അതിവേഗ റെയിൽപദ്ധതി ഉപേക്ഷിക്കണമെന്ന്​ പരിസ്ഥിതി^മനുഷ്യാവകാശ പ്രവർത്തകർ

അതിവേഗ റെയിൽപദ്ധതി ഉപേക്ഷിക്കണമെന്ന്​ പരിസ്ഥിതി-മനുഷ്യാവകാശ പ്രവർത്തകർ പത്തനംതിട്ട: പതിനായിരക്കണക്കിന്​ ജനങ്ങളെ കുടിയിറക്കുന്ന തിരുവനന്തപുരം -കാസർകോട്​ അർധ അതിവേഗ റെയിൽപദ്ധതി ഉപേക്ഷിക്കണമെന്നാവശ്യപ്പെട്ട്​ പ്രമുഖ പരിസ്ഥിതി- മനുഷ്യാവകാശ പ്രവർത്തകർ സംസ്ഥാന സർക്കാറിന്​ കത്തയച്ചു. നിരവധി സംഘടനകളുടെ കൂട്ടായ്​മയായ ദേശീയ ജനകീയ പ്രസ്ഥാനത്തിന്​ നേതൃത്വം നൽകുന്ന മേധാപട്​കർ, അരുണാ റോയി തുടങ്ങിയവർ ഒപ്പിട്ട അഞ്ചുപേജ്​ കത്തിൽ വികസനത്തി​ൻെറ പേരിൽ കുടിയൊഴിപ്പിക്കപ്പെട്ടിട്ടും ഇനിയും നിറവേറ്റപ്പെടാത്ത വാഗ്ദാനങ്ങളെക്കുറിച്ച്​ സർക്കാറിനെ ഒാർമിപ്പിക്കുന്നുണ്ട്​. അർധ അതിവേഗ പാതക്ക്​ 20,000 കുടുംബങ്ങളെ കുടിയൊഴിപ്പിക്കുന്നതിലുടെ 80,000 പേരെയാണ്​ ബാധിക്കുന്നത്​. പാരിസ്ഥിതികാഘാതങ്ങൾ സൃഷ്​ടിക്കുന്ന പദ്ധതിക്ക്​ ചെലവഴിക്കുന്ന തുകയെ അപേക്ഷിച്ച്​ അതി​ൻെറ ലാഭം വിദഗ്​ധ​െര നിയോഗിച്ച്​ വിലയിരുത്തണമെന്നും നിർദേശിക്കുന്നു. പത്തുകൊല്ലം മുമ്പ് വല്ലാർപാടം ക​െണ്ടയ്​നർ പദ്ധതിക്ക്​ കുടിയിറ​ക്കപ്പെട്ട 326 കുടുംബങ്ങളിൽ 76 കുടുംബങ്ങളെ മാത്രമാണ്​ പുനരധിവസിപ്പിച്ചത്​. ഇനിയും 250 കുടുംബങ്ങളെ പുനരധിവസിപ്പിക്കാനുണ്ട്​. അതിനാൽ അതിവേഗ പാതക്ക്​ 80,000 പേരുടെ കുടിയൊഴിപ്പിക്കലും പുനരധിവാസവും തുടങ്ങിയ എല്ലാ ചെലവുകളും കൂട്ടു​േമ്പാൾ പദ്ധതി ഉപേക്ഷിക്കുകയാണ്​ യുക്തി. റെയിൽ പാതക്കായി നെൽപാടങ്ങളും തണ്ണീർത്തടങ്ങളും കണ്ടൽക്കാടുകളും കുന്നുകളും വലിയതോതിൽ നശിപ്പിക്കപ്പെടും. മണ്ണിട്ട്​ ഉയർത്തുന്നത്​ വെള്ളപ്പൊക്കത്തിനും കാരണമാകും. പാതക്ക്​ ഇരുവശത്തുമായി വരുന്ന ഉയർന്ന മതിലുകൾ പ്രളയം പോലുള്ള സമയങ്ങളിൽ ദുരന്തരക്ഷ പ്രവർത്തനങ്ങൾക്ക് ബുദ്ധിമുട്ട്​ സൃഷ്​ടിക്കുമെന്നും ​കത്ത്​ ചൂണ്ടിക്കാട്ടുന്നു. പകർച്ചവ്യാധിയും പ്രകൃതി ദുരന്തങ്ങളും നേരിടുന്നതിൽ സംസ്ഥാന സർക്കാറിൻെറ പ്രവർത്തനങ്ങളെ കത്തിൽ അഭിനന്ദിക്കുന്നുമുണ്ട്​. പീപ്പിൾസ്​ യൂനിയൻ ഒാഫ്​ സിവിൽ ലിബർട്ടീസ്​ പ്രതിനിധി കവിത ശ്രീവാസ്​തവ, സന്തീപ്​ പാണ്​ഡെ, സി.ആർ. നീലകണ്​ഠൻ, പ്രഫ. കുസുമം ജോസഫ്​, വിളയോടി വേണുഗോപാൽ, പ്രിയ പിള്ളെ തുടങ്ങി നിരവധിപേർ കത്തിൽ ഒപ്പുവെച്ചിട്ടുണ്ട്​.