മുംബൈ: രാജ്യാന്തര മത്സരങ്ങളിൽ ഇനിയും മിടുക്ക് തെളിയിക്കാനാകാതെ ഉഴറുന്ന ടീം ഇന്ത്യയുടെ നായക പദവി ഹാർദിക് പാണ്ഡ്യയെ ഏൽപിക്കണമെന്ന് ആവശ്യപ്പെട്ട് സെലക്ഷൻ കമ്മിറ്റി മുൻ ചെയർമാൻ. അടുത്ത ട്വന്റി20 ലോകകപ്പിൽ ഇന്ത്യയെ ഉയരങ്ങൾ പിടിക്കാൻ സഹായിക്കാൻ ഇത് ആവശ്യമാണെന്നും മാസ് ഹിറ്റർ കൂടിയായിരുന്ന കൃഷ്ണമാചാരി ശ്രീകാന്ത് പറഞ്ഞു.
ആസ്ട്രേലിയയിൽ നടന്ന ട്വന്റി20 ലോകകപ്പിൽ ഇന്ത്യ സെമിയിൽ ഇംഗ്ലണ്ടിനോട് 10 വിക്കറ്റിന് തോറ്റ് പുറത്തായിരുന്നു. അവസാന ആറു ലോകകപ്പുകളിൽ അഞ്ചാം തവണത്തെയായിരുന്നു നോക്കൗട്ടിൽ മടക്കം.
'ഞാൻ സിലക്ഷൻ കമ്മിറ്റി ചെയർമാനായിരുന്നെങ്കിൽ അടുത്ത ലോകകപ്പ് ടീമിന്റെ ക്യാപ്റ്റൻ ഹാർദിക് ആകണമെന്ന് പറയും. ന്യൂസിലൻഡ് പരമ്പരയോടെ അടുത്ത ടീമിനെ വീണ്ടും വാർത്തെടുക്കുന്ന ജോലി തുടങ്ങുകയും വേണം''- ശ്രീകാന്ത് പറഞ്ഞു.
രണ്ടു വർഷം മുമ്പ് ലോകകപ്പ് ഒരുക്കങ്ങൾ ആരംഭിച്ചേ തീരു എന്നാലേ ആവശ്യമായ തെറ്റുതിരുത്തൽ നടത്താനാകൂ എന്നും സ്വകാര്യ ടെലിവിഷൻ ചാനലിന് നൽകിയ അഭിമുഖത്തിൽ അദ്ദേഹം പറഞ്ഞു.
അടുത്ത വെള്ളിയാഴ്ച ആരംഭിക്കുന്ന ന്യൂസിലൻഡ് പരമ്പരയിൽ മൂന്ന് ട്വന്റി20കളും അത്രതന്നെ ഏകദിനങ്ങളുമാണ് ഇന്ത്യ കളിക്കുക. ട്വന്റി20യിൽ നായകനായി ഹാർദികിനാണ് ചുമതല.
ടീം ഇന്ത്യക്ക് ഫാസ്റ്റ് ബൗളിങ് ഓൾറൗണ്ടർമാർ കൂടുതൽ ആവശ്യമാണെന്നും ശ്രീകാന്ത് കൂട്ടിച്ചേർത്തു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.