കാറുകളുടെ മത്സരയോട്ടമെന്ന് സംശയം തിരുവനന്തപുരം: ദേശീയപാതയിൽ കുമരിച്ചന്ത ജങ്ഷനിൽ കാറിടിച്ച് ബൈക്ക് യാത്രക്കാരൻ മരിച്ചു. തിരുവനന്തപുരം ചാക്ക- കോവളം ബൈപാസിലാണ് കാറിടിച്ച് ബൈക്ക് യാത്രക്കാരൻ മരിച്ചത്. തമിഴ്നാട് തിരുനെൽവേലി സ്വദേശി രമേശ് (30) ആണ് മരിച്ചത്. പൂന്തുറയിൽ ടെക്സ്റ്റൈൽ ജീവനക്കാരനാണ്. ബുധനാഴ്ച രാത്രി 9.30ഒാടെയായിരുന്നു അപകടം. ചാക്ക ഭാഗത്തുനിന്ന് അതിവേഗത്തിൽ സഞ്ചരിച്ച കാർ നിയന്ത്രണം വിട്ട് ദേശീയപാതയിൽനിന്ന് തെന്നിമാറി സർവിസ് റോഡിലേക്ക് പാഞ്ഞുകയറിയതാണ് അപകടത്തിന് കാരണമായത്. ഈ സമയം അതുവഴി വരുകയായിരുന്ന ബൈക്ക് യാത്രക്കാരനെ ഇടിച്ച് തെറിപ്പിച്ചു. നിയന്ത്രണംവിട്ട കാർ സമീപത്തെ മതിലിൽ ഇടിച്ചാണ് നിന്നത്. ഗുരുതരമായി പരിക്കേറ്റ ബൈക്ക് യാത്രക്കാരനെ ഉടൻ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. കാറുകൾ തമ്മിലുള്ള മത്സരയോട്ടമാണ് അപകടകാരണമെന്ന് സംശയിക്കുന്നതായി നാട്ടുകാർ പരാതിപ്പെട്ടു. കാർ ഡ്രൈവർ മദ്യപിച്ചിരുന്നതായും നാട്ടുകാർ പറയുന്നു. ദിവസങ്ങൾക്ക് മുമ്പാണ് അപകടങ്ങൾ പതിവായ ഈ ഭാഗത്ത് ടാങ്കർ ലോറിയിടിച്ച് ദമ്പതികൾ മരിച്ചത്. തുടർന്നുണ്ടായ പ്രതിഷേധം പരിഗണിച്ച് ജങ്ഷനിൽ ഡിവൈഡറുകൾ സ്ഥാപിച്ച് പൊലീസ് നിയന്ത്രണം ഏർപ്പെടുത്തിയിരുന്നു. അതിന് സമീപമാണ് വീണ്ടും അപകടത്തിൽ ഒരാളുടെ ജീവൻ പൊലിഞ്ഞത്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.