അപകടങ്ങൾക്കിടയാക്കി വാട്ടർ അതോറിറ്റിയുടെ റോഡ് കുത്തിപ്പൊളിക്കൽ

മല്ലപ്പള്ളി: പൈപ്പ് പൊട്ടലിനെ തുടർന്ന് വാട്ടർ അതോറിറ്റിയുടെ നേതൃത്വത്തിൽ നടക്കുന്ന റോഡ് കുത്തിപ്പൊളിക്കൽ അപകടങ്ങൾക്ക് ഇടയാക്കുന്നു. പൈപ്പ് ലൈനുകൾ നന്നാക്കുന്നതിനായി പൊളിക്കുന്ന ഭാഗത്തെ കുഴി നല്ലരീതിയിൽ മൂടാത്തത് പലയിടത്തും അപകടങ്ങൾക്ക്​ കാരണമായതായി നാട്ടുകാർ പറയുന്നു. കഴിഞ്ഞദിവസം മല്ലപ്പള്ളി-തിരുവല്ല റോഡിൽ മാർക്കറ്റിലേക്ക് കയറുന്ന ഭാഗത്ത് എടുത്ത കുഴിയിൽ നിരവധിപേരാണ് വീണത്. പ്രദേശവാസികൾ മണ്ണിട്ട് കുഴി മൂടിയെങ്കിലും മഴപെയ്​തതോടെ മണ്ണ് ഒലിച്ചുപോയി കുഴി രൂപപ്പെട്ടിരിക്കുകയാണ്. ഉന്നത നിലവാരത്തിൽ ടാറിങ് പൂർത്തിയാക്കിയ റോഡുകളാണ് ഇങ്ങനെ വെട്ടിപ്പൊളിക്കുന്നത്. കോട്ടയം റോഡിന്‍റെ വശങ്ങളിൽ നിരവധി കുഴികളാണ് പൂർണമായും മൂടാത്ത നിലയിൽ കിടക്കുന്നത്. അപകടം നിത്യസംഭവമായിട്ടും ബന്ധപ്പെട്ടവരുടെ ഭാഗത്തുനിന്ന്​ നടപടി ഉണ്ടാകുന്നില്ല. : ഫോട്ടോ-- മല്ലപ്പള്ളി-തിരുവല്ല റോഡിൽ മാർക്കറ്റിന് സമീപം പൈപ്പ് പൊട്ടലിനെ തുടർന്ന് റോഡ് കുത്തിപ്പൊളിച്ചനിലയിൽ