തിരുവനന്തപുരം: 'കേരള കെയര്' എന്ന പേരില് പാലിയേറ്റീവ് കെയര് ഗ്രിഡ് രൂപീകരിച്ചിരിക്കുകയാണ്. പാലിയേറ്റീവ് കെയര് ഗ്രിഡിന്റെ ലോഞ്ച് മാര്ച്ച് മൂന്നിന് രാവിലെ 11.30 ന് നിയമസഭയിലെ മുഖ്യമന്ത്രിയുടെ ചേംബറില് വച്ച് മുഖ്യമന്ത്രി പിണറായി വിജയന് നിര്വഹിക്കും. മന്ത്രി വീണ ജോര്ജ്, മന്ത്രി എം.ബി. രാജേഷ് എന്നിവര് സന്നിഹിതരാകും. ഈ രീതിയില് മികച്ച മുന്നേറ്റം നടത്തുന്ന കേരളം പാലിയേറ്റീവ് പരിചരണ രംഗത്ത് മറ്റൊരു സുപ്രധാന ഘട്ടത്തിലേക്ക് കടന്നിരിക്കുകയാണെന്ന് മന്ത്രി വീണ ജോർജ് അറിയിച്ചു.
ഇന്ത്യയില് സാന്ത്വന പരിചരണ പ്രവര്ത്തനങ്ങള് ഏറ്റവും മികച്ച രീതിയില് നടപ്പിലാക്കുന്ന സംസ്ഥാനമാണ് കേരളം. ഈ സര്ക്കാരിന്റെ കാലത്ത് കേരളത്തിലെ സാന്ത്വന പരിചരണ പ്രവര്ത്തനങ്ങളെ ലോകാരോഗ്യ സംഘടന അഭിനന്ദിച്ചിരുന്നു. മാത്രവുമല്ല കേരളത്തിലെ പാലിയേറ്റീവ് പരിചരണ പ്രവര്ത്തനങ്ങളെ ലോകാരോഗ്യ സംഘടന മാതൃകയായി അംഗീകരിച്ചിട്ടുമുണ്ട്.
സര്ക്കാര്, സന്നദ്ധ മേഖലകളില് പ്രവര്ത്തിക്കുന്ന മുഴുവന് പാലിയേറ്റീവ് കെയര് യൂനിറ്റുകളേയും ഉള്ക്കൊള്ളിച്ചു കൊണ്ടാണ് പാലിയേറ്റീവ് കെയര് ഗ്രിഡ് രൂപീകരിച്ചിരിക്കുന്നതെന്ന് വീണ ജോര്ജ് പറഞ്ഞു. നവകേരളം കർമപദ്ധതി രണ്ട് ആര്ദ്രം മിഷനിലെ പത്ത് പ്രധാന പ്രവര്ത്തന മേഖലകളിലൊന്നാണ് പാലിയേറ്റീവ് കെയര്. ഇതിന്റെ ഭാഗമായി തയാറാക്കിയ സമഗ്ര പാലിയേറ്റീവ് കെയര് ആക്ഷന് പ്ലാന് പ്രകാരമാണ് പാലിയേറ്റീവ് കെയര് ഗ്രിഡ് രൂപീകരിച്ചത്.
കിടപ്പിലായ ഓരോ രോഗിയുടെയും സമീപ പ്രദേശത്ത് പരിശീലനം ലഭിച്ച ഒരു സന്നദ്ധ പ്രവര്ത്തകന്റെ സേവനം ഉറപ്പാക്കി വരുന്നു. എല്ലാ ജില്ലകളിലും പാലിയേറ്റീവ് പരിശീലന കേന്ദ്രങ്ങള് ആരംഭിച്ചു. ഇതിന് പുറമേയാണ് സാന്ത്വന പരിചരണം ഏകോപിപ്പിക്കുന്നതിന് പാലിയേറ്റീവ് കെയര് ഗ്രിഡ് രൂപീകരിച്ചിരിക്കുന്നതെന്നും മന്ത്രി വ്യക്തമാക്കി.
ആരോഗ്യ വകുപ്പിന്റെ നേതൃത്വത്തില് തദ്ദേശസ്വയംഭരണ വകുപ്പിന്റെ സഹകരണത്തോടെയാണ് പാലിയേറ്റീവ് പരിചരണം നടിപ്പിലാക്കി വരുന്നത്. സംസ്ഥാന ആരോഗ്യ വകുപ്പിന്റെ നേതൃത്വത്തില് കേരള ഡിജിറ്റല് യൂനിവേഴ്സിറ്റിയുടെ അഭിമുഖ്യത്തിലാണ് ഗ്രിഡ് രൂപീകരിച്ചിട്ടുള്ളത്. ടെസ്റ്റ് റണ്, സെക്യൂരിറ്റി ഓഡിറ്റ് എന്നിവ പൂര്ത്തിയാക്കിയാണ് ഗ്രിഡ് സജ്ജമാക്കിയതെന്നും മന്ത്രി അറിയിച്ചു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.