത്തി.

​തണുപ്പുള്ള ആറ്​ മാസം തുറക്കുകയും ചൂടുകാലത്ത്​ അടച്ചിടുകയും ചെയ്യുന്നതാണ്​ ഗ്ലോബൽ വില്ലേജിന്‍റെ പതിവ്​. റമദാൻ പകുതിയാകുന്നതോടെ കഴിഞ്ഞ വർഷങ്ങളിൽ അടച്ചിരുന്നു. എന്നാൽ, ഇക്കുറി ആദ്യമായി റമദാനിൽ പൂർണമായും തുറന്നിരിക്കാൻ തീരുമാനിക്കുകയായിരുന്നു. പെരുന്നാൾ ദിവസം വൈകുന്നേരം അഞ്ച്​ മുതൽ പുലർച്ച ഒന്ന്​ വരെ ​വില്ലേജിൽ ആഘോഷം നടന്നു.

അറബിക്​ സാംസ്കാരിക പരിപാടികളും പെരുന്നാൾ സ്​പെഷ്യൽ ഭക്ഷണങ്ങളും അണിനിരന്നിരുന്നു. ഈദ്​ ഗ്രാൻഡ്​ പ്രൈസ്​ നറുക്കെടുപ്പം ഇക്കുറി നടത്തുന്നുണ്ട്​.

മെയ്​ ആറിന്​ മുൻപ്​ ടിക്കറ്റെടുക്കുന്നവരിൽ നിന്ന്​ തെരഞ്ഞെടുക്കപ്പെടുന്ന ഭാഗ്യശാലിയെ കാത്തിരിക്കുന്നത്​ ഫോഡ്​ ബ്രോൺകോ എസ്​.യു.വി കാറാണ്​. വിജയിയെ മെയ്​ ഏഴിന്​ പ്രഖ്യാപിക്കും.