സൂക്ഷിക്കുക
നിങ്ങൾ പിന്മടങ്ങുമ്പോൾപോലും
പ്രപിതാമഹന്മാരുടെ ജന്മഭൂമി
കിനാവ് കാണുന്ന
ആ കുഞ്ഞുങ്ങളുടെ
കുഴിമാടങ്ങളിൽ
ചവിട്ടിപ്പോകരുത്.
കുഞ്ഞുങ്ങളുടെ
ഖബറിടങ്ങളിൽനിന്നുള്ള
നിശ്വാസത്തിന്റെ ചുടുകാറ്റ്
നിങ്ങളെ പൊള്ളിച്ചേക്കും.
വിശന്ന് മരിച്ച കുഞ്ഞുങ്ങളുടെ
കൈകൾ
നിങ്ങളുടെ ഭാണ്ഡത്തിൽ സൂക്ഷിച്ച
തീറ്റ സാധനങ്ങളിലേക്ക് നീണ്ടുവരില്ല.
പക്ഷേ ലോകമാനമുള്ള
കുഞ്ഞുങ്ങളുടെ
ശാപം
വലിയ മാറാപ്പായി നിങ്ങളോടൊപ്പമുണ്ട്.
ശറമുൽശ്ശൈഖിലെ
ഉച്ചകോടിയിൽ പങ്കെടുത്ത്
സമാധാനത്തെക്കുറിച്ച്
പറഞ്ഞുകൊണ്ടേയിരിക്കുമ്പോഴും
നിങ്ങളുടെ കൂർത്ത
കൊമ്പല്ലുകളിൽനിന്ന്
ഉറ്റിവീഴുന്ന ചോര
മരിച്ചുപോയ കുഞ്ഞുങ്ങളത്രയും
കാണുന്നുണ്ട്.
അതുകൊണ്ട്
ആ കുഴിമാടങ്ങളിൽ ചവിട്ടരുത്.
.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.