നിയമപോരാട്ടവും രക്ഷയായില്ല: ദുരിതത്തിലായ സജ്ജാദ് ഇബ്രാഹിം കുഞ്ഞ് നാടണഞ്ഞു

ജിദ്ദ: മൂന്നു വർഷത്തെ നിയമ പോരാട്ടത്തിനൊടുവിൽ അനുകൂല വിധി സമ്പാദിച്ചെങ്കിലും ആനുകൂല്യങ്ങളൊന്നും ലഭിക്കാതെ ദുരിതത്തിലായ തിരുവനന്തപുരം പോത്തൻകോട് സ്വദേശി സജ്ജാദ് ഇബ്രാഹിം കുഞ്ഞ് ജിദ്ദ ഒ.ഐ.സി.സി നൽകിയ വിമാന ടിക്കറ്റിൽ നാടണഞ്ഞു. 16 വർഷത്തെ പ്രവാസത്തിനു ശേഷമുള്ള ഈ മടക്കയാത്രക്ക് വേദനയുടെ കഥകൾ ഏറെയുണ്ട്. കഴിഞ്ഞ നാലര വർഷമായി ജോലി ചെയ്തിരുന്ന കമ്പനിയിൽനിന്ന്​ ശമ്പളം ഉൾപ്പെടെ എല്ലാ ആനുകൂല്യങ്ങളും നിഷേധിച്ചതി​െൻറ പേരിൽ ജിദ്ദ ഇന്ത്യൻ കോൺസുലേറ്റി​െൻറ സഹായത്തോടെ ഇദ്ദേഹം കോടതിയിൽ കേസ് ഫയൽ ചെയ്തു.

മൂന്നു വർഷത്തെ നിയമ പോരാട്ടത്തിനൊടുവിൽ ഏകദേശം 80,000 റിയാൽ ലഭ്യമാക്കാനുള്ള അനുകൂല വിധി ലഭിച്ചു. എന്നാൽ, സ്പോൺസറുടെ മരണവും കമ്പനി പൂട്ടിയതും കാരണം ഇദ്ദേഹത്തിന് ഈ തുക നേടിയെടുക്കാൻ കഴിഞ്ഞില്ല. ഇതിനിടെ, താമസരേഖ കാലാവധി അവസാനിച്ചതിനാൽ മറ്റു ജോലിക്ക് ശ്രമിക്കാനും കഴിഞ്ഞില്ല. ഇതിനിടയിലുണ്ടായ വീഴ്ചയിൽ കാലി​െൻറ തുടയെല്ല് പൊട്ടി നടക്കാൻ പറ്റാത്ത സ്ഥിതിയിലുമായി. ആരോഗ്യ ഇൻഷുറൻസോ മറ്റ്​ ആനുകൂല്യങ്ങളോ ഒന്നും ലഭിക്കാതെ പ്രയാസപ്പെട്ടിരുന്ന സജ്ജാദ് ചികിത്സക്കായി ത​െൻറ ആകെ സമ്പാദ്യമായ നാലു ലക്ഷത്തോളം രൂപ നാട്ടിൽനിന്ന്​ വരുത്തി ഓപറേഷൻ നടത്തി കാലിനുള്ളിൽ കമ്പിയിട്ടു. എങ്കിലും പഴയതുപോലെ നടക്കാൻ സാധിക്കാതെയും ഭാരമുള്ള വസ്തുക്കൾ എടുക്കാൻ കഴിയാത്ത അവസ്ഥയിലുമായി പ്രയാസപ്പെടുകയായിരുന്നു.

പോത്തൻകോട് പഞ്ചായത്ത് വാർഡ് അംഗം എ.എസ്. ശരണ്യ മുഖേന ഇദ്ദേഹത്തി​െൻറ വിവരമറിഞ്ഞ ജിദ്ദ ഒ.ഐ.സി.സി വിഷയത്തിൽ ഇടപെട്ടു. ഒ.ഐ.സി.സി റീജനൽ കമ്മിറ്റിയുടെ യാത്രാസാഫല്യം പദ്ധതിയിലൂടെ സൗജന്യ വിമാന ടിക്കറ്റ്​ പ്രസിഡൻറ്​ കെ.ടി.എ. മുനീർ കൈമാറി. സജ്ജാദി​െൻറ തുടർചികിത്സക്ക് അടൂർ പ്രകാശ് എം.പി മുഖാന്തരം തിരുവനന്തപുരം മെഡിക്കൽ കോളജ്​ ആശുപത്രിയിൽ സാധ്യമായ സഹായങ്ങൾ ഒരുക്കാനും ഒ.ഐ.സി.സി പ്രവർത്തകർ മുൻകൈയെടുത്തു.