കോരപ്പുഴ നടപ്പാലം ചൊവ്വാഴ്ച തുറക്കും

എലത്തൂർ: വെള്ളം പൊങ്ങിയതിനെ തുടർന്ന് പൊളിച്ച കോരപ്പുഴ നടപ്പാലത്തിൻെറ പുനർനിർമാണം പൂർത്തിയായി. പ്രദേശവാസികളുടെയും ഉദ്യോഗസ്ഥരുടെയും നിർബന്ധത്തെ തുടർന്ന് പൊളിച്ച പാലം രണ്ടാഴ്ച കൊണ്ടാണ് പുനർനിർമിച്ചത്. ചൊവ്വാഴ്ച പാലം തുറന്നുകൊടുക്കും. കലക്ടറുടെ നിർദേശപ്രകാരമായിരുന്നു പാലത്തിൻെറ ഭാഗങ്ങൾ പൊളിച്ചത്. അഞ്ചു ലക്ഷത്തിൽപരം രൂപയുടെ നഷ്ടമാണ് പാലം പൊളിച്ചത് മൂലം ഉണ്ടായത്. നടപ്പാലം ഇല്ലാതായതോടെ കോരപ്പുഴയുടെ ഇരുകരകളിലേക്കും പോകേണ്ടവർ യാത്രക്ലേശം നേരിട്ടിരുന്നു. കോരപ്പുഴ അങ്ങാടിയിൽനിന്ന് അഞ്ചു മിനിറ്റ് കൊണ്ട് എത്താവുന്ന എലത്തൂരിലേക്ക് രണ്ടു ബസുകൾ മാറി കയറി ഒരു മണിക്കൂർ യാത്ര ചെയ്താണ് ആളുകൾ പോയിരുന്നത്.