കൊമ്പുവെക്കൽ ചികിത്സ വീടുകളിൽ നിന്ന്​ അനുവദിക്കാനുള്ള നിർദേശങ്ങൾ രൂപപ്പെടുത്താൻ നീക്കം

മനാമ: പരമ്പരാഗത കൊമ്പുവെക്കൽ ചികിത്സ (കപ്പിങ്​ തെറാപ്പി) വീടുകളിൽ നിന്ന്​ അനുവദിക്കാനുള്ള നിർദേശങ്ങൾ രൂപപ്പെടുത്താൻ നീക്കമുള്ളതായി റിപ്പോർട്ട്​. ഇത്തരത്തിൽ പദ്ധതി പരിഗണനയിലുണ്ടെന്ന്​ നാഷണൽ ഹെൽത്ത്​ റെഗുലേറ്ററി അതോറിറ്റി (എൻ.എച്ച്​.ആർ.എ) ചീഫ്​ എക്​സിക്യൂട്ടിവ്​ ഡോ.മറിയം അൽ ജലാഹ്​മ വെളിപ്പെടുത്തിയതായി പ്രാദേശിക പത്രം റിപ്പോർട്ട്​ ചെയ്​തു. എന്നാൽ, ഇത്​ പ്രാബല്യത്തിൽ വരണമെങ്കിൽ ആദ്യം സുപ്രീം കൗൺസിൽ ഫോർ ഹെൽത്ത്​ അംഗീകാരം നൽകേണ്ടതുണ്ട്.  നിർദേശത്തിന്​ അംഗീകാരം ലഭിക്കാതെയും മതിയായ ലൈസൻസ്​ ഇല്ലാതെ ആരെങ്കിലും ചികിത്സ തുടർന്നാൽ അവ​ർക്കെതിരെ കർശന നടപടിയുണ്ടാകുമെന്ന്​ മറിയം അൽ ജലാഹ്​മ വ്യക്തമാക്കി. പരമ്പരാഗത ചികിത്സകർക്ക്​ ചൈന വലിയ ഇളവ്​ നൽകിയിട്ടുണ്ട്​. സമാന രീതിയിലുള്ള പരിഷ്​കാരമാണ്​ ഇവിടെയും കൊണ്ടുവരാൻ ആഗ്രഹിക്കുന്നത്​. അതിനായുള്ള നിയമങ്ങൾ രൂപപ്പെടുത്തി വരികയാണ്​. ഹിജമ ചികിത്സകരെ നിലവിൽ ‘പ്രൊഡക്ടീവ്​ ഫാമിലി’കളെ പരിഗണിക്കുന്ന വിധത്തിൽ കാണാനാണ്​ ശ്രമിക്കുന്നത്​. വീടുകൾ കേന്ദ്രീകരിച്ച്​ ഭക്ഷണ വ്യാപാരം നടത്തുന്ന യൂനിറ്റുകളാണ്​ ‘പ്രൊഡക്​ടീവ്​ ഫാമിലി’യിലുള്ളത്​.
നിലവിൽ ഇത്തരം ചികിത്സകൾ വീടുകളിൽ നിന്ന്​ ചെയ്​തുകൊടുക്കുന്നതിൽ ചില പ്രശ്​നങ്ങളുണ്ട്​. കാരണം യാതൊരു മെഡിക്കൽ പരിശീലനവും നേടിയിട്ടില്ലാത്തവരാണ്​ ഇത്​ ചെയ്യുന്നത്​. എന്നാൽ,മതിയായ പരിശീലനം നൽകി അവരെ പാരമ്പര്യ ചികിത്സകരായി അംഗീകരിക്കാനാകും. അതിനുമുമ്പായി ഇക്കാര്യം സുപ്രീം കൗൺസിൽ ഫോർ ഹെൽത്ത്​ തീരുമാന​ിക്കേണ്ടതുണ്ട്​. അനുകൂല തീരുമാനമുണ്ടായില്ലെങ്കിൽ, ലൈസൻസില്ലാത്ത ചികിത്സകർക്കെതിരെ നടപടിയെടുക്കും. രാജ്യത്ത്​ ഇൗ ചികിത്സ വാഗ്​ധാനം ചെയ്യുന്നവരുടെ പട്ടിക ഇതിനകം തയാറാക്കിയിട്ടുണ്ടെന്നും അവർ പറഞ്ഞു.ലൈസൻസ്​ ഇല്ലാതെ കൊമ്പുവെക്കൽ ചികിത്സ നടത്തുന്നവർക്കെതിരെ നടപടി വേണമെന്ന്​ കഴിഞ്ഞ ദിവസം നോർതേൺ മുനിസിപ്പൽ കൗൺസിൽ ആവശ്യപ്പെട്ടിരുന്നു. പുറത്ത്​ ചെറിയ മുറിവുകളുണ്ടാക്കി പ്രത്യേക കപ്പുവഴി രക്തം വലിച്ചെടുക്കുന്ന രീതിയാണ്​ ഇൗ ചികിത്സയിൽ ചെയ്യുന്നത്​. ഇത്​ പുറംവേദന, ആസ്​തമ, അലർജി തുടങ്ങി വിവിധ രോഗങ്ങൾക്ക്​ ഫലപ്രദമാണെന്നാണ്​ വിശ്വാസം.