അവധിക്കാല സർവിസുകൾ വ്യാപിപ്പിച്ച് ഖത്തർ എയർവേസ്​

ദോഹ: അവധിക്കാലത്ത്​ കൂടുതൽ സ്​ഥലങ്ങളിലേക്ക് സർവിസുകൾ പുനരാരംഭിക്കാൻ ഖത്തർ എയർവേസ്​. ഇതിൻെറ ഭാഗമായി സ്​പെയിനിലെ മലാഗയിലേക്കുള്ള സർവിസ്​ ജൂലൈ രണ്ടിന്​ ആരംഭിക്കുമെന്ന് കമ്പനി​ അറിയിച്ചു. രാവിലെ എട്ടിന് ദോഹയിൽനിന്ന് പുറപ്പെടുന്ന വിമാനം ഉച്ചക്ക 2.40ന് മലാഗയിലെത്തും. വൈകീട്ട് 3.55ന് തിരിച്ച്് പുറപ്പെടുന്ന വിമാനം 11.55ന് ദോഹയിലെത്തും. ഖത്തർ എയർവേസിൻെറ എ350–900 വിമാനമാണ് സർവിസ്​ നടത്തുക. ജൂലൈ രണ്ട്​ മുതൽ സെപ്റ്റംബർ 12 വരെയായിരിക്കും സർവിസ്​.

കോവിഡ് കാരണം നടപ്പാക്കിയ യാത്ര നിയന്ത്രണങ്ങൾ സ്​പെയിൻ അധികാരികൾ പിൻവലിക്കുന്ന സാഹചര്യത്തിലാണിത്. ലോകമെമ്പാടുമുള്ള സന്ദർശകരുടെ ഇഷ്​ട കേന്ദ്രമാണ്​ മലാഗ. പൂർണമായും വാക്സിൻ സ്വീകരിച്ച യാത്രക്കാർക്ക് മലാഗയിലേക്ക് ഒരിക്കൽ കൂടി സന്ദർശനം നടത്താനുള്ള അവസരമാണ് വരാനിരിക്കുന്നത്. ഒരിക്കൽ കൂടി ലോകത്തിൻെറ വാതിലുകൾ തുറക്കാനിരിക്കുകയാണ്​. ഈ സാഹചര്യത്തിൽ ആഗോള സാമ്പത്തിക സാമൂഹിക പുനരുദ്ധാരണത്തിന് പിന്തുണ നൽകാൻ ഖത്തർ എയർവേസ്​ സജ്ജമാണെന്നും ഗ്രൂപ് സി.ഇ.ഒ അക്ബർ അൽ ബാകിർ പറഞ്ഞു. സ്​പെയിൻ വിനോദസഞ്ചാര മേഖലക്ക് ഖത്തർ എയർവേസിൻെറ പൂർണ പിന്തുണയുണ്ട്​. കമ്പനിയെ സംബന്ധിച്ച് സ്​പെയിൻ തന്ത്രപ്രധാനമായ രാജ്യമാണെന്നും അൽ ബാകിർ പറഞ്ഞു. കടുത്ത വെല്ലുവിളികൾ നിലനിൽക്കെത്തന്നെ ആഗോള ശൃംഖല വ്യാപിപ്പിക്കാനുള്ള ശ്രമത്തിലാണ്​ കമ്പനി.