വാര്യാപുരം വളവിൽ കാർ മറിഞ്ഞ് ദമ്പതികൾക്ക് പരിക്ക്

പത്തനംതിട്ട: വാര്യാപുരം വളവിൽ നിയന്ത്രണംവിട്ട കാർ റോഡിൽനിന്ന് തെന്നിമാറി കല്ലിലിടിച്ച് പത്തടി താഴ്ചയിലേക്ക് മറിഞ്ഞു. കാറിലുണ്ടായിരുന്ന ഇലന്തൂർ വാര്യാപുരം സ്വദേശികളായ ജോസ് (61), ഭാര്യ അന്നമ്മ (55) എന്നിവർ അദ്​ഭുതകരമായി രക്ഷപ്പെട്ടു. ചൊവ്വാഴ്ച വൈകീട്ട്​ മൂന്നരയോടെയായിരുന്നു അപകടം. കാറിൽനിന്ന് പെട്രോൾ ചോരുന്നുണ്ടായിരുന്നു. മകന്‍റെ കല്യാണത്തിന് ചെങ്ങന്നൂരിൽനിന്ന് വാര്യാപുരത്തേക്ക് വരുകയായിരുന്നു ദമ്പതികൾ. മുന്നിലുണ്ടായിരുന്ന വാഹനത്തെ മറികടക്കുന്നതിനിടെയാണ് അപകടം. പത്തനംതിട്ടയിൽനിന്ന് അസി. സ്റ്റേഷൻ ഓഫിസർ സന്തോഷ് കുമാറിന്‍റെ നേതൃത്വത്തിൽ അഗ്​നിരക്ഷാസേനയെത്തി രക്ഷാപ്രവർത്തനം നടത്തി. കാറിലുണ്ടായിരുന്ന ഗ്യാസ് സലിണ്ടറുകൾ മാറ്റി. ചില്ല് വെട്ടിപ്പൊളിച്ചാണ് ദമ്പതികളെ പുറത്തെടുത്തത്. മുഖത്തും കൈകാലുകളിലും ചതവുപറ്റിയ നിലയിൽ ദമ്പതികളെ പത്തനംതിട്ട ജനറൽ ആശുപത്രിയിൽ എത്തിച്ചു. പരിക്ക് സാരമുള്ളതല്ലെന്ന് ആശുപത്രി അധികൃതർ പറഞ്ഞു. photo. വാര്യാപുരത്തുണ്ടായ അപകടം