തുടർച്ചയായ ആറാം ദിവസവും ഇടിവ്​; ഓഹരി വിപണിയുടെ തകർച്ചക്ക്​ പിന്നിലെന്ത്​ ?

ദേശീയ ഓഹരി സൂചികയായ നിഫ്​റ്റി തുടർച്ചയായ ആറാം ദിവസവും നഷ്​ടത്തിലേക്ക്​ കൂപ്പുകുത്തിയിരിക്കുകയാണ്​. കഴിഞ്ഞ വർഷം ജനുവരിക്ക്​ ശേഷം ഇതാദ്യമായാണ്​ നിഫ്​റ്റി തുടർച്ചയായ ആറ്​ ദിവസങ്ങളിലും നഷ്​ടം രേഖപ്പെടുത്തുന്നത്​. ആറ്​ സെഷനുകളിൽ എട്ട്​ ശതമാനത്തോളം നഷ്​ടമാണ്​ സൂചികകൾക്കുണ്ടായത്​. വിവിധ കേന്ദ്രബാങ്കുകൾ കോവിഡ്​ കാലത്ത്​ ​ നൽകിയിരുന്ന പിന്തുണ പിൻവലിക്കുന്നത്​ വിപണികളെ പ്രതികൂലമായി ബാധിക്കുന്നുവെന്ന്​ വേണം വിലയിരുത്താൻ. ഇതിനൊപ്പം മറ്റ്​ ചില സാഹചര്യങ്ങളും കൂടി ചേർന്നതോടെയാണ്​ ഓഹരി വിപണികൾ വൻ തകർച്ചയെ അഭിമുഖീകരിക്കുന്നത്​.

വിപണിയുടെ തകർച്ചക്കുള്ള പ്രധാന കാരണങ്ങൾ

യു.എസ്​ കേന്ദ്രബാങ്കി​െൻറ നയപ്രഖ്യാപനം

യു.എസ്​ ​കേന്ദ്രബാങ്കായ ഫെഡ്​ റിസർവി​െൻറ നയപ്രഖ്യാപനമാണ്​ വിപണി ആകാംക്ഷയോടെ ഉറ്റുനോക്കുന്നത്​. ബുധനാഴ്​ച മുതൽ നയപ്രഖ്യാപന യോഗം തുടങ്ങും. യോഗത്തിനൊടുവിൽ യു.എസ്​ കേന്ദ്രബാങ്ക്​ പലിശനിരക്കുകൾ ഉയർത്തുമെന്ന്​ തന്നെയാണ്​ പല റേറ്റിങ്​ ഏജൻസികളും പ്രവചിക്കുന്നത്​. ഗോൾഡ്​മാൻ സാചസ്​ പോലുള്ള ഏജൻസികൾ ഇത്തരത്തിലുള്ള പ്രവചനങ്ങൾ നടത്തി കഴിഞ്ഞു. യു.എസ്​ കേന്ദ്രബാങ്ക്​ പലിശനിരക്ക്​ ഉയർത്താനുള്ള സാധ്യതകൾ വിപണിയെ സ്വാധീനിക്കുന്നുണ്ട്​.

വിൽപനക്കാരായി വിദേശനിക്ഷേപകർ

വിദേശ നിക്ഷേപകർ വിൽപനക്കാരുടെ മേലങ്കയണിഞ്ഞതും വിപണിയെ സമ്മർദത്തിലാക്കുന്നു. യു.എസ്​ കേന്ദ്രബാങ്ക്​ പലിശനിരക്ക്​ ഉയർത്തുമെന്ന സൂചനകൾ ലഭിച്ചതോടെയാണ്​ വിദേശനിക്ഷേപകർ ഓഹരികൾ വിറ്റൊഴിവാക്കാൻ തുടങ്ങിയത്​. പുതിയ ബോണ്ട്​ വാങ്ങൽ പദ്ധതി ഫെഡ്​ റിസർവ്​ പ്രഖ്യാപിക്കാനുള്ള സാധ്യതയും ഇവരെ ഈ രീതിയിൽ ചിന്തിപ്പിച്ചുവെന്ന്​ വേണം വിലയിരുത്താൻ. ജനുവരിയിൽ മാത്രം വിദേശനിക്ഷേപകർ 12,000 കോടിയുടെ ഓഹരികളാണ്​ വിറ്റത്​

രാഷ്​ട്രീയസംഭവവികാസങ്ങൾ

റഷ്യയും ഉക്രൈനും തമ്മിലുള്ള സംഘർഷം ആഗോള വിപണികളെ സ്വാധീനിക്കുന്നുണ്ട്​. ഉക്രൈൻ അതിർത്തിയിൽ സൈനിക സാന്നിധ്യം റഷ്യ വർധിപ്പിക്കുകയാണ്​. കിഴക്കൻ യുറോപ്പിലുള്ള തങ്ങളുടെ സൈനികരോട്​ ഒരുങ്ങിയിരിക്കാൻ യു.എസ്​ കൂടി ആവശ്യപ്പെട്ട​േതാടെ സ്ഥിതി കൂടുതൽ സങ്കീർണമാവുകയാണ്​. ഈ സാഹചര്യം വിപണിയുടെ തിരിച്ചടിക്ക്​ കാരണമായി.

കുതിച്ചുയർന്ന്​ എണ്ണവില

ക്രൂഡോയിൽ വില റോക്കറ്റ്​ വേഗത്തിലാണ്​ കുതിക്കുന്നത്​. രാഷ്​ട്രീയ സംഘർഷങ്ങൾക്കൊപ്പം യു.എ.ഇയിലെ ഓയിൽ റിഫൈനറിയിലുണ്ടായ ഡ്രോൺ ആക്രമണവും എണ്ണവില വർധനക്കുള്ള കാരണമാണ്​. ബ്രെൻറ്​ ക്രൂഡ്​ ഓയിലി​െൻറ ഭാവി വിലകൾ 26 ശതമാനമാണ്​ ഉയർന്നത്​. എണ്ണവില ഉയർന്നാൽ അത്​ രാജ്യത്തെ പണപ്പെരുപ്പം വീണ്ടും ഉയരുന്നതിന്​ കാരണമാകുമെന്ന ആശങ്കയും വിപണിയെ സ്വാധീനിക്കുന്നു.

വാങ്ങൽ നിർത്തി ആഭ്യന്തര മ്യൂച്ചൽഫണ്ടുകൾ

വിദേശനിക്ഷേപകർ ഓഹരികൾ വിൽക്കു​േമ്പാഴും ഇന്ത്യൻ വിപണിയെ പിടിച്ചുനിർത്തിയിരുന്നത്​ ആഭ്യന്തര മ്യൂച്ചൽഫണ്ടുകളാണ്​. എന്നാൽ, ഇക്കുറി വാങ്ങലുകാരുടെ റോളിൽ രക്ഷകരായി ആഭ്യന്തര മ്യൂച്ചൽഫണ്ടുകൾ അവതരിച്ചില്ല. ഇതും വിപണിയുടെ തിരിച്ചടിക്കുള്ള കാരണമാണ്​.