ഹാങ്ചോ: ഏഷ്യന്‍ ഗെയിംസ് ടെന്നിസ് മിക്സഡ് ഡബിള്‍സില്‍ ഇന്ത്യയുടെ രോഹന്‍ ബൊപ്പണ്ണ-ഋതുജ ഭോസാലെ സഖ്യത്തിന് സ്വർണം. ഫൈനലിൽ ചൈനീസ് തായ്പേയിയുടെ ലിയാങ് എൻ ഷുവോ ലിയാങ്-സുങ് ഹാവോ ഹുവാങ് സഖ്യത്തെ ടൈബ്രേക്കറിലേക്ക് നീണ്ട മത്സരത്തിൽ 2-6, 6-3, 10-4 എന്ന സ്കോറിനാണ് പരാജയപ്പെടുത്തിയത്. ശനിയാഴ്ചത്തെ ഇന്ത്യയുടെ ആദ്യ സ്വർണമാണിത്. 10 മീറ്റർ എയർ പിസ്റ്റൾ മിക്സഡ് വിഭാഗത്തിൽ സരബ്ജോത് സിങ്-ദിവ്യ തഡിഗോൾ സഖ്യം ഇന്ന് വെള്ളി നേടിയിരുന്നു.
ടെന്നിസ് മിക്സഡ് ഡബിൾസ് സെമിയിൽ ചൈനീസ് തായ്പേയിയുടെ സു യു സിയൂ-ചാന്‍ ഹാവോ ചിങ് സഖ്യത്തെ 6-1, 3-6, 10-4 എന്ന സ്കോറിന് പരാജയപ്പെടുത്തിയാണ് രണ്ടാം സീഡായ ഇന്ത്യന്‍ സഖ്യം ഫൈനലിലേക്ക് മുന്നേറിയിരുന്നത്.
പുരുഷ ഡബിൾസിൽ ഇന്ത്യയുടെ രാംകുമാർ രാമനാഥൻ-സാകേത് മൈനേനി സഖ്യം വെള്ളി നേടിയിരുന്നു. സ്വർണ പ്രതീക്ഷയുമായി ഇറങ്ങിയ ടീം ഫൈനലിൽ ചൈനീസ് തായ്പേയുടെ ജേസൻ-സ്യൂ സഖ്യത്തോട് നേരിട്ടുള്ള സെറ്റുകൾക്ക് പരാജയപ്പെടുകയായിരുന്നു. സ്കോർ: 6-4, 6-4.
നിലവിൽ ഒമ്പത് സ്വർണവും 13 വീതം വെള്ളിയും വെങ്കലവും അടക്കം ഇന്ത്യയുടെ മെഡൽ നേട്ടം 35 ആയി. ഇതിൽ 19ഉം നേടിയത് ഷൂട്ടിങ്ങിലാണ്. ഗെയിംസിൽ ഇന്ന് ഭാരദ്വോഹനത്തിൽ മീരഭായ് ചാനു, ബോക്സർ ലവ്‍ലിന തുടങ്ങിയവർ സ്വർണ പ്രതീക്ഷയോടെ ഇറങ്ങുന്നുണ്ട്. ഹോക്കിയിലെ പൂൾ എ മത്സരത്തിൽ പാകിസ്താനുമായി ഇന്ത്യക്ക് മത്സരമുണ്ട്. പുരുഷ ബാഡ്മിന്റണിൽ ഇന്ത്യൻ ടീം ഇന്ന് സെമിഫൈനലിനിറങ്ങും.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.