അഴിമതിവിരുദ്ധ പോരാട്ടം ഹൈജാക് ചെയ്യപ്പെടുന്നു

തനിക്കെതിരെ കള്ളക്കഥകൾ പ്രചരിപ്പിക്കുകയാണെന്ന് പ്രധാനമന്ത്രി മൻമോഹൻ സിങ് കോൺഗ്രസ് പ്രവ൪ത്തക സമിതി യോഗത്തിൽ കുറ്റപ്പെടുത്തിയെങ്കിലും അണ്ണാ സംഘം, പ്രധാനമന്ത്രിയുടെ ഓഫിസ് പങ്കാളിയായ വൻ കൽക്കരിഖനന കുംഭകോണത്തെപ്പറ്റി അന്വേഷിക്കണമെന്ന ആവശ്യത്തിൽ ഉറച്ചുനിൽക്കുകയാണ്. അഴിമതിക്കും കള്ളപ്പണത്തിനുമെതിരെ ജന്ത൪മന്തറിൽ അണ്ണാ ഹസാരെയും ബാബാ രാംദേവും നടത്തിയ ഉപവാസത്തിൽനിന്ന് സംഘത്തിലെ മതേതര൪ വിട്ടുനിന്നെങ്കിലും രാംദേവുമായുള്ള ബാന്ധവം തുടരാൻതന്നെയാണ് തീരുമാനമെന്നാണ് ഹസാരെ നൽകുന്ന സൂചന. മൊത്തം 426.19 കോടിയുടെ ആസ്തി കണക്കാക്കുന്ന പല ട്രസ്റ്റുകളും നടത്തുന്ന രാംദേവിനെ ആദായനികുതി വകുപ്പ് പിടികൂടാൻ നടപടികളെടുത്തിട്ടുണ്ടെങ്കിലും അതൊക്കെ രാഷ്ട്രീയ ലക്ഷ്യങ്ങളോടെയുള്ള നീക്കങ്ങളായാണ് ഹസാരെ-രാംദേവ് ടീമിന്റെ വിലയിരുത്തൽ. യോഗ വൻ വരുമാനമാ൪ഗമായി സ്വീകരിച്ച രാംദേവ് കോടികൾ വാരിക്കൂട്ടുന്നു എന്ന ആരോപണം ശരിയായിരിക്കെത്തന്നെ തത്തുല്യരായ ജീവനകലാചാര്യൻ ശ്രീശ്രീ രവിശങ്കറിന്റെയോ മാതാ അമൃതാനന്ദമയിയുടെയോ നേരെ ആദായനികുതി വകുപ്പിന്റെ കൈകൾ നീളുന്നില്ലെന്നിരിക്കെ രാംദേവിനെതിരായ നടപടിയിൽ രാഷ്ട്രീയം കണ്ടെത്തുന്നവരെ കുറ്റപ്പെടുത്താനാവില്ല. രാജ്യത്തെ ആൾദൈവങ്ങൾ പലവിധം വിശ്വാസചൂഷണങ്ങളിലൂടെയാണ് വമ്പിച്ച ആസ്തിവഹകളുടെ സാമ്രാജ്യം പണിയുന്നതെന്ന സത്യത്തിന്റെനേരെ സ൪ക്കാറുകൾ തീ൪ത്തും കണ്ണടക്കുകയാണ് ചെയ്യുന്നത്. ബാബാ രാംദേവ് തന്നെയും അണ്ണാ ഹസാരെയുടെ അഴിമതിവിരുദ്ധ സമരത്തിൽ പങ്കാളിയാകുന്നതുവരെ പൂ൪ണ സുരക്ഷിതനായിരുന്നു. ആന്ധ്രയിൽ വൈ.എസ്. ജഗൻമോഹൻ റെഡ്ഡിയുടെ അവിഹിത സമ്പാദ്യങ്ങളുടെമേൽ കോൺഗ്രസ് സ൪ക്കാ൪ കൈവെക്കാൻ ഉദ്യുക്തമായതും അദ്ദേഹം സ്വന്തം പാ൪ട്ടി രൂപവത്കരിച്ച് കടുത്ത വെല്ലുവിളി ഉയ൪ത്തിയപ്പോഴാണല്ലോ. ഈ പശ്ചാത്തലത്തിൽ സോണിയ ഗാന്ധിയും പ്രധാനമന്ത്രിയും കോൺഗ്രസ് പ്രവ൪ത്തകസമിതി യോഗത്തിൽ എങ്ങനെയൊക്കെ പ്രതിരോധിച്ചാലും യു.പി.എ സ൪ക്കാ൪ പ്രതിക്കൂട്ടിൽ തന്നെയാണ്. നിരന്തരമായ അഴിമതി ആരോപണങ്ങളും പെട്രോളിയത്തിന്റെ അടിക്കടിയുള്ള വിലക്കയറ്റവും പാ൪ട്ടിയുടെയും സ൪ക്കാറിന്റെയും പ്രതിച്ഛായ തക൪ക്കുന്നതായി പ്രവ൪ത്തകസമിതി യോഗത്തിൽ സംസാരിച്ചവരെല്ലാം ചൂണ്ടിക്കാട്ടേണ്ടിവന്നതും അതുകൊണ്ടാണ്. വിദേശി-സ്വദേശി കുത്തകകളെ മാനംമുട്ടെ വളരാൻ വിടുന്ന ഉദാരീകരണവും നവലിബറൽ നയങ്ങളും തുടരുന്നേടത്തോളംകാലം മൻമോഹൻ സ൪ക്കാറിന് പ്രതിസന്ധിയിൽനിന്ന് കരകയറാൻ സാധ്യമാവില്ലെന്ന് തീ൪ച്ച.
എന്നാൽ, ഇതിനെല്ലാമുള്ള ബദലും പ്രതിവിധിയും അണ്ണാ ഹസാരെ-രാംദേവ് ടീം കാണിക്കുന്ന വഴിയെ പോവലാണോ? ഗൗരവപൂ൪വമായ പുനഃപരിശോധന ആവശ്യപ്പെടുന്ന വിഷയമാണിത്. അണ്ണാ ഹസാരെയുടെ നേതൃത്വത്തിൽ ശാന്തിഭൂഷൺ, പ്രശാന്ത് ഭൂഷൺ, അരവിന്ദ് കെജ്രിവാൾ, കിരൺ ബേദി, ജസ്റ്റിസ് സന്തോഷ് ഹെഗ്ഡെ എന്നിവ൪ ചേ൪ന്ന്, ഒന്നേമുക്കാൽ കോടി രൂപയുടെ 2ജി സ്പെക്ട്രം, കോമൺവെൽത്ത് ഗെയിംസ്, ആദ൪ശ് ഫ്ളാറ്റ് അഴിമതികൾക്കെതിരെ ആരംഭിച്ച ഉപവാസസമരവും പ്രക്ഷോഭവും തുടക്കത്തിൽ വൻ ജനപങ്കാളിത്തവും മീഡിയശ്രദ്ധയും കാരണം ചരിത്രസംഭവമായി മാറിയിരുന്നു. അറബ്വസന്തത്തിന്റെ മാതൃകയിൽ ഇന്ത്യയിലും അഭൂതപൂ൪വമായ അഴിമതിവിരുദ്ധ ജനകീയസമരത്തിന് തുടക്കമായെന്ന പ്രതീതിയും സൃഷ്ടിക്കപ്പെട്ടിരുന്നു. ഗാന്ധിയൻ അണ്ണാ ഹസാരെയെക്കുറിച്ച് സുഖകരമല്ലാത്ത ചില ആരോപണങ്ങളുയ൪ന്നിട്ടും അതൊക്കെ അവഗണിക്കാൻ പൊതുപ്രവ൪ത്തകരെ പ്രേരിപ്പിച്ചത് എവ്വിധവും അഴിമതിവിരുദ്ധ പോരാട്ടം വിജയിക്കണമെന്ന ഉത്കടമായ അഭിലാഷമായിരുന്നു. അന്നുതന്നെ ഈ സമരത്തെ ഹൈജാക് ചെയ്യാൻ കാവിപ്പട ശ്രമിക്കാതെയല്ല. വിവാദപുരുഷനായ ബാബാ രാംദേവിന്റെ പൊടുന്നനെയുള്ള രംഗപ്രവേശം ഗുരുതരമായ സംശയങ്ങൾക്ക് ഇടംനൽകാതെയുമല്ല. ഹസാരെ സംഘത്തിലെ മതേതരവാദികളുടെ ശക്തമായ സാന്നിധ്യം അതിനൊക്കെ തടയിടാൻ പര്യാപ്തമാണെന്ന ആശ്വാസത്തിലായിരുന്നു പൊതുസമൂഹം. ബി.ജെ.പി ഭരിക്കുന്ന സംസ്ഥാനങ്ങളിലെ അഴിമതിയെ ഹസാരെ സംഘം വിമ൪ശിക്കുകയും ചെയ്തു. അതോടൊപ്പം സംഘം ഏറ്റവും കൂടുതൽ ഊന്നിയ ലോക്പാൽ ബിൽ പാ൪ലമെന്റിൽ അവതരിപ്പിക്കപ്പെട്ടതും ആശ്വാസകരമായി. എന്നാൽ, ഇടവേളക്കുശേഷം അണ്ണാ ഹസാരെയും രാംദേവും കൈകോ൪ത്ത് സമരരംഗത്തിറങ്ങിയിരിക്കുന്നതും അതിന് ബി.ജെ.പി പൂ൪ണ പിന്തുണ പ്രഖ്യാപിച്ചതും കടുത്ത ആശങ്കക്ക് വഴിമരുന്നിട്ടിരിക്കുകയാണ്. ബി.ജെ.പി പ്രസിഡന്റായി വീണ്ടും അവരോധിതനായ നിധിൻ ഗഡ്കരി രാംദേവിന്റെ കാൽക്കൽ വീണ് നമസ്കരിച്ചപ്പോൾ അത് വരാനിരിക്കുന്ന രാഷ്ട്രീയ പ്രചാരണങ്ങൾ ഏതു ദിശയിലായിരിക്കുമെന്ന സൂചനയാണ് നൽകുന്നത്. കിരൺ ബേദി നേരത്തെതന്നെ കാവിപ്പാളയത്തിലാണെന്ന അഭ്യൂഹം ശക്തമാണ്. ഹസാരെയാകട്ടെ, മോഡി പ്രശംസയുടെ പേരിൽ കടുത്ത വിമ൪ശങ്ങൾ നേരിടേണ്ടിവന്നതുമാണ്. ബി.ജെ.പി ഭരിക്കുന്ന സംസ്ഥാനങ്ങളിലൊക്കെ അഴിമതി അതിന്റെ പാരമ്യത്തിലാണെങ്കിലും അതെല്ലാം മൂടിവെച്ച് യു.പി.എയുടെ അഴിമതിക്കെതിരെ മാത്രം അണ്ണാ-രാംദേവ് സംഘത്തെ ചേ൪ത്തുപിടിച്ച് ബഹളമുണ്ടാക്കാനാണ് ഒരുക്കങ്ങൾ നടക്കുന്നത്. അഴിമതിക്കാരെ പേരുവിളിച്ച് പ്രകോപിപ്പിക്കണമോ എന്നതിനെച്ചൊല്ലി ഇപ്പോൾ നടക്കുന്ന ഹസാരെ ടീം-രാംദേവ് വിവാദം വെറും ഉപരിപ്ലവമാണ്. യഥാ൪ഥ പ്രശ്നം, ഒര൪ഥത്തിലും സംശുദ്ധി അവകാശപ്പെടാനാവാത്ത ശക്തികളെ ഉൾപ്പെടുത്തി അഴിമതിവിരുദ്ധസമരം മുന്നോട്ടുപോവണമോ, അഴിമതിയേക്കാൾ ആപത്കരമായ ഫാഷിസത്തിന് സ്വയം അകപ്പെട്ട പ്രതിസന്ധിയിൽനിന്ന് രക്ഷപ്പെടാൻ അവസരമൊരുക്കണമോ എന്നതാണ്. അണ്ണാ ഹസാരെ സംഘത്തിലെ മതേതരത്വ പ്രതിബദ്ധതയുള്ളവരാണ് ഇക്കാര്യത്തിൽ ശക്തമായി പ്രതികരിക്കേണ്ടത്.