ന്യൂയോർക്: യു.എസ് ഓപൺ ടെന്നിസിൽ റാഫേൽ നദാൽ, ഇഗാ സ്വൈറ്റക്, കാർലോസ് അൽകാരസ്, പെട്ര ക്വിറ്റോവ, വിക്ടോറിയ അസരങ്ക തുടങ്ങിയ പ്രമുഖർ നാലാം റൗണ്ടിൽ പ്രവേശിച്ചു. സ്പാനിഷ് താരമായ നദാൽ പുരുഷ സിംഗ്ൾസിൽ ഫ്രാൻസിന്റെ റിച്ചാർഡ് ഗാസ്ക്വറ്റിനെയാണ് മൂന്നാം റൗണ്ടിൽ തോൽപിച്ചത്.
സ്കോർ: 6-0, 6-1, 7-5. അമേരിക്കയുടെ ഫ്രാൻസസ് ടിയാഫോയാണ് അടുത്ത എതിരാളി. അർജന്റൈൻ താരം ഡീഗോ ഷ്വാർട്സ്മാനെ 7-6(7), 6-4, 6-4 സ്കോറിനാണ് ടിയാഫോ മൂന്നാം റൗണ്ടിൽ വീഴ്ത്തിയത്. നദാലിന്റെ പിൻഗാമിയെന്ന വിശേഷണമുള്ള സ്പാനിഷ് കൗമാരതാരം കാർലോസ് അൽകാരസ് അമേരിക്കയുടെ ജെൻസൻ ബ്രൂക്സ്ബിയെ 6-3, 6-3, 6-3 പരാജയപ്പെടുത്തി. ക്വാർട്ടർ തേടി റഷ്യയുടെ ആന്ദ്രെ റബ് ലേവിനെതിരെ പോരിനിറങ്ങും അൽകാരസ്.വനിത സിംഗ്ൾസ് മൂന്നാം റൗണ്ടിൽ ലോക ഒന്നാംനമ്പർ താരം കൂടിയായ പോളണ്ടുകാരി ഇഗാ സ്വൈറ്റക് അമേരിക്കയുടെ ലോറൻ ഡേവിസിനെ 6-3, 6-4ന് കീഴ്പ്പെടുത്തി.
ചൈനീസ് കൗമാരതാരം ഴെങ് ക്വിൻവെനെ തോൽപിച്ചെത്തിയ ജർമനിയുടെ ജൂലി നീമിയറാണ് അടുത്ത പ്രതിയോഗി. ചെക് റിപ്പബ്ലിക് കാരിയായ പെട്ര ക്വിറ്റോവ 5-7, 6-3, 7-6 (12/10) സ്കോറിൽ സ്പാനിഷ് താരം ഗാർബിൻ മുഗുറുസയെയാണ് മറികടന്നത്. അമേരിക്കയുടെ ജെസീക പഗുലയെ നാലാം റൗണ്ടിൽ നേരിടും.
ബെലറൂസിന്റെ അറീന സബലെങ്ക ഫ്രഞ്ച് പുതുമുഖം ക്ലാര ബ്യൂറലിനെ 6-0, 6-2നും മടക്കി. അമേരിക്കയുടെ ഡാനിയേൽ കോളിൻസാണ് ഇനി എതിരാളി. ബെലറൂസിന്റെ തന്നെ വിക്ടോറിയ അസരെങ്ക 6-3, 6-0ന് ക്രൊയേഷ്യയുടെ പെട്ര മാർട്ടിക്കിനെ അനായാസം തോൽപിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.