യുവതിയെയും കൊണ്ട്​ ഒളിച്ചോടി​യ യുവാവ്​ മർദ്ദനമേറ്റ്​ മരിച്ചു

ഗുരുവായൂർ: വിവാഹിതയായ യുവതിയുമൊത്ത് ലോഡ്ജിൽ താമസിച്ചയാൾ മർദനമേറ്റ് ചികിത്സയിലിരിക്കെ മരിച്ചു. പാവറട്ടി മരുതയൂർ അമ്പാടി സന്തോഷാണ്​ (43) മരിച്ചത്. ഏപ്രിൽ 23ന് ഗുരുവായൂർ കിഴക്കേനടയിലെ ലോഡ്ജിലാണ് ആക്രമണം നടന്നത്. യുവതിയുടെ ബന്ധുക്കൾ സന്തോഷിനെ ലോഡ്ജിന് മുന്നിലിട്ട് ആക്രമിക്കുകയായിരുന്നു.

ആക്ട്‌സ് പ്രവർത്തകർ ചാവക്കാട് താലൂക്ക് ആശുപത്രിയിലെത്തിച്ചു. തലക്ക് സാരമായ പരിക്കേറ്റതിനാൽ പിന്നീട് തൃശൂർ മെഡിക്കൽ കോളജ്​ ആശുപത്രിയിലേക്ക് മാറ്റി. സന്തോഷി​​​െൻറ ബന്ധുക്കളുടെ പരാതിയെ തുടർന്ന് യുവതിയുടെ ഭർത്താവ് മുതുവട്ടൂർ കുന്നത്തുള്ളി ദിനേഷ് (47), ബന്ധു നെല്ലുവായ് മുട്ടിൽ പാണ്ടികശാല വളപ്പിൽ മഹേഷ് (32) എന്നിവരെ അറസ്​റ്റ് ചെയ്തിരുന്നു. ഇവർ റിമാൻഡിലാണ്. കണ്ടാലറിയുന്ന രണ്ടാളുടെ പേരിൽ കൂടി കേസെടുത്തിട്ടുണ്ട്. ശനിയാഴ്ച 10.30ഓടെയാണ്​ സന്തോഷ് മരിച്ചത്. 

സംഭവത്തെ കുറിച്ച് പൊലീസ് പറയുന്നത്: സന്തോഷും ദിനേഷും സുഹൃത്തുക്കളായിരുന്നു. മരക്കച്ചവടക്കാരനായ സന്തോഷ് ഭാര്യയുമായി പിണങ്ങി കഴിയുകയായിരുന്നു. ഇയാൾ ദിനേശി​​​െൻറ ഭാര്യയുമായി അടുപ്പത്തിലായി. ഒരാഴ്ച മുമ്പ് സന്തോഷിനൊപ്പം യുവതി വീടുവിട്ടു. ഇവരെ അന്വേഷിച്ചപ്പോൾ ഗുരുവായൂരിലെ ലോഡ്ജിലുണ്ടെന്ന് വിവരം ലഭിച്ചു.

രണ്ടുപേരും പൊള്ളാച്ചിയിലേക്ക് പോകാനൊരുങ്ങുമ്പോഴായിരുന്നു ദിനേഷും ബന്ധുക്കളും ലോഡ്ജിലെത്തിയത്. റിമാൻഡിലുള്ള പ്രതികൾക്കെതിരെ കൊലപാതകത്തിന് കേസെടുക്കുമെന്ന് ടെമ്പിൾ സ്​റ്റേഷൻ ഓഫിസർ സുനിൽകുമാർ പറഞ്ഞു. സന്തോഷിനെ മർദിക്കുന്നതി​​​െൻറ സി.സി.ടി.വി ദൃശ്യം പൊലീസിന് ലഭിച്ചിട്ടുണ്ട്. കൂടുതൽ പേർ കേസിൽ ഉൾപ്പെട്ടിട്ടുണ്ടോയെന്ന്​ അന്വേഷിക്കുന്നുണ്ട്.