ടാങ്കർലോറിയിൽ കക്കൂസ് മാലിന്യവുമായി എത്തിയവരെ നാട്ടുകാർ പിടികൂടി

പെരിന്തൽമണ്ണ: പൊതുസ്ഥലത്ത് കക്കൂസ് മാലിന്യമൊഴുക്കാൻ ശ്രമിക്കുന്നതിനിടെ ടാങ്കർലോറി നാട്ടുകാർ തടഞ്ഞു. അങ്ങാടിപ്പുറം പഞ്ചായത്തിൽ പൂപ്പലം മത്സ്യമാർക്കറ്റിന് സമീപമാണ് കക്കൂസ് മാലിന്യവുമായി ലോറിയെത്തിയത്. സംശയം തോന്നിയ നാട്ടുകാർ സംഘടിച്ചതോടെ വാഹനത്തിലുള്ളവർ രക്ഷപ്പെട്ടു.

വാഹനം തടഞ്ഞ് നാട്ടുകാർ അങ്ങാടിപ്പുറം പഞ്ചായത്ത് അധികൃതരെയും പെരിന്തൽമണ്ണ പൊലീസിനെയും അറിയിച്ചു. പൊലീസ് സ്ഥലത്തെത്തി വാഹനവും ഡ്രൈവറെയും കസ്റ്റഡിയിലെടുത്തു. വ്യാഴാഴ്ച രാവിലെയാണ് സംഭവം. ടാങ്കർ ലോറി നിർത്തിയിട്ടിരിക്കുന്നത് കണ്ട് സംശയം തോന്നിയ ചിലർ പരിശോധിച്ചപ്പോഴാണ് പെരിന്തൽമണ്ണ- ഊട്ടി റോഡിൽ റോഡരികിൽ മാലിന്യം ഒഴുക്കാനുള്ള ഒരുക്കം നടക്കുന്നതായി കണ്ടത്. ഈ ഭാഗത്ത് കുടിവെള്ള പദ്ധതികളുടെ കിണറുകളുണ്ട്.

പലപ്പോഴും ചാക്കിൽകെട്ടിയ നിലയിൽ ഈ ഭാഗത്ത് മാലിന്യം തള്ളാറുണ്ട്. പൊലീസിന്റെ രാത്രികാല പരിശോധന വേണ്ടവിധം നടക്കാത്തതും പഞ്ചായത്ത് കാര്യമായി ഇടപെടാത്തതുമാണ് മാലിന്യമൊഴുക്കുന്നവർക്ക് തുണയാവുന്നത്.