ഓൺലൈൻ ട്രേഡിങ്: വൈദികനിൽ നിന്ന്​ ഒന്നരക്കോടി തട്ടിയ രണ്ടുപേർ പിടിയിൽ

കടുത്തുരുത്തി: ഓൺലൈൻ ട്രേഡിങ്ങിലൂടെ വൻ ലാഭം വാഗ്ദാനം ചെയ്ത്​ വൈദികനിൽ നിന്ന്​ ഒന്നരക്കോടി രൂപ തട്ടിയെടുത്ത സംഭവത്തിൽ രണ്ടുപേർ പിടിയിൽ. കോഴിക്കോട്​ താമരശ്ശേരി പെരുമ്പള്ളി കുന്നത്തുവീട്ടിൽ മുഹമ്മദ് മിനാജ് (21), ചെറുപ്ലാട് ഷംനാദ് (32) എന്നിവരെയാണ് കടുത്തുരുത്തി എസ്​.എച്ച്​​.ഒ റെനീഷ് ഇല്ലിക്കൽ അറസ്റ്റ് ചെയ്തത്. തട്ടിപ്പ്​ നടത്തിയ ഉത്തരേന്ത്യൻ സംഘത്തിൽപെട്ടവരാണ്​ ഇവരെന്ന്​ പൊലീസ്​ പറഞ്ഞു.

2024 നവംബർ മുതൽ 2025 ജനുവരി 15 വരെയുള്ള കാലയളവിലാണ് തട്ടിപ്പ് നടന്നത്. കോതനല്ലൂർ തൂവാനീസ പ്രാർഥനാലയത്തിലെ അസി. ഡയറക്ടർ ഫാ. ടിനേഷ് കുര്യൻ പിണർക്കയിലിനാണ്​ തുക നഷ്ടപ്പെട്ടത്​. പ്രമുഖ കമ്പനിയുടെ പേരിലുള്ള ഓൺലൈൻ ട്രേഡിങ്​ മൊബൈൽ ആപ്​ ഉപയോഗിച്ചാണ് തട്ടിപ്പ് സംഘം വൈദികനെ കുടുക്കിയത്. സുഹൃത്തുക്കളിൽ നിന്നും ബന്ധുക്കളിൽ നിന്നും സഭയിലെ പരിചയക്കാരിൽനിന്നുമായി ഒന്നരക്കോടി സ്വരൂപിച്ച് വൈദികൻ ഇതിൽ നിക്ഷേപിക്കുകയായിരുന്നു. പിന്നീട്​ വഞ്ചിക്കപ്പെട്ടതായി മനസ്സിലാക്കിയതോടെ ഇദ്ദേഹം കോട്ടയം കടുത്തുരുത്തി പൊലീസിൽ പരാതി നൽകി.

ഉത്തരേന്ത്യൻ സംഘമാണ് തട്ടിപ്പിന് പിന്നിലെന്ന്​ പൊലീസ്​ കണ്ടെത്തി. വൈദികനിൽ നിന്ന്​ വാങ്ങിയ തുക വിവിധ അക്കൗണ്ടുകളിലേക്ക്​ തട്ടിപ്പ് സംഘം മാറ്റിയിരുന്നു. കേരളത്തിലെ വിവിധ എ.ടി.എമ്മുകളിൽ നിന്ന്​ എട്ടു തവണയായി​ 1.40 ലക്ഷം പിൻവലിച്ചതായും കണ്ടെത്തി. ഈ അക്കൗണ്ടുകൾ കേന്ദ്രീകരിച്ച്​ നടത്തിയ അന്വേഷണത്തിലാണ്​ താമരശ്ശേരി സ്വദേശികളുടെ വിലാസം ലഭിച്ചത്​.

തുടർന്ന് എസ്.എച്ച്.ഒ റെനീഷ് ഇല്ലിക്കൽ, സീനിയർ സിവിൽ പൊലീസ് ഓഫിസർമാരായ ഇ.എ. അനീഷ്, സുമൻ പി. മണി, അജീഷ്, അജിത് എന്നിവരടങ്ങുന്ന സംഘം പ്രതികളെ കസ്റ്റഡിയിൽ എടുത്തു. ഉത്തരേന്ത്യയിലെ തട്ടിപ്പ് സംഘം ഇവരുടെ അക്കൗണ്ടിലേക്ക്​ തട്ടിയെടുത്ത പണം ഇട്ടുനൽകിയിരുന്നു. ഡിസംബർ 31 മുതൽ ജനുവരി 15 വരെ 17 ലക്ഷത്തിലധികം രൂപയുടെ ഇടപാടാണ് മിനാജിന്‍റെ അക്കൗണ്ട് വഴി നടന്നതെന്ന്​ പൊലീസ് കണ്ടെത്തിയിട്ടുണ്ട്.