മദ്യപിച്ചെത്തിയ എക്സൈസ് ഉദ്യോഗസ്​ഥനെ നാട്ടുകാർ തടഞ്ഞു

എടത്തല : പുക്കാട്ടുപടിയിൽ കട പരിശോധനയ്ക്ക് മദ്യപിച്ചെത്തിയ എക്സൈസ് ഉദ്യോഗസ്ഥനെ നാട്ടുകാർ തടഞ്ഞു. ഇന്നലെ വൈകീട്ട് അഞ്ചു മണിയോടെ പുക്കാട്ടുപടി വയറോപ്‌സ് ജങ്ഷനില്‍ സ്വകാര്യ വാഹനത്തിൽ ആലുവയില്‍ നിന്നുള്ള എക്‌സൈസ് സംഘമാണ് കട പരിശോധനയ്ക്കായി എത്തിയത്. ഗ്രേപ് ആപ്പിറ്റയിസർ എന്ന പാനീയം വിൽപന നടത്താൻ പാടില്ലെന്ന് പറഞ്ഞാണ് പരിശോധനക്കെത്തിയത്. എന്നാൽ, ഈ പാനീയം മാസങ്ങളായി വിൽക്കുന്നതാണെന്നും ബില്ലുകൾ ഉൾപ്പെടെയുള്ള രേഖകൾ കാണിച്ചതായും കടയുടമ പറഞ്ഞു. ഇതിൽ ഒരു ഉദ്യോഗസ്ഥൻ മദ്യപിച്ചിരുന്നതായി ആരോപിച്ചാണ് നാട്ടുകാർ തടിച്ചുകൂടിയത്. തുടർന്ന് എടത്തല പൊലീസെത്തുകയും മദ്യപിച്ച ഉദ്യോഗസ്ഥനെ പരിശോധിക്കുകയും സ്റ്റേഷനിലേക്ക് കൊണ്ടു പോകുകയും ചെയ്തു.