റമദാൻ അലിവി​െൻറ വിറയാർന്ന അനുഭവം

റമദാൻ എനിക്ക് അലിവി​െൻറ വിറയാർന്ന അനുഭവമാണ്. വീടിനു നേരേ കാവുമ്പാട് മുസ്ലിം പള്ളിയിൽ ബാങ്ക് വിളിയുടെ മുഴക്കത്തിൽ നിൽക്കുകയാണ് ഞാൻ. എ​െൻറ ഓർമയിൽ റാവുത്തർമാരുടെ നിസ്കാരം കഴിഞ്ഞുള്ള ആ വരവുണ്ട്. പരമകാരുണികനായ അല്ലാഹുവി​െൻറ മണം, പ്രകാശം.... എല്ലാമുണ്ട്. ഒരു സംഭവം പറയാം. വലിയ കാറ്റും മഴയുമുള്ള ഒരു വൈകുന്നേരം. ശക്തമായ ഇടിയും മിന്നലും. പള്ളിയുടെ മിനാരങ്ങളിൽനിന്ന് വരുമ്പോലെ മിന്നൽപ്പിണരുകൾ ഇരുട്ടിലൂടെ പാഞ്ഞുവന്നു. കാറ്റ് ചുറ്റുമുള്ള മരങ്ങളെ ചുഴറ്റുന്നു. അപ്രതീക്ഷിതമായ പ്രകൃതിയുടെ ആഘാതത്തിൽ നിലയറ്റു നിൽക്കുന്ന എ​െൻറയരികിലേക്ക് ഇരുട്ടിൽനിന്ന് ഒരാൾ കയറിവന്നു. ഒരു മുസൽമാൻ. അദ്ദേഹം നനഞ്ഞു കുതിർന്ന് വിറച്ചുകൊണ്ടിരുന്നു. പെട്ടെന്ന് ഇടിവെട്ടി. ഒരു തീഗോളം ആകാശത്തുനിന്ന് എ​െൻറ വീടിനു നേരേവരുന്നു. എന്തു ചെയ്യണമെന്നറിയാതെ മിന്നൽവെട്ടത്തിൽ ഞങ്ങൾ ഭയന്ന് പെട്ടെന്ന് കെട്ടിപ്പിടിച്ചു. അല്ലാഹു അക്ബർ; അദ്ദേഹം ഉച്ചത്തിൽ വിളിച്ചു. ഒരു നിമിഷം എന്തു സംഭവിച്ചു എന്നറിയാതെ ഞങ്ങൾ തേങ്ങി. ഒരു വലിയ ശബ്ദത്തോടെ ആ തീഗോളം വീടിനു മുന്നിൽ നിന്ന മരത്തിൽ തട്ടി മരം ഛിന്നഭിന്നമായി. ചിതറി വീണ മരം പിന്നെ നിന്നുകത്തുകയായിരുന്നു. അരണ്ട വെളിച്ചത്തിൽ ഞങ്ങൾ പരസ്പരം നോക്കി. എത്ര വലിയ ആപത്തിൽനിന്നാണ് ഞാൻ രക്ഷപെട്ടതെന്ന് ചിന്തിച്ചു തുടങ്ങിയപ്പോഴേക്കും അദ്ദേഹം പൊയ്ക്കഴിഞ്ഞിരുന്നു.