കറാച്ചി വിമാനാപകടം; 66 മരണം

കറാച്ചി: പാകിസ്​താനിലെ കറാച്ചിയിൽ  ജനവാസ കേന്ദ്രത്തിൽ വിമാനം തകർന്നു വീണു. 66 പേർ മരിച്ചതായാണ്​ ഒടുവിൽ ലഭിക്കുന്ന വിവരം. ലാഹോറിൽ നിന്ന്​ വരികയായിരുന്ന പാകിസ്​താൻ ഇൻറർ നാഷനൽ എയർലൈൻസി​​​​​​െൻറ വിമാനം  കറാച്ചി വിമാനത്താവളത്തിൽ ഇറങ്ങുന്നതിന്​ ഒരു മിനിറ്റു മുമ്പാണ്​ മോഡൽ കോളനിയിൽ  തകർന്നുവീണത്​. മരണസംഖ്യ ഉയരാൻ സാധ്യതയുണ്ട്​. വെള്ളിയാഴ്​ച പ്രദേശിക സമയം ഉച്ച 2.37ഓടെയായിരുന്നു​ അപകടം. വിമാനത്തിൽ 90 യാത്രക്കാരും എട്ട്​  ജീവനക്കാരും ഉൾപ്പെടെ 98 പേരുണ്ടായിരുന്നു. അപകടത്തിൽ വീടുകൾ ഉൾപ്പെടെ  കെട്ടിടങ്ങളും വാഹനങ്ങളും തകർന്നു.  നിരവധി പേർക്ക്​ പരിക്കേറ്റു. 

വിമാനത്തിന്​ സാ​​േങ്കതിക തകരാറുള്ളതായി പൈലറ്റ്​ കൺട്രോൾ റൂമിൽ അറിയിച്ചിരുന്നതായി പാകിസ്​താൻ ഇൻറർ നാഷനൽ എയർലൈൻസ്​ ചീഫ്​ എക്​സിക്യൂട്ടിവ്​ ഓഫിസർ എയർ മാർഷൽ അർഷദ്​ മാലിക്​ പറഞ്ഞു. രണ്ടു യാത്രക്കാർ അദ്​ഭുതകരമായി രക്ഷപ്പെട്ടതായി സിന്ധ്​ ആരോഗ്യ മന്ത്രി ഡോ. അസ്​റ പെച്ചൂദോ അറിയിച്ചു. വിമാനം മൊബൈൽ ടവറിൽ ഇടിച്ച ശേഷം വീടുകൾക്ക്​ മുകളിൽ തകർന്നു വീഴുകയായിരുന്നുവെന്ന്​ ദൃക്​സാക്ഷിയായ ഷക്കീൽ അഹമ്മദ്​ പറഞ്ഞു. അപകടം നടന്ന ഉടൻ സേനയുടെ ദ്രുതകർമ വിഭാഗം രക്ഷാപ്രവർത്തനത്തിന്​ ഇറങ്ങിയിരുന്നു. 

2016 ഡിസംബർ ഏഴിന്​ ചിത്രലിൽ നിന്ന്​ ഇസ്​ലാമാബാദിലേക്ക്​ വരികയായിരുന്ന പാകിസ്​താൻ എയർലൈൻസി​​​​​​െൻറ വിമാനം തകർന്ന്​ 48 പേർ മരിച്ചിരുന്നു. ഇതിന്​ ശേഷം രാജ്യത്ത്​ നടക്കുന്ന ഏറ്റവും വലിയ വിമാന അപകടമാണിത്​. ​കോവിഡ്​ നിയന്ത്രണം നീക്കിയതിന്​ ശേഷം പരിമിതമായ തോതിൽ ഒരാഴ്​ച മുമ്പാണ്​ പാകിസ്​താനിൽ വിമാന സർവിസ്​ പുനരാരംഭിച്ചത്​. അപകടത്തിൽ പാകിസ്​താൻ പ്രസിഡൻറ്​ ആരിഫ്​ അൽവി, പ്രധാനമന്ത്രി ഇംറാൻ ഖാൻ എന്നിവർ ദുഃഖം രേഖപ്പെടുത്തി.