വല്യേട്ടന്‍

മറാത്ത രാഷ്ട്രീയത്തിൽ ദാദ എന്നാണ് പേര്. വല്യേട്ടൻ എന്ന൪ഥം. ഏതുകാലവും ദാദയായി വാഴാമെന്നായിരുന്നു അജിത് അനന്തറാവു പവാറിൻെറ മനസ്സിലിരിപ്പ്. എന്നാൽ, ശരിക്കുള്ള ദാദ ആരാണെന്ന് അജിത്തിന് കാണിച്ചുകൊടുത്തിരിക്കുകയാണ് ശരദ്പവാ൪. ‘പവാ൪ വേഴ്സസ് പവാ൪’ മസാലനാടകമാണ് കാഴ്ചക്കാ൪ പ്രതീക്ഷിച്ചത്. ചിറ്റപ്പനും മകനും  തമ്മിലുള്ള യുദ്ധം. സംഗതി അത്രക്കൊന്നും വള൪ന്നില്ല;വഷളായതുമില്ല. ദാദ ഉപമുഖ്യമന്ത്രിയാവുന്നതിനു മുമ്പ് പത്തുകൊല്ലം ജലസേചനമന്ത്രിയായിരുന്നു. കൈയിട്ടുവാരാൻ കോടികളുള്ള വകുപ്പ്. നാഷനൽ കറപ്ഷൻ പാ൪ട്ടി എന്നു വിളിക്കപ്പെടുന്ന കക്ഷിയുടെ അമരത്തിരിക്കുമ്പോൾ കറപ്ഷൻ നടത്താതെ പോവരുതല്ലോ. 1999 മുതൽ 2009വരെ പദ്ധതികൾ അനുവദിച്ചപ്പോൾ ഒന്നും രണ്ടുമല്ല 35,000 കോടിയുടെ അഴിമതിയാണ് നടന്നത്. ജലസേചന പദ്ധതികൾക്ക് പണം ചെലവിട്ടതുമായി ബന്ധപ്പെട്ട് ധവളപത്രമിറക്കാൻ മുഖ്യമന്ത്രി പൃഥ്വീരാജ് ചവാനിൽ സമ്മ൪ദമുണ്ടായി. അപ്പോൾ അജിത്തിന് ഒരു ഉൾവിളി. അന്വേഷണങ്ങളോട് നീതിപുല൪ത്താൻ രാജിവെക്കണം. നേരെ മുഖ്യമന്ത്രി കാര്യാലയത്തിൽ പോയി രാജിക്കത്ത് കൊടുത്തിട്ടുപോന്നു. അപ്പോഴും ദാദ ദാദ തന്നെയായിരുന്നു. രാജിവെച്ചപ്പോൾ മുന്നണിബന്ധമൊന്ന് ഉലഞ്ഞു. അപ്പോൾ അതാ വരുന്നു റിയൽ ദാദ.  മറ്റാരുമല്ല എൻ.സി.പിയുടെ അധ്യക്ഷൻ ശരദ്പവാ൪. രാജിസ്വീകരിച്ചുകൊണ്ട് യഥാ൪ഥ ബോസ് താൻ തന്നെയെന്ന് അദ്ദേഹം അടിവരയിട്ട് പറഞ്ഞു. വല്യേട്ടൻെറ വലുപ്പം നിന്നനിൽപിൽ കുറഞ്ഞു. കുള്ളനെപ്പോലെയാണിപ്പോൾ നിൽപ്. മുതുകിൽ കോടികളുടെ അഴിമതിയുടെ പാപഭാരം.
പിതാവിൻെറ കാൽപാടുകൾ പിന്തുട൪ന്നിരുന്നെങ്കിൽ പേര് ബോളിവുഡിലാവുമായിരുന്നു.പകരം അജിത് തെരഞ്ഞെടുത്ത വഴി ചിറ്റപ്പൻ ശരദ്പവാറിൻേറത്. അജിത്തിൻെറ പിതാവ് അനന്തറാവു ശരദ്പവാറിൻെറ മൂത്ത സഹോദരനാണ്. വിഖ്യാത ഹിന്ദിസംവിധായകൻ വി. ശാന്താറാമിനൊപ്പം  രാജ്കമൽ സ്റ്റുഡിയോവിൽ പ്രവ൪ത്തിച്ചിട്ടുണ്ട് അദ്ദേഹം. ചിറ്റപ്പൻ മറാത്ത രാഷ്ട്രീയത്തിൻെറ അമരക്കാരനാവുന്നതും മുഖ്യമന്ത്രിയും കേന്ദ്രമന്ത്രിയുമൊക്കെയാവുന്നതും കണ്ട അജിത് സ്വന്തം ജീവിതഭാഗധേയത്തിന് രാഷ്ട്രീയത്തിൻെറ വഴിതന്നെ തെരഞ്ഞെടുത്തു.
ഇപ്പോൾ അമ്പത്തിമൂന്ന് വയസ്സുണ്ട്. മറാത്തയിലെ പ്രബലനായ രാഷ്ട്രീയക്കാരനാണ്. എഴുപതു മണിക്കൂറ് സംസ്ഥാനത്തെ മുൾമുനയിൽ നി൪ത്തിയ രാഷ്ട്രീയ പ്രതിസന്ധിയുടെ പ്രഭവകേന്ദ്രം. ചിറ്റപ്പനുമായി അധികാര കിടമത്സരത്തിനുള്ള സാധ്യത കണ്ടവ൪ ഏറെ. അജിത്തും  മത്സരത്തിൽ ഒട്ടും മോശമല്ല. എൻ.സി.പി എന്നു പറയപ്പെടുന്ന പാ൪ട്ടിയുണ്ടാക്കിയത് ശരദ്പവാ൪. പാ൪ട്ടിയുടെ ബോസും പവാ൪തന്നെ. പക്ഷേ, സംസ്ഥാന ഘടകത്തിൽ പ്രബലൻ അജിത് പവാ൪. നിരവധി അനുയായികളുണ്ട് അജിത്തിന്. സംസ്ഥാനത്തെ മുതി൪ന്ന പാ൪ട്ടി നേതാവായി അണികൾ കാണുന്നതും മറ്റാരെയുമല്ല. അതുകൊണ്ടുതന്നെ പവാ൪ വേഴ്സസ് പവാ൪ യുദ്ധം കാണാൻ കണ്ണു തുറിച്ചിരിക്കുന്നവരുണ്ട്.
 ഒരുനാൾ ഞാനും ചിറ്റപ്പനെപ്പോലെ വളരും വലുതാവും. ഒരുനാൾ നാടു ഭരിക്കും എന്നു മനസ്സിൽ പാടി നടന്നിരുന്ന ഒരു കാലമുണ്ട്. മഹാരാഷ്ട്ര മുഖ്യമന്ത്രിയുടെ കസേരയിൽ ഒന്ന് അമ൪ന്നിരിക്കണമെന്നായിരുന്നു ആഗ്രഹം. 2009ൽ നടന്ന നിയമസഭാ തെരഞ്ഞെടുപ്പിൽ ഉപമുഖ്യമന്ത്രി സ്ഥാനം കിട്ടുമെന്നു കരുതി. പക്ഷേ, ആ മോഹത്തിന് 2010 ഡിസംബ൪ വരെ കാത്തിരിക്കേണ്ടിവന്നു. ഛഗൻ ഭുജ്പാലിൻെറ സ്ഥാനത്ത് അവരോധിക്കപ്പെട്ടത് അന്നാണ്. ഉപമുഖ്യമന്ത്രിയുടെ പ്രധാന എതിരാളി പ്രതിപക്ഷ നേതാവൊന്നുമല്ല. മുഖ്യമന്ത്രി തന്നെയാണ്.  പൃഥ്വീരാജ് ചവാൻ. തുറന്ന യുദ്ധം തന്നെ പ്രഖ്യാപിച്ചിരിക്കുകയാണ് ചവാന് എതിരെ. കോൺഗ്രസിൽ പോലും ചവാന് എതിരെ കുത്തിത്തിരിപ്പുണ്ടാക്കാൻ ശ്രമിച്ചിട്ടുണ്ട്.
ചവാൻ മാത്രമല്ല എതിരാളി എന്ന് പത്രലോകത്തെ അപസ൪പ്പകവിദഗ്ധ൪ കണ്ടെത്തിയിട്ടുണ്ട്. സഹോദരി സുപ്രിയ സുലെയെയാണ് അവ൪ ചൂണ്ടിക്കാട്ടുന്നത്. എൻ.സി.പി എം.പിയും ശരദ്പവാറിൻെറ മകളുമായ സുപ്രിയക്ക് സംസ്ഥാന ഘടകത്തിൽ പിടിമുറുക്കാനുള്ള അടവുകളാണ് ഇപ്പോഴത്തെ പ്രതിസന്ധിക്ക് കാരണമെന്ന് കരുതുന്നവരും കുറവല്ല. ആങ്ങളക്ക് ഒരു എതിരാളിയാവാൻ താനില്ലെന്ന് സുപ്രിയ തുറന്നു പറഞ്ഞിട്ടുണ്ടെങ്കിലും അത് വിശ്വസിക്കാൻ അണികളിൽ പലരും തയാറായിട്ടില്ല. 2014ലെ നിയമസഭാ തെരഞ്ഞെടുപ്പിൽ വിജയം നേടുകയാണെങ്കിൽ അജിത് ദാദയെ മുഖ്യമന്ത്രിയായി കാണാനാണ് ഇഷ്ടമെന്ന് സുപ്രിയ പറയുന്നുണ്ട്. പാ൪ട്ടിയിലെ ഭിന്നതകൾ മറച്ചുവെക്കാൻ പക്ഷേ, ഈ പ്രസ്താവനകളൊന്നും മതിയാവില്ല. പവാ൪ കുടുംബത്തിൻെറ കൈയിലാണ് മറാത്ത നാടും അവിടത്തെ പ്രകൃതിവിഭവങ്ങളും. അജിത് ദാദ വന്നാലും സുപ്രിയ വന്നാലും മാറ്റങ്ങളൊന്നും ഉണ്ടാവാൻ പോകുന്നില്ല.
രാജിവെച്ചതുകൊണ്ട് ദാദക്ക് നഷ്ടമൊന്നുമില്ല എന്നു കരുതുന്ന രാഷ്ട്രീയ നിരീക്ഷകരുണ്ട്. മുഖ്യമന്ത്രി ചവാന് എതിരെ മുൻകൂട്ടി ഒരു ആക്രമണം നടത്താൻ അജിതിന് അതുകൊണ്ട് കഴിഞ്ഞു എന്നാണ് അവ൪ പറയുന്നത്. അജിത് 24x7 രാഷ്ട്രീയക്കാരൻ എന്നാണ് അറിയപ്പെടുന്നത്. നിലപാടുകളിൽ കാ൪ക്കശ്യമുണ്ട്. പാ൪ട്ടിയിൽ നല്ല പിടിപാടുണ്ട്. അങ്ങനെയുള്ള ഒരാൾ രാജി സമ൪പ്പിക്കുമ്പോൾ അത് പിൻവലിക്കാനുള്ളതായിരിക്കില്ല. പിൻവലിക്കാനായിരുന്നെങ്കിൽ സമ൪പ്പിക്കില്ലായിരുന്നു. രാജിവെക്കുന്ന ആദ്യ മറാത്താ നേതാവ് ആയതുകൊണ്ടുതന്നെ വ്യക്തമായും അതൊരു  രാഷ്ട്രീയ നീക്കമായിരുന്നു. ചവാന് എതിരെയുള്ള പടയൊരുക്കം. എൻ.സി.പി എം.എൽ.എമാരിൽ അമ്പതോളം പേരും സ്വതന്ത്രരിൽ ഭൂരിഭാഗം പേരും അജിത്തിനോടു വിശ്വസ്തത പുല൪ത്തുന്നവരാണ്. ഉപമുഖ്യമന്ത്രിസ്ഥാനം രാജിവെച്ചുവെങ്കിലും നിയമസഭാകക്ഷി നേതാവായി തുടരും. അതുകൊണ്ടുതന്നെ ഇനിയുള്ള നാളുകളിൽ പ്രതിപക്ഷത്തേക്കാൾ വലിയ തലവേദന ചവാന് നൽകുക അജിത്തും കൂട്ടരുമായിരിക്കും. അടുത്ത തെരഞ്ഞെടുപ്പുവരെയുള്ള ഒന്നരക്കൊല്ലം പാ൪ട്ടി പ്രബലമാക്കാനായിരിക്കും അജിത്തിൻെറ ശ്രമം.
1959 ജൂലൈ 22ന് ജനിച്ചു. വാണിജ്യത്തിലാണ് ബിരുദം. എന്നാലും കൃഷിക്കാരനായി അറിയപ്പെടാനാണ് ആഗ്രഹം. രാഷ്ട്രീയത്തിൽ പ്രവേശിച്ചത് കുടുംബവഴികളിലൂടെ തന്നെ. 1982ൽ പഞ്ചസാര സഹകരണസംഘത്തിൻെറ പ്രാദേശികഘടകത്തിലേക്ക് തെരഞ്ഞെടുക്കപ്പെട്ടുകൊണ്ടാണ് രാഷ്ട്രീയപ്രവേശം. 1991ൽ പുണെ ജില്ലാ കോഓപറേറ്റീവ് ബാങ്ക് ചെയ൪മാനായി. പതിനാറു വ൪ഷം ആ പദവിയിൽ തുട൪ന്നു. അക്കാലത്താണ് ബരാമതി ലോക്സഭാ മണ്ഡലത്തിൽനിന്ന് തെരഞ്ഞെടുക്കപ്പെടുന്നത്. നരസിംഹറാവു സ൪ക്കാറിൽ പ്രതിരോധമന്ത്രിയായ ചിറ്റപ്പനു വേണ്ടി ആ സീറ്റ് ഒഴിച്ചിടേണ്ടിവന്നു അജിത്തിന്. പിന്നീട് നിയമസഭയിലെത്തി കൃഷി,വൈദ്യുതിമന്ത്രിയായി. ദേശീയ രാഷ്ട്രീയത്തിൽനിന്നും സംസ്ഥാനത്തേക്കു തിരിച്ചുവന്ന ശരദ്പവാ൪ കോൺഗ്രസ് മുഖ്യമന്ത്രിയായപ്പോൾ അജിത് പല വകുപ്പുകളിലും സഹമന്ത്രിയായി. 1999ൽ ചിറ്റപ്പൻ സോണിയയുടെ വിദേശജന്മത്തിൽ പ്രതിഷേധിച്ച് കോൺഗ്രസ് വിട്ടപ്പോൾ അജിത്തും കൂടെക്കൂടി. അധികാരരാഷ്ട്രീയത്തിൻെറ നാണം കെട്ട കൊടുക്കൽ വാങ്ങലുകളിൽ കോൺഗ്രസും എൻ.സി.പിയും തമ്മിൽ ബാന്ധവം തുടങ്ങി. അങ്ങനെ നാൽപതാം വയസ്സിൽ വിലാസ് റാവു ദേശ്മുഖ് സ൪ക്കാറിൽ അജിത് പവാ൪ ഏറ്റവും പ്രായം കുറഞ്ഞ കാബിനറ്റ് മന്ത്രിയായി.അന്നാണ് ജലസേചനമന്ത്രിയായത്. പത്തുകൊല്ലമാണ് ആ കസേരയിലിരുന്നത്. നാടൊട്ടുക്കും ജലസേചനം നടത്തിയപ്പോൾ ഒഴുകിപ്പോയത് കോടികൾ. ശതകോടികളുടെ അഴിമതി ആരോപണമാണ് നേരിടുന്നത്. നിരപരാധിയാണെന്ന് തെളിയുവോളം സ൪ക്കാറിൻെറ ഭാഗമാവാൻ കഴിയില്ല. പത്തുവ൪ഷം വകുപ്പിൻെറ അമരക്കാരനായിരുന്ന അജിത്തിന് ജലസേചന കുംഭകോണത്തിൻെറ ധാ൪മിക ഉത്തരവാദിത്തത്തിൽനിന്ന് ഒളിച്ചോടാനാവില്ല.
ചിറ്റപ്പൻ ജീവിച്ചിരിക്കുന്ന കാലത്തോളം അജിത്തിന്് വല്യേട്ടനാവാൻ കഴിയില്ല എന്ന് ഒരിക്കൽകൂടി തെളിയിക്കുന്നു ഇപ്പോഴത്തെ രാജിനാടകം. സാമൂഹിക പ്രവ൪ത്തകയായ സുനേത്രയാണ് ഭാര്യ. രണ്ട് ആൺമക്കളുണ്ട്.