ഗോവ ടീം ഉടമക്ക് നേരെ കൈയ്യേറ്റം; ചെന്നൈയിൻ ക്യാപ്റ്റൻ അറസ്റ്റിൽ

മഡ്ഗാവ് (ഗോവ): ഐ.എസ്.എൽ കിരീടം നേടിയ ചെന്നൈയിൻ എഫ്.സിയുടെ ക്യാപ്റ്റൻ എലാനോ ബ്ലൂമർ അറസ്റ്റിൽ. എഫ്.സി ഗോവ ടീം സഹഉടമയും വ്യവസായിയുമായ ദത്തരാജ് സാൽഗോങ്കറെ കൈയ്യേറ്റം ചെയ്തെന്ന പരാതിയിൽ ഗോവ പൊലീസാണ് അറസ്റ്റ് ചെയ്തത്. ബ്ലൂമർ അധിക്ഷേപിച്ചെന്നും കൈയ്യേറ്റം ചെയ്തെന്നും ചൂണ്ടിക്കാട്ടി ഞായറാഴ്ച രാത്രിയാണ് ദത്തരാജ് ഗോവ പൊലീസിന് പരാതി നൽകിയത്.

ഞായറാഴ്ച നടന്ന ഇന്ത്യൻ സൂപ്പർ ലീഗ് ഫുട്ബാൾ ഫൈനലിൽ എഫ്.സി ഗോവയെ തകർത്ത് ചെന്നൈയിൻ എഫ്.സി കിരീടം നേടിയിരുന്നു. വാശിയേറിയ മത്സരത്തിൽ രണ്ടിനെതിരെ മൂന്ന് ഗോളുകൾക്കാണ് ചെന്നൈയിൻ ജേതാവായത്.

ബോളിവുഡ് താരം അഭിഷേക് ബച്ചൻ, എം.എസ് ധോണി, വിദാ ധാനി എന്നിവരാണ് ചെന്നൈയിൻ എഫ്.സിയുടെ ഉടമകൾ. മുൻ ബ്രസീൽ ഫുട്ബാൾ താരമാണ് എലാനോ ബ്ലൂമർ.