ട്രാഫിക് പിഴ വഴിതെറ്റി വന്നാൽ ഒഴിവാക്കാൻ വഴിയുണ്ട്​

റിയാദ്​: ട്രാഫിക്​ പിഴകൾ വഴിതെറ്റി വന്നാൽ വിഷമിക്കേണ്ടതില്ല, ഒഴിവാക്കാൻ നിയമാനുസൃത വഴികളുണ്ട്​. ചെയ്യാത്ത തെറ്റിനാണ്​ പിഴയെന്ന്​ അധികൃതരെ ബോധ്യപ്പെടുത്തി അതിൽ നിന്ന്​ രക്ഷപ്പെട്ട മലയാളിയുടെ അനുഭവ പാഠത്തിൽ നിന്ന്​ ആ മാർഗങ്ങളെ കുറിച്ചറിയാം. മാധ്യമ പ്രവർത്തകൻ കൂടിയായ റിയാദ്​ ഹാരയിലെ സഫാമക്ക പോളിക്ലിനിക്ക്​ മാനേജർ നൗഫൽ പാലക്കാടനാണ് ഇത്തരത്തിലൊരു അനുഭവമുണ്ടായത്​. ഡ്രൈവിങ്ങിനിടയിൽ മൊബൈൽ ഫോൺ ഉപയോഗിച്ചു എന്ന കുറ്റം ആരോപിച്ച്​​ 150 റിയാൽ പിഴ ചുമത്തി. ആഗസ്​റ്റ്​ രണ്ടിന്​ രാവിലെ 9.34ന്​ ദറഇയ ഭാഗത്ത്​ ഡ്രൈവ്​ ചെയ്യുന്നതിനിടയിൽ മൊബൈൽ ഫോൺ ഉപയോഗിച്ചു എന്നാണ്​​ ട്രാഫിക്​ പൊലീസിൽ (മുറൂർ) നിന്ന്​ എസ്​.എം.എസ്​ കിട്ടിയത്​. ഡ്രൈവ്​ ചെയ്​തു എന്നാരോപിക്കുന്ന സമയത്ത്​ ഒാഫീസിൽ ഒരു മീറ്റിങ്ങിലായിരുന്നു. സംഭവസ്ഥലം ഏറെ അകലെയുമായിരുന്നു.

വഴി തെറ്റി വന്ന പിഴയാണെന്ന്​​ അതോടെ നസിലായി. 993 എന്ന ട്രാഫിക്​ പൊലീസ്​ നമ്പറിലേക്ക്​ വിളിച്ചു വിവരം പറഞ്ഞ​േപ്പാൾ ദമ്മാം റോഡിലെ റിമാൽ എന്ന സ്ഥലത്തുള്ള ട്രാഫിക്​ പൊലീസ്​ ഒാഫീസിൽ എത്താൻ നിർദേശം കിട്ടി. അവിടെ ചെന്നപ്പോൾ നിശ്ചിത ഫോറത്തിൽ അപേക്ഷ നൽകാൻ നിർദേശിക്കപ്പെട്ടു. ഫോറം പൂരിപ്പിച്ച്​ നൽകിയപ്പോൾ ട്രാഫിക്​ കുറ്റങ്ങളുടെ വീഡിയോയും ഫോ​േട്ടായും ശേഖരിക്കുന്ന വിഭാഗത്തിലേക്ക്​ അയച്ചു. ദൃശ്യങ്ങളൊന്നും കാണ്ടെത്താൻ കഴിഞ്ഞില്ല. ‘ദൃശ്യങ്ങൾ ലഭ്യമല്ല’ എന്ന്​ അപേക്ഷയിൽ രേഖപ്പെടുത്തി ആദ്യ സെക്ഷനിലേക്ക്​ തിരിച്ചയച്ചു. ദൃശ്യങ്ങൾ ലഭിക്കുമോ എന്ന വിശദ പരിശോധനക്കുള്ള സാവകാശത്തിന്​ വേണ്ടി 20 ദിവസം കഴിഞ്ഞ്​ വരാൻ നിദേശം കിട്ടി. ഇതിനിടയിൽ നിശ്ചിത സമയത്തിനുള്ളിൽ പണമടയ്​ക്കാത്തതിനാൽ പിഴ ഇരട്ടിയായി മാറിക്കഴിഞ്ഞിരുന്നു.

അത്​ കാര്യമ​ാക്കേണ്ടതില്ലെന്ന്​​ ബന്ധപ്പെട്ട ഉദ്യോഗസ്​ഥർ സമാധാനിപ്പിച്ചു. 20 ദിവസത്തിന്​ ശേഷം ചെന്നപ്പോൾ ആരോപിക്കപ്പെട്ട കുറ്റം തെളിയിക്കുന്നതായ ഒന്നും ലഭ്യമല്ലെന്ന്​ തീർപ്പുകൽപിച്ചു. ഇക്കാര്യത്തിൽ കൂടുതൽ വിശദീകരണം ആവ​ശ്യപ്പെട്ട്​, കേസെടുത്ത​ ദറഇയ ​ട്രാഫിക്​ പൊലീസ്​ സ്​റ്റേഷനിലേക്ക് കത്തയച്ചു. തൃപ്​തികരമായ മറുപടി കിട്ടിയില്ലെങ്കിൽ പിഴ താനെ ഒഴിവാകും എന്ന്​ ഉദ്യോഗസ്​ഥർ അറിയിച്ചതിനെ തുടർന്ന്​ നൗഫൽ മടങ്ങി. നാല്​ ദിവസം കഴിഞ്ഞപ്പോൾ ഒാൺലൈനിൽ നിന്ന്​ പിഴ താനെ അപ്രത്യക്ഷമായി. ചെയ്യാത്ത കുറ്റത്തിന്​ ഗതാഗത പിഴകളുണ്ടായാൽ പരിഹാരത്തിനുള്ള മാർഗമാണിത്​.