ബംഗളൂരു: തെരഞ്ഞെടുപ്പ് മുന്നൊരുക്കത്തിനായുള്ള കോൺഗ്രസ് യോഗത്തിനിടെ മുൻ എം.എൽ.എ കുഴഞ്ഞുവീണ് മരിച്ചു. ഗദക് ജില്ലയിലെ ബിദരൂർ റോണ നിയമസഭ മണ്ഡലത്തിലെ മുൻ എം.എൽ.എ ശ്രീശൈലപ്പ ബിദരൂർ ആണ് മരിച്ചത്. ബംഗളൂരു വർത്തൂരിൽ പാർട്ടി സ്ഥാനാർഥികളുമായി ബന്ധപ്പെട്ട യോഗത്തിനിടെയാണ് സംഭവം.
കുഴഞ്ഞുവീണയുടൻ അദ്ദേഹത്തെ സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ബിദരൂർ റോണ, ഗദക് എന്നീ മണ്ഡലങ്ങളിൽനിന്ന് രണ്ടു തവണ അദ്ദേഹം എം.എൽ.എയായി തിരഞ്ഞെടുക്കപ്പെട്ടിട്ടുണ്ട്.
ലിംഗായത്തുകൾക്കിടയിൽ സ്വാധീനമുള്ള നേതാവുകൂടിയായ ശ്രീശൈലപ്പ ബിദരൂർ മുമ്പ് ബി.ജെ.പിയിലായിരുന്നപ്പോൾ മുൻ മുഖ്യമന്ത്രി ബി.എസ്. യെദിയൂരപ്പയുമായി അടുത്ത ബന്ധം സൂക്ഷിച്ചിരുന്നയാളാണ്.
2018 നിയമസഭ തെരഞ്ഞെടുപ്പിൽ ബി.ജെ.പി സ്ഥാനാർഥി ടിക്കറ്റ് നൽകാതിരുന്നതോടെ പാർട്ടിയിൽനിന്നകന്ന അദ്ദേഹം 2019ൽ കോൺഗ്രസിൽ ചേർന്നു. വരുന്ന നിയമസഭ തെരഞ്ഞെടുപ്പിൽ കോൺഗ്രസ് ടിക്കറ്റിൽ മത്സരിക്കാൻ ഒരുങ്ങവേയാണ് വിയോഗം.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.