തിരുവാഭരണ പാതയിലെ സ്ലാബ് അപകടക്കെണിയാകുന്നു

വടശ്ശേരിക്കര: തിരുവാഭരണ പാതയിൽ വശ്ശേരിക്കര മാർക്കറ്റിനു സമീപമുള്ള നടപ്പാതയിലെ കോൺക്രീറ്റ് സ്ലാബ് ഇളകിക്കിടക്കുന്നത്​ കാൽനടക്കാരെ വലക്കുന്നു. പേങ്ങാട്ടുകടവ് പാലത്തിൽകൂടി കടന്നുവരുന്ന തിരുവാഭരണപേടകം ഈ നടപ്പുവഴിയിൽ കൂടിയാണ് വടശ്ശേരിക്കര ടൗണിലേക്ക് പ്രവേശിക്കുന്നത്. മണ്ഡല മകരവിളക്കിന് ശബരിമലയിൽ ചാർത്താനുള്ള തിരുവാഭരണം കടന്നുവരുവാൻ ദിവസങ്ങൾ മാത്രം അവശേഷിക്കുമ്പോഴും ഇളകിക്കിടക്കുന്ന സ്ലാബുകൾ നേരെയാക്കുവാനോ പൊട്ടിയ സ്ലാബുകൾ പുനർനിർമിക്കുവാനോ പഞ്ചായത്ത് നടപടിയെടുക്കാത്തതിൽ പ്രതിഷേധമുയരുന്നു. കൈയേറിയ തിരുവാഭരണപാത തിരിച്ചുപിടിച്ചു തിരക്കിട്ടു അറ്റകുറ്റപ്പണി മറ്റു സ്ഥലങ്ങളിലെല്ലാം നടക്കുന്നുണ്ടെങ്കിലും പേങ്ങാട്ടുകടവ് മുതലുള്ള തിരുവാഭരണപാതയുടെ നവീകരണം ഇഴഞ്ഞുനീങ്ങുകയാണ്.