വൈഡൂര്യ കൊള്ളയിൽ അന്വേഷണം ആവശ്യപ്പെട്ട് പാലോട് വനം റേഞ്ച് ഓഫിസിന് മുന്നിൽ പശ്ചിമഘട്ട ജൈവ കലവറ പരിപാലന സമിതി നടത്തിയ ധർണ നന്ദിയോട് ഗ്രാമപഞ്ചായത്ത് വൈസ് പ്രസിഡൻറ് പി.എസ്. ബാജിലാൽ ഉദ്ഘാടനം ചെയ്യുന്നു
പാലോട്: ബ്രൈമൂർ മണച്ചാല വനത്തിൽ വൈഡൂര്യ കൊള്ള നടത്തിയവരെ കണ്ടെത്താൻ വനം വകുപ്പിന് കഴിയാത്ത സാഹചര്യത്തിൽ അന്വേഷണം കേന്ദ്ര ഏജൻസികളെ ഏൽപിക്കണമെന്ന് പശ്ചിമഘട്ട ജൈവ കലവറ പരിപാലന സമിതി ആവശ്യപ്പെട്ടു. പാലോട് റേഞ്ച് ഓഫിസിന് മുന്നിൽ സമിതി നടത്തിയ ധർണ നന്ദിയോട് ഗ്രാമപഞ്ചായത്ത് വൈസ് പ്രസിഡൻറ് പി.എസ്.ബാജിലാൽ ഉദ്ഘാടനം ചെയ്തു. കൊള്ള നടന്ന് ഒന്നരമാസം പിന്നിട്ടിട്ടും പ്രതികളെ സംബന്ധിച്ച സൂചനപോലും വനംവകുപ്പിന് ലഭിച്ചിട്ടില്ല.
മാഫിയകളുടെ പങ്കാളിത്തമുള്ളതിനാൽ വനം വകുപ്പിന് കേസ് അന്വേഷിക്കുന്നതിന് പരിമിതികളുണ്ട്. അതീവ പരിസ്ഥിതി ദുർബല പ്രദേശമായ മണച്ചാലയിൽ ജാക്ക് ഹാമർ, ആധുനിക സ്ഫോടക വസ്തുക്കൾ, അത്യാധുനിക സെർച്ചു ലൈറ്റുകൾ എന്നിവ ഉപയോഗിച്ച് പാറയിടുക്കുകളും മലഞ്ചെരുവുകളും തുരന്ന് വമ്പിച്ച വൈഡൂര്യശേഖരമാണ് കൊള്ളയടിച്ചത്. യഥാർഥ പ്രതികളെ അറസ്റ്റ് ചെയ്യുന്നതുവരെ തുടർസമരങ്ങൾ നടത്തുമെന്ന് ഭാരവാഹികൾ പറഞ്ഞു.
പശ്ചിമഘട്ട ജൈവ കലവറ പരിപാലന സമിതി പ്രസിഡൻ്റ് എം. നിസാർ മുഹമ്മദ് സുൽഫി അധ്യക്ഷതവഹിച്ചു. ജനറൽ കൺവീനർ സലീം പള്ളിവിള, ബി.ജെ.പി പെരിങ്ങമ്മല മണ്ഡലം പ്രസിഡൻറ് പ്ലാമൂട് അജി, മുസ്ലിംലീഗ് വാമനപുരം നിയോജക മണ്ഡലം പ്രസിഡൻറ് ഇടവം ഖാലിദ്, എസ്.ഡി.പി.ഐ ജില്ല വൈസ് പ്രസിഡൻറ് തച്ചോണം നിസാമുദ്ദീൻ, വെൽഫെയർ പാർട്ടി നേതാവും പാങ്ങോട് ഗ്രാമപഞ്ചായത്ത് അംഗവുമായ ചക്കമല ഷാനവാസ്, മുസ്ലിംലീഗ് ജില്ല വൈസ് പ്രസിഡൻറ് എം.കെ. സലീം, വൈൽഡ് ലൈഫ് ഫോട്ടോഗ്രാഫർ സാലി പാലോട്, പെരിങ്ങമ്മല ഗ്രാമപഞ്ചായത്ത് അംഗം നസീമാ ഇല്യാസ്, താന്നിമൂട് ഷംസുദീൻ, ബഷീർ പനങ്ങോട്, റസിയാ അൻസർ, പ്രദീപ് നന്മ, ജലീൽ കുന്നിൽ, മുതിയാൻകുഴി റഷീദ്, അൻസാരി കൊച്ചുവിള, മൻസീം വില്ലിപ്പയിൽ, നാദിർഷാ ഞാറനീലീ, അംജദ് ആനപ്പുതയിൽ, ഇല്യാസ് താന്നിമൂട്, നൗഷാദ് അഷറഫ്, ഇക്ബാൽ, ആൽബർട്ട് കണ്ണൻകോട് എന്നിവർ സംസാരിച്ചു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.