ഖത്തറിലെത്തിയ യു.എസ് കോൺഗ്രസ് പ്രതിനിധി സംഘം പ്രധാനമന്ത്രിയും ആഭ്യന്തര മന്ത്രിയുമായ ശൈഖ് ഖാലിദ് ബിൻ ഖലീഫ ബിൻ അബ്ദുൽ അസീസ് ആൽഥാനിയുമായി കൂടിക്കാഴ്ച നടത്തുന്നു
ദോഹ: ഖത്തർ സന്ദർശിക്കുന്ന അമേരിക്കൻ കോൺഗ്രസ് പ്രതിനിധി സംഘം ഡെപ്യൂട്ടി അമീർ ശൈഖ് അബ്ദുല്ല ബിൻ ഹമദ് ആൽഥാനി, പ്രധാനമന്ത്രിയും ആഭ്യന്തര മന്ത്രിയുമായ ശൈഖ് ഖാലിദ് ബിൻ ഖലീഫ ബിൻ അബ്ദുൽ അസീസ് ആൽഥാനി, ഉപപ്രധാനമന്ത്രിയും വിേദശകാര്യ മന്ത്രിയുമായ ശൈഖ് മുഹമ്മദ് ബിൻ അബ്ദുൽറഹ്മാൻ ആൽഥാനി എന്നിവരുമായി കൂടിക്കാഴ്ച നടത്തി. അമേരിക്കൻ കോൺഗ്രസിലെ ന്യൂയോർക്കിൽനിന്നുള്ള ഡെമോക്രാറ്റിക് അംഗവും വിദേശകാര്യ വകുപ്പിലെ ഹൗസ് കമ്മിറ്റി ചെയർമാനുമായ ഗ്രിഗറി മീക്സിെൻറ നേതൃത്വത്തിലുള്ള കോൺഗ്രസ് അംഗങ്ങളാണ് ഖത്തറിലെത്തിയത്.
അമേരിക്കൻ പ്രതിനിധി സംഘം ഡെപ്യൂട്ടി അമീർ ശൈഖ് അബ്ദുല്ല ബിൻ ഹമദ് ആൽഥാനിയുമായി കൂടിക്കാഴ്ച നടത്തുന്നു
സംഘത്തെ ശനിയാഴ്ച രാവിലെ അമീരി ദിവാൻ ഒാഫിസിൽ ഡെപ്യൂട്ടി അമീർ സ്വീകരിച്ചു. ഡെമോക്രാറ്റിക് പ്രതിനിധി ടെഡ് ഡ്യൂഷ്, ഡേവിഡ് സിസിലിൻ, കാതി മാനിങ്, ബ്രാഡ് ഷ്നീഡർ, അബിഗെയ്ൽ സ്പാൻബെർഗർ, സാറ ജേക്കബ്, റിപ്പബ്ലിക്കൻ അംഗം ഗാർലൻഡ് ഹിൽ, ഫ്രെഞ്ച് ഹിൽ, നികോളി മലിയോകിസ് എന്നിവരാണ് സംഘത്തിലുള്ളത്.
ശേഷം, ഇവർ ഉപപ്രധാനമന്ത്രിയുമായി കൂടിക്കാഴ്ച നടത്തി. ഇരു രാജ്യങ്ങളും തമ്മിലെ സൗഹൃദവും മധ്യേഷ്യയിലെ സ്ഥിതി വിശേഷങ്ങളും കൂടിക്കാഴ്ചയിൽ ചർച്ചയായി. പുതിയകാലത്തെ വെല്ലുവിളികളും ഭീഷണികളും നേരിടുന്നതിൽ ഖത്തറിനും അമേരിക്കക്കുമിടയിലെ തന്ത്രപരമായ പങ്കാളിത്തവും സഹകരണവും സംബന്ധിച്ച് ചർച്ച നടന്നതായി ഖത്തർ ന്യൂസ് ഏജൻസി റിപ്പോർട്ട് ചെയ്തു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.