ജെസ്​നയുടെ തിരോധാനം: ക്രൈംബ്രാഞ്ച്​ അന്വേഷണം ആവശ്യപ്പെട്ട്​ ഗ്രാമപഞ്ചായത്ത്​

റാന്നി: കൊല്ലമുള കുന്നത്ത് ജയിംസി​െൻറ മകളും കാഞ്ഞിരപ്പള്ളി എസ്.ഡി കോളജ് ബിരുദ വിദ്യാർഥിയുമായ ജെസ്ന മറിയ ജയിംസി​െൻറ (20) തിരോധാനത്തിൽ ക്രൈംബ്രാഞ്ച് അന്വേഷണം ആവശ്യപ്പെട്ട് വെച്ചൂച്ചിറ പഞ്ചായത്ത് ഭരണസമിതി മുഖ്യമന്ത്രിക്ക് നിവേദനം നൽകി. 26ന് ചേർന്ന പഞ്ചായത്ത് കമ്മിറ്റിയുടെ തീരുമാനപ്രകാരമാണ് പ്രസിഡൻറ് റോസമ്മ സ്കറിയയുടെ നേതൃത്വത്തിൽ മുഖ്യമന്ത്രിക്ക് പരാതി നൽകിയത്. മാർച്ച് 22ന് രാവിലെ ഒമ്പതോടെയാണ് ജെസ്നയെ വീട്ടിൽനിന്ന് കാണാതായത്. 37 ദിവസം പിന്നിെട്ടങ്കിലും തിരോധനം സംബന്ധിച്ച് ഒരു തെളിവും കണ്ടെത്താൻ പൊലീസിനു കഴിഞ്ഞിട്ടില്ല. പൊലീസ് അന്വേഷണം തൃപ്തികരമല്ലാത്ത സാഹചര്യത്തിലാണ് ക്രൈബ്രാഞ്ച് അന്വേഷണം ആവശ്യപ്പെടുന്നതെന്ന് പ്രസിഡൻറ് അറിയിച്ചു. എന്നാൽ, അന്വേഷണം കൂടുതൽ സ്ഥലങ്ങളിലേക്ക് വ്യാപിപ്പിക്കാനാണ് പൊലീസി​െൻറ പ്രത്യേക അന്വേഷണ സംഘത്തിന് ലഭിച്ച നിർദേശം. ജില്ല പൊലീസ് മേധാവി ടി. നാരായണ​െൻറ നേതൃത്വത്തിൽ വെച്ചൂച്ചിറ പൊലീസ് സ്റ്റേഷനിൽ യോഗം ചേർന്ന് അന്വേഷണപുരോഗതി വിലയിരുത്തിയിരുന്നു.