ഞാൻ പാറ്റ

ഇരുട്ടാണ് മേൽവിലാസം

ഭിത്തിയിലെ വിള്ളലാണെന്‍റെ രാജ്യം

ദിനോസറുകൾക്കുമുമ്പേ ജനിച്ച പൂർവികർ

ലോകത്തിനൊരേയൊരു സാക്ഷി

വിശന്നാൽ കടലാസു പോലുമാഹാരം

തലപോയാലും ജീവൻ പോവില്ല

നിങ്ങളെന്നെ അഴുക്കെന്നു വിളിക്കും

ഞാൻ നിങ്ങളെ ഭയമെന്നു വായിക്കും

നിങ്ങളുടെ ലോകത്ത്

ഞങ്ങൾക്ക് വിചാരണയില്ല

കണ്ടുമുട്ടുന്നോരോ നിമിഷവും

വധശിക്ഷയാണ്.

ഞാൻ മരിക്കുമ്പോൾ

ഇരുട്ട് ആയിരം കാലൊച്ചകളെ പ്രസവിക്കും

നിങ്ങൾ മരിച്ചവരെ എണ്ണുമ്പോൾ

ഞാൻ തിരിച്ചുവരുന്നവരെ എണ്ണുന്നു

നിങ്ങൾ ജയിക്കുന്നതു ഒരു രാത്രി മാത്രം

ഞങ്ങളോ കാലങ്ങളത്രയും !

പ്രതിഷേധമെന്‍റെ രാഷ്ട്രീയം

അതിജീവനമെന്‍റെ പാരമ്പര്യം !!