കുവൈത്ത് അസിസ്റ്റന്റ് വിദേശകാര്യ മന്ത്രി അംബാസഡർ സമീഹ് ഹയാത്തും ഇന്ത്യൻ വിദേശകാര്യ സഹമന്ത്രി മീനാകാശി ലേഖിയും ചർച്ചയിൽ
കുവൈത്ത് സിറ്റി: കുവൈത്തും ഇന്ത്യയും തമ്മിലുള്ള ഉഭയകക്ഷി ബന്ധങ്ങളും അവ മെച്ചപ്പെടുത്തുന്നതിനുള്ള വഴികളും ചർച്ച ചെയ്യുന്നതിന്റെ ഭാഗമായി കുവൈത്ത് ഏഷ്യൻകാര്യ അസിസ്റ്റന്റ് വിദേശകാര്യ മന്ത്രി അംബാസഡർ സമീഹ് ഹയാത്തും ഇന്ത്യൻ വിദേശകാര്യ സഹമന്ത്രി മീനാക്ഷി ലേഖിയും കൂടിക്കാഴ്ച നടത്തി.
ഇന്ത്യൻ വിദേശകാര്യ മന്ത്രാലയത്തിന്റെ ആസ്ഥാനത്ത് നടന്ന കൂടിക്കാഴ്ചയിൽ കുവൈത്ത് വിദേശകാര്യ മന്ത്രി ശൈഖ് സലീം അബ്ദുല്ല അൽ ജാബിർ അസ്സബാഹ് ഇന്ത്യൻ വിദേശകാര്യ മന്ത്രി സുബ്രഹ്മണ്യം ജയശങ്കറിനെ അഭിസംബോധന ചെയ്ത് തയാറാക്കിയ കത്ത് സമീഹ് ഹയാത്ത്, മീനാകാശി ലേഖിക്ക് കൈമാറി.
ഇരു രാജ്യങ്ങളും തമ്മിലുള്ള ഉഭയകക്ഷി ബന്ധത്തെക്കുറിച്ചും മാർഗങ്ങളെക്കുറിച്ചും അവ വികസിപ്പിക്കുന്നതിനെ കുറിച്ചും കത്തിൽ സൂചിപ്പിച്ചു.ഇരുപക്ഷവും പരസ്പര ആശങ്കയുള്ള വിഷയങ്ങളും പ്രാദേശിക, അന്തർദേശീയ വിഷയങ്ങളിലെ പുതിയ സംഭവവികാസങ്ങളും അവലോകനം ചെയ്തതായി സമീഹ് ഹയാത്ത് വ്യക്തമാക്കി.
ഇന്ത്യയിലെ കുവൈത്ത് അംബാസഡർ ജാസിം അൽ നജീം, കുവൈത്തിലെ ഇന്ത്യൻ അംബാസഡർ ഡോ. ആദർശ് സ്വൈക എന്നിവരും യോഗത്തിൽ പങ്കെടുത്തു. ഇരു രാജ്യങ്ങളിലെയും വിദേശകാര്യ മന്ത്രാലയങ്ങൾ തമ്മിലുള്ള അഞ്ചാം റൗണ്ട് രാഷ്ട്രീയ ചർച്ചകളിൽ പങ്കെടുക്കുന്നതിനായാണ് സമീഹ് ഹയാത്തും കുവൈത്ത് പ്രതിനിധി സംഘവും ഔദ്യോഗിക സന്ദർശനത്തിനായി ഇന്ത്യയിലെത്തിയത്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.