ഇരിങ്ങാലക്കുട - കൊടുങ്ങല്ലൂർ സംസ്ഥാന പാതയിൽ വെള്ളാങ്ങല്ലൂരിൽ സമരാനുകൂലികൾ കണ്ടെയ്നർ ലോറി തടഞ്ഞുണ്ടായ സംഘർഷം
തിരുവനന്തപുരം: തൊഴിലാളി വിരുദ്ധ ലേബർ കോഡുകൾ പിൻവലിക്കുക, കർഷകരുടെ ആറ് ആവശ്യങ്ങൾ അടങ്ങിയ അവകാശപത്രിക ഉടൻ അംഗീകരിക്കുക തുടങ്ങി 12 ആവശ്യങ്ങൾ ഉന്നയിച്ച് ട്രേഡ് യൂനിയൻ സംയുക്ത സമിതി പ്രഖ്യാപിച്ച ദ്വിദിന ദേശീയ പണിമുടക്ക് തുടങ്ങി. ഞായറാഴ്ച രാത്രി 12 മുതൽ ചൊവ്വാഴ്ച രാത്രി 12 വരെയാണ് പണിമുടക്ക്. കേരളത്തിൽ 22 തൊഴിലാളി സംഘടനകളാണ് പണിമുടക്കുന്നത്. ആശുപത്രി, ആംബുലൻസ്, മരുന്നുകടകൾ, പാൽ, പത്രം, ഫയർ ആന്ഡ് റെസ്ക്യൂ പോലുള്ള അവശ്യ സർവിസുകളെ ഒഴിവാക്കിയിട്ടുണ്ട്. റെയിൽവേ മേഖലയെ പണിമുടക്കിൽ ഉൾപ്പെടുത്തിയിട്ടില്ല. പക്ഷേ യാത്ര ഒഴിവാക്കണമെന്ന് സംയുക്ത സമിതി അഭ്യർഥിച്ചിട്ടുണ്ട്.
ബി.എം.എസ് ഒഴികെ ഭൂരിപക്ഷം തൊഴിലാളി സംഘടനകളും പങ്കാളിയായ പണിമുടക്ക് ഏറക്കുറെ പൂർണമായേക്കും. മോട്ടോർ മേഖലയിലെ തൊഴിലാളികൾ പണിമുടക്കുന്നതിനാൽ വാഹനങ്ങൾ നിരത്തിൽ ഇറങ്ങില്ല. കട കമ്പോളങ്ങൾ അടഞ്ഞുകിടക്കും. കർഷക-കർഷക തൊഴിലാളി സംഘടനകൾ, കേന്ദ്ര സംസ്ഥാന സർവിസ്-അധ്യാപക സംഘടനകൾ, ബി.എസ്.എൻ.എൽ-എൽ.ഐ.സി-ബാങ്ക് ജീവനക്കാരുടെ സംഘടനകൾ, തുറമുഖ തൊഴിലാളികൾ എന്നിവർ പണിമുടക്കിൽ പങ്കുചേരുന്നുണ്ട്.
ദേശീയ പണിമുടക്കിനെ തുടർന്ന് സർക്കാർ ഓഫീസുകളിൽ ഹാജർ കുറഞ്ഞതിനെ വിമർശിച്ച ഹൈകോടതിക്ക് മറുപടിയുമായി സി.പി.ഐ തൊഴിലാളി സംഘടനയായ എ.ഐ.ടി.യു.സി. കോടതികൾ വിമർശിക്കേണ്ടത് കേന്ദ്ര സർക്കാറിനെയാണെന്ന് എ.ഐ.ടി.യു.സി സംസ്ഥാന ജനറൽ സെക്രട്ടറി കെ.പി രാജേന്ദ്രൻ പറഞ്ഞു. ഹൈകോടതി ഉത്തരവിനെതിരെ അപ്പീൽ പോകുന്ന കാര്യം കൂട്ടായി ആലോചിക്കും. ഇപ്പോൾ പണിമുടക്കുന്ന സർക്കാർ ജീവനക്കാർ നാളെയും പണിമുടക്കും. നാളെയും സമരം ശക്തമായി തന്നെ നടക്കുമെന്നും കെ.പി രാജേന്ദ്രൻ മാധ്യമങ്ങളോട് പറഞ്ഞു.
സർക്കാർ ഉദ്യോഗസ്ഥർ പണിമുടക്കിൽ പങ്കെടുക്കരുതെന്നും ഡയസ്നോൺ പ്രഖ്യാപിച്ച് ഉദ്യോഗസ്ഥർ പണിമുടക്കിൽ പങ്കെടുക്കുന്നത് വിലക്കി ഇന്ന് തന്നെ സർക്കാർ ഉത്തരവിറക്കണമെന്നുമാണ് ഹൈകോടതി നിർദേശിച്ചത്. ദേശീയ പണിമുടക്കിൽ ഡയസ്നോൺ പ്രഖ്യാപിക്കാത്തത് ചോദ്യം ചെയ്ത് തിരുവനന്തപുരം സ്വദേശിയായ അഭിഭാഷകൻ സമർപ്പിച്ച ഹരജിയിലാണ് കോടതി ഉത്തരവ്.
തിരുവനന്തപുരം പേട്ടയിൽ യാത്ര തടസപ്പെട്ടതിനെ തുടർന്ന് മജിസ്ട്രേറ്റ് സി.ഐയെ വിളിപ്പിച്ച് വിശദീകരണം തേടി
തിരുവനന്തപുരം വെഞ്ഞാറമൂട്ടിൽ സി.പി.എമ്മും സി.പി.ഐയും തമ്മിൽ സംഘർഷം. സി.പി.ഐയുടെ നേതൃത്വത്തിൽ നടത്തിയ പ്രകടനം സി.പി.എം പന്തലിന് സമീപം എത്തിയപ്പോഴാണ് വാക്കുതർക്കമുണ്ടായത്.
ദേശീയ പണിമുടക്കിനോട് അനുബന്ധിച്ച് ഇരിങ്ങാലക്കുട - കൊടുങ്ങല്ലൂർ സംസ്ഥാന പാതയിൽ വെള്ളാങ്ങല്ലൂരിൽ സമരാനുകൂലികൾ കണ്ടെയ്നർ ലോറി തടഞ്ഞുണ്ടായ സംഘർഷം
കോഴിക്കോട് സമരാനുകൂലികൾ ഓട്ടോറിക്ഷ അടിച്ചുതകർത്തു. മാവൂർ റോഡിന് സമീപം ശ്മശാനം റോഡിലാണ് സംഭവം.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.