തിരികെയാത്ര: ബംഗ്ലാദേശും സമ്മതിച്ചു; ഇന്ത്യക്കാരുടെ കാത്തിരിപ്പ്​ തുടരുന്നു

കുവൈത്ത്​ സിറ്റി: പൊതുമാപ്പിന്​ രജിസ്​റ്റർ ചെയ്​ത ഇന്ത്യക്കാർ തിരികെ യാത്രക്കായി കാത്തിരിപ്പ്​ തുടരുന്നു. കുവൈത്ത്​ സൗജന്യമായി വിമാന സൗകര്യം ഏർപ്പെടുത്താമെന്ന്​ അറിയിച്ചിട്ടും ഇന്ത്യൻ അധികൃതരുടെ അനുമതി ലഭിക്കാത്തതാണ്​ തടസ്സം. മേയ്​ 17 വരെ ആഭ്യന്തര, അന്താരാഷ്​​ട്ര വിമാന സർവീസുകൾക്ക്​ അനുമതിയുണ്ടാവില്ലെന്ന്​ ശനിയാഴ്​ച കേന്ദ്ര വ്യോമയാന മന്ത്രാലയം അറിയിച്ചത്​ പ്രവാസി ഇന്ത്യക്കാരെ നിരാശപ്പെടുത്തുന്നതാണ്​.

വിമാന സർവീസുകൾ ആരംഭിക്കുന്ന വിവരം പിന്നീട്​ അറിയിക്കുമെന്നും ഡി.ജി.സി.എ വ്യക്​തമാക്കി. ചരക്കുവിമാനങ്ങൾക്ക്​ പുറമെ ഡി.ജി.സി.എ അനുമതി നൽകിയ പ്രത്യേക വിമാനങ്ങൾക്കും സർവീസ്​ നടത്താമെന്ന്​ വാർത്താക്കുറിപ്പിൽ പറയുന്നുണ്ടെങ്കിലും ഗൾഫിൽനിന്ന്​ പ്രവാസികളെ തിരിച്ചെത്തിക്കുന്നതിന്​ പ്രത്യേകാനുമതിയുണ്ടോ എന്ന്​ വ്യക്​തമല്ല. ഇന്ത്യയിൽ കുടുങ്ങിയ വിദേശ പൗരന്മാരെ തിരി​ച്ചുകൊണ്ടുപോവാൻ പല രാജ്യങ്ങളും വിമാനങ്ങൾ അയക്കുന്നുണ്ട്​.

കോവിഡ്​ പ്രതിരോധത്തി​​െൻറ ഭാഗമായി ലോക്​ ഡൗൺ മേയ്​ 17 വരെ നീട്ടിയ സാഹചര്യത്തിലാണ്​ വിമാന സർവീസുകളും നീട്ടിവെക്കുന്നതായി വ്യോമയാന വകുപ്പ്​ പ്രഖ്യാപിച്ചത്​. മേയ്​ രണ്ടാം വാരം മുതൽ വിമാന സർവീസുകൾ നടത്തുമെന്നാണ്​ നേരത്തെ റിപ്പോർട്ടുണ്ടായിരുന്നത്​. 12000ത്തോളം ഇന്ത്യക്കാരാണ്​ കുവൈത്തിൽ പൊതുമാപ്പിന്​ രജിസ്​റ്റർ ചെയ്​ത്​ ക്യാമ്പിൽ കഴിയുന്നത്​. രജിസ്​ട്രേഷൻ പൂർത്തിയായത്​ മുതൽ യാത്ര ദിവസം വരെ കുവൈത്ത്​ ആഭ്യന്തര മ​ന്ത്രാലയമാണ്​ ഇവർക്ക്​ താമസ സൗകര്യമൊരുക്കുന്നത്​.

രജിസ്​റ്റർ ചെയ്​തവരെ സ്വന്തം താമസ സ്ഥല​ത്തേക്ക്​ തിരിച്ചയക്കുന്നില്ല. സ്വന്തം പൗരന്മാരെ സ്വീകരിക്കാൻ തയാറാവാത്ത രാജ്യങ്ങളോട്​ കർശന നിലപാട്​ സ്വീകരിക്കണമെന്ന്​ സ്വദേശികൾക്കിടയിൽ അഭിപ്രായമുയരുന്നുണ്ട്​. ക്യാമ്പിൽ കഴിയുന്ന ഇന്ത്യക്കാരും എന്ന്​ തിരിച്ചുപോവാൻ കഴിയുമെന്നറിയാതെ അസ്വസ്ഥരാണ്​. ജോലി നഷ്​ടപ്പെട്ടും അസുഖങ്ങൾ മൂലവും പ്രയാസപ്പെടുന്നവരും സന്ദർശക വിസയിലെത്തി കുടുങ്ങിയവരുമായ ആയിരങ്ങൾ വേറെയും അടിയന്തരമായി നാട്ടിലെത്താൻ ആഗ്രഹിക്കുന്നുണ്ട്​.